مەملەكەت باسشىسى نۇرسۇلتان ءابىشۇلى نازارباەۆتىڭ قازاقستان حالقىنا جولداعان "بەس الەۋمەتتىك باستاماسى" اياسىندا قولعا الىنعان "7-20-25" مەملەكەتتىك باعدارلاماسى الماتىدا قالاي ءھام قاي دەڭگەيدە ورىندالۋدا؟

جۋىردا رەسمي اقپارات شىقتى. "7-20-25" مەملەكەتتىك باعدارلاماسى بويىنشا تۇرعىن ءۇي الۋعا، دالىرەك ايتساق، باسپانا ءۇشىن قارىز الۋعا ءوتىنىش بەرگەن جۇرتتىڭ قاراسى كوبەيىپتى. رەسپۋبليكا بويىنشا اتالعان باعدارلاماعا قاتىسۋشى الماتىلىقتاردىڭ ۇلەسى 43 پايىزعا جەتكەن ەكەن.

بۇل قر ۇلتتىق بانكىنىڭ رەسمي مالىمەتى. 2018 جىلدىڭ 10 قىركۇيەگىنە دەيىن باعدارلاما اياسىندا باسپانا الۋعا يپوتەكالىق نەسيە سۇراپ رەسپۋبليكا بويىنشا 2 555 ءوتىنىش بەرىلگەن.  ولاردىڭ ىشىندە 1 514 ءوتىنىش ماقۇلدانىپ، 18 ملرد تەڭگە كولەمىندە نەسيە بەرىلگەن.

باعدارلاما ىسكە اسىرىلعان كەزەڭنەن باستاپ "الماتى مەن استانا حالقى بەلسەندىلىك تانىتادى" دەپ بولجانعان بولاتىن. قازىرگى تاڭدا الماتى قالاسىندا 186 ءوتىنىش ماقۇلدانىپ، 3,5 ملرد تەڭگەگە يپوتەكالىق نەسيە بەرىلگەن. ال استانا قالاسى بويىنشا 92 باسپانا قارىزى ماقۇلدانىپ 1,5 ملرد تەڭگەگە يپوتەكالىق نەسيە الۋعا رۇقسات بەرىلگەن.

باعدارلامانىڭ قارجىلىق وپەراتورى "باسپانا" يپوتەكالىق ۇيىمىنىڭ باسشىسى قايرات التىنبەكوۆتىڭ ايتۋىنشا، "7-20-25" قازاقستان ءۇشىن ۇتىمدى.

ايتا كەتەيىك، "باسپانا" يپوتەكالىق ۇيىمىنىڭ نەگىزگى ماقساتى "7-20-25 باعدارلاماسى بويىنشا ءاربىر وتباسىنا تۇرعىن ءۇي ساتىپ الۋدىڭ جاڭا مۇمكىندىكتەرى" باعدارلاماسىندا كوزدەلگەن فۋنكتسيالاردى جۇزەگە اسىرۋ بولىپ تابىلادى.

"باسپانا" يپوتەكالىق ۇيىمى نەمەن اينالىسادى؟ ول:

-يپوتەكالىق قارىز بەرەدى،

-فاكتورينگتىك وپەراتسيالار: تاۋارلاردى (جۇمىستاردى، قىزمەتتەردى) ساتىپ الۋشىدان تولەمسىز تاۋەكەل ەتىپ قابىلداي وتىرىپ، تولەم جۇرگىزۋدى تالاپ ەتۋ قۇقىعىن الادى،(ەكىنشى دەڭگەيدەگى بانكتەردەن يپوتەكالىق تۇرعىن ءۇي قارىزدارى بويىنشا تالاپ ەتۋ قۇقىقتارىن ساتىپ الادى),

-يپوتەكالىق تۇرعىن ءۇي قارىزدارىن ەكىنشى دەڭگەيدەگى بانكتەرگە كەرى قايتا بەرەدى،

-تۇرعىن ءۇي قارىزدارىنىڭ قولجەتىمدىلىگىن ارتتىرۋ باعدارلامالارىن (ونىڭ ىشىندە مەملەكەتتىك باعدارلامالاردى) ازىرلەۋگە، ىسكە اسىرۋعا جانە قارجىلاندىرۋعا قاتىسادى.

Abai.kz