پىكىرتالاس الاڭى رەتىندە ءوزىن-ءوزى الدەقاشان دالەلدەگەن «ايت پارككە» كەلگەن پرەزيدەنتتىكتەن ۇمىتكەر ءتورت كانديداتتىڭ وكىلدەرى وتكەن اپتادا جۋرناليستەرمەن كەزدەستى. انانى-مىنانى ءسوز قىلدى. قامشى سالدىرماي، قايىرۋ بەرمەي كوسىلگەندەرى دە، جەتەككە جۇرمەي تاقىپتان اۋىتقىپ، اۋاجايىلىپ كەتكەندەرى دە بولدى. بىرسوزبەن ايتقاندا، كانديداتتار قانداي، وكىلدەرى  دە سونداي ەكەنىنە جانە ءبىر مارتە كوز جەتتى. قارادۇرسىن جيىنعا نازار اۋدارۋعا ماجبۇرلەگەن بۇل جولى ىدىس-اياق سىندىرۋعا ۋاقىت تارلىق ەتكەن كانديدات قاسىموۆتىڭ وكىلى بولدى.

پىكىرتالاس الاڭى رەتىندە ءوزىن-ءوزى الدەقاشان دالەلدەگەن «ايت پارككە» كەلگەن پرەزيدەنتتىكتەن ۇمىتكەر ءتورت كانديداتتىڭ وكىلدەرى وتكەن اپتادا جۋرناليستەرمەن كەزدەستى. انانى-مىنانى ءسوز قىلدى. قامشى سالدىرماي، قايىرۋ بەرمەي كوسىلگەندەرى دە، جەتەككە جۇرمەي تاقىپتان اۋىتقىپ، اۋاجايىلىپ كەتكەندەرى دە بولدى. بىرسوزبەن ايتقاندا، كانديداتتار قانداي، وكىلدەرى  دە سونداي ەكەنىنە جانە ءبىر مارتە كوز جەتتى. قارادۇرسىن جيىنعا نازار اۋدارۋعا ماجبۇرلەگەن بۇل جولى ىدىس-اياق سىندىرۋعا ۋاقىت تارلىق ەتكەن كانديدات قاسىموۆتىڭ وكىلى بولدى.

جيىندى جۇرگىزۋشى نۇرلان ەرىمبەتوۆ مىرزانىڭ «بيلبوردتار قانشا تۇرادى؟» دەگەن قاراپايىم عانا ساۋالىنا وتىرىسقا كەشىگىپ كەلىپ، ەنتىگىپ وتىرعان عانەكەڭنىڭ شتابىنىڭ باسشىسى «وتە قىمبات! اقىلعا سىيمايدى» دەپ جاۋاپ بەردى. نۇرلان مىرزا «سوندا قانشا؟» دەپ تاقىمداپ قويماي قويدى. وزگەلەردىڭ نە ايتقانى قازىر ەسىمدە جوق، ال، قاسىموۆتىڭ شتابىنىڭ باسشىسى: «ونى ءدال ايتۋ مۇمكىن ەمەس. بىلمەيمىن. ءتىپتى، وسى ماسەلەگە قىزىققان دا ەمەسپىن. سەبەبى، ورتالىق سايلاۋ كوميسسياسى كانديداتتارعا بەرىلگەن ازعانتاي اقشانىڭ ءوزىن «اناۋ - اندا، مىناۋ - مىندا» دەپ ءبولىپ بەردى. بارلىق كانديداتقا بىردەي سۋمما بەردى. ورتالىق سايلاۋ كوميسسياسى قانشا قارجىنى بيلبوردقا، قانشا قارجىنى قاي تەلەكانالعا، قاي گازەتكە اۋدارۋىمىز قاجەت ەكەنىن جانە تاعى اناۋ-مىناۋ شىعىننىڭ ءبارىن جازىپ-سىزىپ بەردى. ول قارجىدان شتابتارعا تۇك تە تۇسكەن جوق. ءبىز ول قارجىنى جاران-جاعار مايعا، جول شىعىندارىنا تولەي العان جوقپىز. سوندىقتاندا مەن بيلبوردقا قانشا قارجى جۇمساعانىمىزدى قازىر تاپ باسىپ ايتا المايمىن. سەبەبى بۇل ماسەلەمەن بىزدەر اينالىسقان جوقپىز» ،- دەپ قىزدى-قىزدىمەن شىنىن ايتىپ سالدى. مىناداي جاۋاپ ميىن زىرق ەتكىزگەن ەرىمبەتوۆ مىرزا «باسە، وسىناۋ بيلبوردتاردى سىزدەرگە الدەكىمدەر سىيلاي سالعانداي كورىنۋشى ەدى» دەپ قانا ءسوز قوستى.

ەگەر، مەن گۇلدانا نۇرپەيسوۆا حانىمدى دۇرىس تۇسىنسەم، تاققا تالاسقان ءۇش «ۇمىتكەردىڭ» ناسيحاتىن قانداي تەلەكانالدار مەن گازەتتەردىڭ جۇرگىزەتىنى جوعارىدان - ورتالىق سايلاۋ كوميسسياسىنىڭ تاراپىنان بەلگىلەنىپ قويىلعان بولىپ شىقپاي ما؟! ويدا جوقتا ۇيىمداستىرىلعان جارىسقا ويدا جوقتا قوسىلعان كانديداتتاردىڭ سايلاۋالدى ۇگىت جۇمىسىنىڭ بارلىق «تىنىس-تىرشىلىگىن» ورتالىق سايلاۋ كوميسسياسى تىكەلەي قاداعالاپ، باقىلاپ، باعىپ وتىرۋى قولدانىستاعى زاڭدىلىقتى اياق استى ەتىپ، ءۇمىتسىز «ۇمىتكەرلەردى» قولداپ، سولارعا «سەنىپ»، ءبىر اي بويى الاشاپقىن بولعان جۇرتتى قورلاۋ ەمەس پە؟! بيلىك تەندەر دەگەن يتاياقتان سارۋسۋ ىشكىزىپ وتىرعان بۇقارالىق اقپارات قۇرالدارى اتاۋلى تايلى-تۇياعى قالماي «سايلاۋ تا-ما-شا ءوتتى، زاڭ بۇزۋشىلىقتار بولعان جوق» دەپ قاقساپ جاتقان ءادىل دە تازا وتكەن سايلاۋىمىزدىڭ سىيقى وسى بولسا جەتىسكەن ەكەنبىز! دەي كەلىپ ايتارىم، ءدال مۇنداي جاعدايدا 95,5% داۋىس جيناعان «جەڭىمپازدى» كەزەكتى جەڭىسىمەن قۇتتىقتاۋدىڭ ءوزى شاپقا تۇرتكەنمەن بىردەي ارەكەت قوي، جۇرتىم-اۋ.

«قازاقستان» اپتالىعى