جۇما, 29 ناۋرىز 2024
3636 0 پىكىر 19 قىركۇيەك, 2018 ساعات 09:05

تاسس اقش-تىڭ رەسەيدى "ايىپتاعانى" جونىندە جالعان مالىمەت تاراتتى

رەسەيلىك تاسس اگەنتتىگى 17 قىركۇيەكتە اقش-تىڭ بۇۇ-داعى تۇراقتى وكىلى نيككي حەيلي رەسەيدى "كيم چەن ىننىڭ اعاسىنىڭ ولىمىنە قاتىسى بار" دەپ ايىپتادى دەگەن جالعان مالىمەت تاراتتى.

"بۇۇ-نىڭ قاۋىپسىزدىك كەڭەسىنىڭ جيىنىندا نيككي حەيلي كيم چەن نام ولتىرىلگەندە رەسەي سولتۇستىك كورەياعا بيولوگيالىق زات بەرىپ كومەكتەسكەنىن ايتتى",- دەپ جازدى تاسس.

شىن مانىندە حەيلي مۇنداي سوزدەر ايتپاعان. ول سولتۇستىك كورەيا ليدەرى كيم چەن ىننىڭ اعاسى كيم چەن نامنىڭ سولتۇستىككورەيالىق ارنايى قىزمەت تاراپىنان ولتىرىلگەنىن ەسكە سالعان. ونىڭ سوزىنشە، بۇل قىلمىستا VX- جۇيكەنى سالداندىرۋشى ۋلى زات پايدالانىلعان. بىراق رەسەي جونىندە حەيلي "ماسكەۋ اقش-تىڭ پحەنياننىڭ ايىبى جونىندەگى شەشىمىمەن كەلىستى" دەگەن. بۇل جيىندا رەسەيدىڭ پحەنيانعا بيولوگيالىق زات بەرۋى جونىندە ءسوز قوزعالماعان. اقش ەلشىسىنىڭ سوزدەرىن ۆيدەوجازبادان كورۋگە بولادى.

تاسس-تىڭ شىندىققا سايكەس كەلمەيتىن اقپاراتىن رەسەيدىڭ كوپتەگەن باسىلىمدارى كوشىرىپ باستى. ال رەسەيدىڭ ءسىم وكىلى ماريا زاحاروۆا فەيسبۋك ارقىلى مالىمدەمە جاسادى. "كەننەديدىڭ (اقش-تىڭ 35-ءى پرەزيدەنتى) ءولىمىنىڭ قۇپياسىن دا اشۋعا جاقىنداپ قالعان سياقتىمىز", - دەپ جازعان.

اقش باستاماسىمەن شاقىرىلعان بۇۇ قاۋىپسىزدىك كەڭەسىنىڭ وتىرىسىندا حەيلي رەسەيدى سولتۇستىك كورەياعا قارسى حالىقارالىق سانكتسيانى جۇيەلى تۇردە بۇزىپ كەلەدى دەپ ايىپتاعان. اتاپ ايتقاندا، رەسەي مۇناي ونىمدەرىن پحەنيانعا جەتكىزىپ كەلەدى دەگەن. ال بۇۇ-داعى رەسەي وكىلى ۆاسيلي نەبەنزيا ماسكەۋدىڭ سانكتسيانى بۇزىپ وتىرعانىن تەرىسكە شىعاردى.

2017 جىلدىڭ 13 اقپانىندا كيم چەن نام مالايزيا اۋەجايىندا ەكى ايەل جاساعان قاستاندىقتان قازا تاپتى. ولار ۋلانعان ورامالدى نامنىڭ بەتىنە جاپقان. ەكەۋى قىلمىس جاساعاننان كەيىن، جاكارتا، دۋباي، ماسكەۋ جانە ۆلاديۆوستوك اۋەرەيسى ارقىلى پحەنيانعا جەتكەن. وڭتۇستىك كورەيا بيلىگى رەسەي تاراپتان ەكى ايەلدى ۇستاۋىن سۇراعان. بىراق رەسەي بيلىگى مۇنى ورىنداۋدان باس تارتقان. بيىل ناۋرىز ايىندا اقش مەملەكەتتىك دەپارتامەنتى سولتۇستىك كورەياعا قارسى كيم چەن نام ولىمىنە حيميالىق قارۋ قولدانعانى ءۇشىن سانكتسيا ەنگىزگەن.

Abai.kz

0 پىكىر

ۇزدىك ماتەريالدار

العىس ايتۋ كۇنى

العىس ايتۋ كۇنى جانە ونىڭ شىعۋ تاريحى

جومارتبەك نۇرمان 1578
الاشوردا

قوجانوۆ مەجەلەۋ ناۋقانىندا (جالعاسى)

بەيبىت قويشىباەۆ 2280
عيبىرات

قايسار رۋحتى عازيز جان

مۇحتار قۇل-مۇحاممەد 3604