اقتوبەدەگى از قامتىلعان وتباسىلاردىڭ باسپانالى بولۋىنا جاڭا مۇمكىندىك. «7-20-25» مەملەكەتتىك باعدارلاماسى بويىنشا تولەنەتىن العاشقى جارنانىڭ 10 پايىزىن جەرگىلىكتى اكىمدىك ءوز موينىنا الماق. بۇگىن «نۇر وتان» پارتياسىنىڭ باستاۋىش پارتيا ۇيىمدارىنىڭ ايماقتىق فورۋمى بارىسىندا اقتوبە وبلىس اكىمدىگى مەن "باسپانا" يپوتەكالىق كومپانياسى وسىنداي مەموراندۋمعا قول قويدى.

وسىلايشا، جاس وتباسىلار مەن اقتوبە وبلىسىنىڭ بيۋدجەتتىك سالا قىزمەتكەرلەرى «7-20-25» باعدارلاماسى بويىنشا پاتەر قۇنىنىڭ 10%-ىن عانا تولەپ، ءۇي الۋ مۇمكىندىگىنە يە بولادى.

مەموراندۋمعا سايكەس اقتوبە وبلىسىنىڭ اكىمدىگى اتالعان ازاماتتارعا باستاپقى جارنانىڭ جارتىسىن تولەۋدى ءوز موينىنا الادى جانە وسى ماقساتقا 2 ملرد تەڭگە بولەدى.

- «اقتوبە وبلىسىنىڭ اكىمى مەن «نۇر وتان» پارتياسىنا باستاپقى جارنانى ازايتۋ بويىنشا الەۋمەتتىك باستامالاردى قولداعانى ءۇشىن العىسىمدى بىلدىرگىم كەلەدى. وبلىس قارقىندى دامىپ كەلەدى جانە «7-20-25» باعدارلاماسىنا قاتىسۋشىلاردىڭ سانى بويىنشا كوشباسشىلاردىڭ ءبىرى. قازىرگى ۋاقىتتا ءبىز «نۇر وتان» پارتياسىمەن بىرلەسە وتىرىپ، ەلىمىزدىڭ باسقا وڭىرلەرىندە دە وسى باستامالاردى جۇزەگە اسىرۋ بويىنشا جۇمىستار جۇرگىزىپ جاتىرمىز»، - دەدى «باسپانا» يپوتەكالىق ۇيىمىنىڭ باسشىسى قايرات التىنبەكوۆ.

سونىمەن قاتار، ارنايى ساپارمەن اقتوبە وبلىسىنا كەلگەن «نۇر وتان» پارتياسىنىڭ حاتشىسى تامارا دۇيسەنوۆا پرەزيدەنتتىڭ بەس الەۋمەتتىك باستاماسىنىڭ جۇزەگە اسىرىلۋ بارىسىنا باقىلاۋ جۇرگىزىپ، بىرقاتار الەۋمەتتىك نىسانداردى ارالادى.

العاشقى نىسان اقتوبە قالاسىنىڭ «نۇر اقتوبە» شاعىن اۋدانىندا مەملەكەتتىك باعدارلاما بويىنشا بوي كوتەرگەن تۇرعىن ۇيلەر بولدى. اقتوبە وبلىسى «7-20-25» باعدارلاماسىمەن نەسيە الۋعا قابىلدانعان وتىنىمدەر سانى بويىنشا وبلىستار اراسىندا 4 ورىنعا يە. بيىلعى  جىلى 870,0 مىڭ شارشى مەتر تۇرعىن ءۇيدى پايدالانۋعا بەرۋ جوسپارلانسا، سوڭعى 8 ايدىڭ قورىتىندىسى بويىنشا 412,1 مىڭ شارشى مەتر تۇرعىن ءۇي ءوز يەلەرىن تاپتى.

پارتيا حاتشىسى تامارا دۇيسەنوۆا العاشقى جارنانىڭ كولەمىن ازايتۋعا باعىتتالعان ءىس-شارالار تۇرعىندارعا ۇلكەن كومەك ەكەنىن اتاپ ءوتتى.

- بۇل نەگىزىنەن الەۋمەتتىك قامسىزدانۋعا جاتاتىن ازاماتتارعا، جەتىم بالالار، كوپ بالالى وتباسىلار، سوسىن جالاقىسى تومەن ازاماتتارعا دەپ بەلگىلى ءبىر كاتەگورياعاداعى ازاماتتارعا بەرىلەتىن بولادى. ەكىنشى ەكى ميللياردتان استام قاراجات سول ازاماتتاردىڭ العاشقى جارنالارى كەمىتىلەدى. بۇل ۇلكەن مۇمكىنشىلىك دەپ وتىرمىز، - پارتيا حاتشىسى.

ەستەرىڭىزگە سالا كەتەيىك، اقتوبە «7-20-25» باعدارلاماسى بويىنشا باستاپقى جارناسى ازايعان ەكىنشى ايماق بولىپ وتىر. بۇعان دەيىن «نۇر وتان» پارتياسىنىڭ تىكەلەي ۇسىنىسى ارقىلى «باسپانا» يپوتەكالىق ۇيىمىنىڭ دايارلاعان «جاس ارمان» جانە «قامقور باسپانا» ونىمدەرى پيلوت رەتىندە شىمكەنت قالاسىندا ىسكە قوسىلعان ەدى.

Abai.kz