جۋىردا kz.expert سايتىندا “كرەمل قازاقستانداعى ورىس ءتىلدى حالىقتى قالاي زومبيعا اينالدىردى؟” دەگەن ماقالا شىقتى.

وندا قازاقستاندى كرەملدىڭ ناسيحاتىنان شىعا الماي وتىرعان مەملەكەت ەكەنى ايتىلعان. اۆتور ماتەريالدا قازاقستان رەسەيمەن ورتاق تاريح بارلىعى، الەمدەگى ەڭ ۇزىن مەملەكەتارالىق شەكارا (7548 كم) وسى ەكى ەل اراسىندا ەكەنى، ساياساتتاعى جۇيە مەن تاجىريبەلەرىنىڭ ۇقساستىعى، تىعىز ەكونوميكالىق بايلانىس جانە تىلدىك فاكتورلار ارقىلى ەتەنە جاقىن ەكەنىن اتاپ وتكەن.

سونداي-اق، 2009 جىلعى ساناق بويىنشا رەسپۋبليكا ازاماتتارىنىڭ 84,8 پروتسەنتى ءوز تەگىن ورىس تىلىندە جازعانىن مىسالعا كەلتىرىپتى.

قوش! 2009 جىلى قازاقستاننىڭ سول كەزدەگى پرەمەر-ءمينيسترى كارىم ءماسىموۆ “ەلەكتروندى ۇكىمەت باستامالارى - 2009” اتتى كونفەرەنتسيادا سويلەگەن سوزىندە: “الەۋمەتتىك ساۋالناما زەرتتەۋلەرىنە قاراساڭىز، حالىقتىڭ 55% ى رەسەيدە ەمەس، رەسەيلىك اقپاراتتىق كەڭىستىكتە تۇرادى” دەگەن مالىمدەمە جاساعان بولاتىن. سودان بەرى، تۇك وزگەرگەن جوق. ءبىز ءالى كرەملدىڭ يدەولوگياسىنان ازات بولار وڭتايلى جولدى تاپقان جوقپىز.

2017 جىلدىڭ قاراشا ايىندا اقپارات جانە كوممۋنيكاتسيا مينيسترلىگى  1,5 ملن.عا جۋىق ادام قازاقستاندىق اقپارات سالاسىنان تىس ەكەنىن مالىمدەگەن ەدى. قۇدايعا شۇكىر، اتالعان مينيسترلىك قازىر قولدان كەلگەن بارلىق مۇمكىندىكتى جاساپ باعۋدا. قازىر حالىقتىڭ قازاقستاندىق اقپاراتتى تۇتىنا باستاعانى، الەۋمەتتىك جەلىلەردە قازاقتىلدى اۋديتوريانىڭ باسىمدىق العانى سوڭعى جىلدارى انىق سەزىلە باستادى. سوندا دا، بۇل ماسەلەدە بەلبەۋدى بوساتىپ قويۋعا بولمايدى.

الەۋمەتتانۋشىلاردىڭ “سوتسوپروس” اتتى زەرتتەۋ ناتيجەسىنە سەنسەك، ورىس تىلىندە سويلەيتىن قازاقستاندىقتاردىڭ 69% -ى رەسەيدىڭ جاڭالىقتارى مەن ويىن-ساۋىق باعدارلامالارىن كورەدى ەكەن. جانە ولار  رەسەيلىك باق-تارعا كوبىرەك سەنىم ارتاتىن كورىنەدى.

ال، اقپارات جانە كوممۋنيكاتسيالار مينيسترلىگىنىڭ  مالىمەتىنە سۇيەنسەك، ەلىمىزدە قازاق ءتىلدى باسىلىمداردىڭ سانى – 519 بولسا، 802 باسىلىم ورىس تىلىندە تارالادى. ال، قازاق جانە ورىس تىلدەرىندە 992 باق شىعادى ەكەن. وسى كورسەتكىش بىرتە-بىرتە وزگەرۋى ءۇشىن مەملەكەت تاراپىنان ۇلكەن ىستەر قولعا الىنىپ، قازاق حالقىنىڭ اقپاراتتىق قاۋىپسىزدىگىن قامتاماسىز ەتۋ ءىسى قارقىن الۋى كەرەك.

ەلىمىزدەگى رەسەي اقپاراتىنىڭ كۇشى 2014 جىلى بولعان ۋكرايناداعى وقيعالار كەزىندە انىق بايقالدى. سول كەزدە تاۋەلسىز جۋرناليستەر قازاقستاندىقتاردىڭ كوبى ءپۋتينشىل ونىمدەردى تۇتىنۋعا ءماجبۇر ەكەنىن ايتقان...

قازىر ەلىمىزدە گازەتكە جازىلۋ ناۋقانى ءجۇرىپ جاتىر. ءيا، گازەتتەردىڭ بۇگىنگى احۋالى كەرەمەت دەي المايمىز. بىراق، رەسەي اقپارات قۇرالدارىنىڭ ىقپالىن ىعىستىرۋ ءۇشىن دە ۇلتتىق باسىلىمدارعا قولداۋ قاجەت ەكەنىن، قازاق ءتىلى مەن ۇلتىنىڭ مۇددەسى ءۇشىن جەمە-جەمگە كەلگەندە قازاق ءباسپاسوزى عانا ءۇن قاتاتىنىن ەسكەرتە كەتۋ - بىزگە پارىز.

نۇربيكە بەكسۇلتانقىزى

Abai.kz