ءبىزدىڭ ەلدە بولىپ جاتقان نارسەلەر ساناسى اۋرۋ ادامنىڭ ادەتتەرىن ەسكە تۇسىرەدى
ىستەيتىن تىرلىگى جوق ەرىككەن #قايعىپات ەمەسپىن. پافوس نارسەلەردى پافوس دەپ ايتۋدىڭ ءوزى پافوس بولعان تىم بەيتاراپ كوڭىلگە وتىرىپ الدىق قوي.
بىراق، ءدال قازىرگى ساتتە ءبىزدىڭ ەلدە بولىپ جاتقان نارسەلەر ساناسى اۋرۋعا ۇشىراعان ادامنىڭ ادەتتەرىن ەسكە تۇسىرەدى. ومار جالەل اعامىز ءبىر سۇحباتىندا ء"بىز ءالى ءوز-وزىمىزگە دياگنوز قويا الماي جۇرگەن حالىقپىز" دەپ ەدى. راس قوي. اۋەلى دياگنوزىن قويىپ الىپ، ودان كەيىن بارىپ ءدارىسىن ىشپەك كەرەك. رۋحاني جاڭعىرۋ دەپ اتالاتىن جاقسى ءدارىنىڭ دياگنوزسىز ىشىلگەندەگى كەرى ەففەكت بەرىپ جاتقانى ما ەكەن الدە؟!
كومسومولدىڭ مەرەكەلەرى رۋحاني جاڭعىرۋ اياسىندا ءوتىپ جاتقان سوڭ، باسقاسىنان نە سۇرايسىڭ؟ كىمگە بارىپ، كىمگە ايتامىز؟! پرەزيدەنتتىڭ ءوزى كوممۋنيزمدى راديكالدى يدەولوگيا دەپ ايتپاعان با ەدى؟!
ەندەشە، بۇل قايدان شىققان "كومسومولدىڭ تويى"? قانشاما قۇرباندارىمىزدىڭ جايىن بىلەتىن ءاربىر ازامات ىشىندە بۇل نارسەلەرگە قارسىلىق بولۋى كەرەك. ءۇنسىز قارسىلىق ەمەس، ارەكەتپەن ەڭ بولماسا سوزبەن قارسىلىق بولۋى كەرەك.
ەندى عانا ەڭسەنى كوتەرگەن كەزدە، ولگەن ەستەلىكتەر ولگەلى جاتقان "كوكەلەردىڭ" ساناسىن وياتىپ جاتىر ەكەن. 27 جىل تاۋەلسىزدىكتەن سوڭ، كوز اشىلدى ما دەگەندە قايتادان كەرى قايتىپ جاتساق، سونشاما جىل ىستەپ جۇرگەن تىرلىكتەرىمىز نە ءۇشىن جاسالدى سوندا؟!
ونسىز دا، ءالى جويىلا قويماعان ول سانا ءوز قازاقتارىمىزدىڭ اراسىندا بەرلين قابىرعاسىن تۇرعىزىپ تاستادى. ونىڭ دا استارىن اشىپ قاراساڭىز، كەڭەس ۇكىمەتىن اڭساپ جۇرگەن تالاي قازاقتى كورەسىز.
وتكەننەن بەرى جەلىدە كوپتەگەن قارسىلىق جاريالانىپ جاتىر. سوندىقتان، وسى ەلدىڭ ازاماتى رەتىندە قارسىلىققا قوسىلامىز.
"ەلدە بۇدان باسقا پروبلەمامىز جوق پااا؟" دەيتىندەر بار وسى ارادا. ەلدە بۇدان باسقا پروبلەمالار بار، بولعاندا قانداي؟! بىراق، مىنادان اساتىن سۇمپايى پروبلەما جوق قازىر!
ەشتەڭە ۇمىتىلمايدى. ەشتەڭەنى ۇمىتپايمىز!
سادىق شەرىمبەكتىڭ facebook پاراقشاسىنان
Abai.kz
