الماتىدا قالا كۇنىنە ارنالعان اۋقىمدى مەرەكەلىك شارالار وتۋدە، دەپ حابارلايدى اباي-اقپارات الماتى اكىمدىگىنىڭ سايتىنا سىلتەمە جاساپ.

مەرەكە كۇنى ءداستۇرلى «Apple Fest» الما فەستيۆالى ۇيىمداستىرىلىپ، شارا بىردەن بىرنەشە الاڭداردا: قر تۇڭعىش پرەزيدەنتىنىڭ ساياباعىندا، پانفيلوۆ كوشەسىندە، Almaty Arena الدىنداعى الاڭدا، جىبەك جولى كوشەسىندە، اباي جانە استانا الاڭدارىندا، ورتالىق مادەنيەت جانە دەمالىس ساياباعىندا، «كوكتوبەدە» ءوتتى.

مەگاپوليس اكىمى باۋىرجان بايبەك قالا تۇرعىندارى مەن قوناقتارىن ايتۋلى مەرەكەمەن قۇتتىقتادى.

«ەلباسىنىڭ تاپسىرماسى بويىنشا ءبىز الماتىنى الەمنىڭ ۇزدىك مەگاپوليستەرىنىڭ بىرىنە اينالدىرۋ ءۇشىن قالا كەڭىستىگىن جۇيەلى ترانسفورماتسيالاۋدى باستادىق.

وسى ۋاقىت ىشىندە «قالا ادامدار ءۇشىن» جوباسى اياسىندا تاريحي ورتالىقتىڭ 60%-ى جاڭاردى، جاياۋ جۇرگىنشى جولدارى ەكونوميكاعا وڭ ىقپال ەتۋدە، بيزنەستى ىنتالاندىرىپ، جاڭا جۇمىس ورىندارى قۇرىلۋدا.

الماتىلىقتارعا قالانىڭ قاي جەرىندە تۇراتىندىعىنا قاراماستان بىردەي جاعداي جاسالۋدا. ورتالىقتاندىرۋ قاعيداسى بويىنشا بارلىق اۋداندار دامۋ ۇستىندە. قالا تۇرعىندارى جەر استى وتپەلى جولداردىڭ قاۋىپسىزدىگى مەن تازالىعىن جوعارى باعالاۋدا. ءاربىر ءۇشىنشى اۋلا، 500-دەن استام كوشە جاڭاردى، پاركتەر مەن سكۆەرلەر تۇرلەندى، جاسىل جەلەك اۋماعى ۇلعايدى، قالانىڭ 130 تاريحي عيماراتى تۇنگە قاراي ارحيتەكتۋرالىق جارىقپەن نۇرلانا ءتۇستى.

قۇرمەتتى الماتىلىقتار، الدىمىزدا كوپتەگەن ىستەر شەشىمىن كۇتۋدە، سىزدەرمەن بىرگە ولاردى جۇزەگە اسىراتىنىمىزعا مەن سەنىمدىمىن، الماتىنىڭ ءار ادام تۇلعا رەتىندە قالىپتاسىپ،ارمانى ورىندالاتىن اسەم قالاعا اينالاتىنى اقيقات. قالاعا جانە سىزدەرگە ارداقتى الماتىلىقتار، ودان ءارى گۇلدەنۋ مەن وركەن جايۋدى شىن جۇرەكتەن تىلەيمىن!»، - دەپ اتاپ ءوتتى باۋىرجان بايبەك.

سالتاناتتى شارا باسرىسىندا «الماتى قالاسىنىڭ قۇرمەتتى ازاماتى» اتاعى قازاقستان تاريحىنداعى العاشقى ايەل- ەلشى اقمارال ارىستانبەكوۆاعا، حالىق ءارتيسى ەسكەندىر حاسانعاليەۆكە، عالىم- ادەبيەتانۋشى سەرىك قيراباەۆقا بەرىلدى.

قالا كۇنى قۇرمەتىنە وراي قر تۇڭعىش پرەزيدەنتىنىڭ ساياباعىندا ەڭ ۇزىن «قۇراق كورپەنىڭ» گينەستىڭ رەكوردتار كىتابىنا ەنۋىنە قاتىستى تۇساۋكەسەر وتۋدە. ۇلتتىق كورپەنىڭ ۇزىندىعى 10900 مەتر، ساياباقتى تۇگەل الىپ جاتىر. ەسكە سالساق، قازاقي كورپەنى جاساۋعا قالانىڭ جانە وڭىرلەردىڭ شەبەرلەرى مول ۇلەس قوستى. قۇراق كورپەنى تىگۋ ناۋرىز مەرەكەسى كەزىندە باستالعان ەدى.

قالا كۇنى مەرەكەسى Almaty Arenaداعى «B-DAY Party» كونتسەرتىمەن جانە «استانا» الاڭىندا تۇنگى ساعات 21:00-دە بولاتىن ساليۋتپەن اياقتالادى.

Abai.kz