ابدەن توقىراپ، ادام كورگىسىز بەيشارا كۇيگە تۇسكەن ەلدى لي كۋان يۋ 25 جىلدا ەكونوميكاسى دامىعان مىقتى مەملەكەتكە اينالدىرىپتى. 25 جىلدا! جان باسىنا شاققاندا ءىجو 15 ەسە وسكەن – 400 دوللاردان 12,2 مىڭ دوللارعا دەيىن. بۇعان قالاي جەتتى؟

لي كۋن يۋ زاڭدى بارىنشا اشىق، تۇسىنىكتى ەتىپ جازدىرىپ، بيزنەسپەن اينالىسۋعا قولايلى جاعداي جاسايدى. سينگاپۋردا بيلىك باسىنداعى جەمقورلاردى انىقتايتىن ارنايى تاۋەلسىز مەكەمە قۇرىلادى. «ادامنىڭ زاڭنان قاشىپ قۇتىلا المايتىنىن ءبىلۋى – جەمقورلىقتىڭ جولىن كەسەتىن ەڭ تاماشا ءتاسىل!» دەگەن ەكەن ول. سينگاپۋردا جەمقورلىقپەن كۇرەس قوعامنىڭ قۋىس-قۋىسىنا دەيىن كىرىپ كەتىپ، مينيسترلەر مەن شەندىلەرگە دەيىن، ءتىپتى كەيدە پرەمەر-ءمينيستردىڭ تۋىستارىن دا جاۋاپقا تارتىپ جاتتى. سونىڭ ارقاسىندا سينگاپۋر 25 جىلدىڭ ىشىندە وتار ەلدىڭ «شەكپەنىنەن» شىعىپ، الەمدەگى ەڭ ەكونوميكاسى دامىعان مەملەكەتكە اينالىپ شىعا كەلدى.

سينگاپۋر دەگەن ءبىزدىڭ ءبىر وبلىسىمىزعا دا جەتپەيتىن كىشكەنتاي عانا ارال. بۇلاردا ەشقانداي قازبا بايلىعى جوق، سۋدىڭ ءوزىن كورشىلەردەن ساتىپ الادى ەكەن ءالى كۇنگە دەيىن. «سينگاپۋر - كابينەتتەن شىقپاي-اق باسقارا بەرەتىن شاعىن ەل عوي» دەيتىن شىعار بىرەۋلەر.

پرەمەر مينيستر لي كۋان ءيۋدىڭ سول كەزدەگى وكىلەتى ءبىزدىڭ قازىرگى اكىمدەردىڭ وكىلەتىمەن بىردەي-اق بولعان. ءبىزدىڭ اكىمدەر دە ءدال سونداي ءبىر-ءبىر اۋداندى، ءبىر-ءبىر وبلىستى باسقارىپ وتىر قازىر. قانشاما قازبا بايلىعى بولسا دا، بىراق ەشقايسىسىنىڭ سينگاپۋر سياقتى ءوسىپ، وركەندەپ كەتكەنىن كورمەدىك!

جولىمبەت ماكىشتىڭ facebook پاراقشاسىنان

Abai.kz