سەنبى, 8 تامىز 2020
COVID-19 قازاقستاندا. جۇقتىرعاندار — 96922. جازىلعاندار — 70680. قايتىس بولعاندار — 1058
كۇبىرتكە 3151 1 پىكىر 9 قاراشا, 2018 ساعات 09:09

ازعىندىقتىڭ التى تەرەزەسى

شىنىڭىزدى ايتىڭىزشى، ءسىز نەنى ەلەستەتتىڭىز؟ ۇيىڭىزدە جالتىراپ تۇرعان پلاستيكالىق تەرەزەنى مە؟ جو-جوق، ءبىز باسقاشا، ءسال قورقىنىشتى وۆەرتون تەرەزەسى تۋرالى  ايتپاقپىز. دۇنيەدەگى ەڭ سوراقى، تۇرپايى دەگەن ۇعىمداردى ءبىراز ۋاقىت وتكەن سوڭ جاقتاپ شىعۋعا بولادى ەكەن. بۇل تەوريانىڭ تۇساۋىن امەريكالىق الەۋمەتتانۋشى دجوزەف مىرزا 1990 جىلى كەسىپ بەرىپتى.

ءسوزدىڭ قىسقاسى، ازعىندىقتى اقتاپ الۋ ءۇشىن وۆەرتوننىڭ التى تەرەزەسىنەن ءوتۋىڭىز كەرەك.

ءبىرىنشى تەرەزە – «اقىلعا قونىمسىز» كەزەڭ

قازىرگى دامىعان دا، دامۋشى دا مەملەكەتتەردىڭ الەۋمەتتىك پروبلەماسىنىڭ ءبىر تۇمسىعى ترانسسەكسۋاليزمگە تىرەلىپ تۇر. بىراق، ولاردىڭ ەشقايسىسى «جىنىسىن اۋىستىرعانداردى» وپ-وڭاي قابىلداي العان جوق. بۇل قۇبىلىستى پسيحيكالىق اۋىتقۋ، اۋرۋ دەپ باعالاپ، ول جايىندا مۇلدە جاق اشپاۋعا تىرىستى. ءوزىنىڭ تابيعي جىنىسىنان باس تارتۋ جىندىنىڭ ساندىراعى سياقتى كورىندى. ولاردى قوعامنان الاستاتتى، اتا-اناسى باس تارتتى. سوندىقتان، بۇل كەزەڭدەگى ازعىندىقتىڭ ۇلەسى  0%-دى عانا قۇرادى.

ەكىنشى تەرەزە – «راديكالدى» كەزەڭ

سولايشا ەركەكتەن ايەلگە، ايەلدەن ەركەككە اينالعىسى كەلەتىندەر بۇل تۇستا اشىق شابۋىلعا شىعا باستايدى. وزدەرىنىڭ وزگەلەرمەن تەڭ قۇقىلى بولا الاتىنىن، ولاردى كەمسىتپەۋ، شەتتەتپەۋ كەرەكتىگىن العا تارتىپ، الاڭداردا اتتان سالادى. قوعام نازارىن وسىنداي جولمەن اۋدارىپ، ترانسەكسۋالدار تاريحىن قۇلاقتارعا تىقپالايدى. سول كەزدە سوتسيۋمدا «وكازىۆاەتسيا، ەڭ العاشقى جىنىسىن اۋىستىرعان ادام دانيالىق سۋرەتشى ەكەن. ول جايلى فيلم دە ءتۇسىرىلىپتى»، «بىلەسىڭ بە، كيم كارداشياننىڭ وگەي اكەسى 66 جاسىندا ايەلگە اينالىپتى» دەگەن اڭگىمەلەر جاڭبىردان كەيىنگى ساڭىراۋقۇلاقتاي قاپتاي تۇسەدى. وعان قاتىستى ارنايى پسيحولوگتار مەن مەديتسينا ماماندارىنىڭ دا پىكىرلەرى قۇلاققا شالىنادى. بۇرىن ول تاقىرىپتى جيىركەنىشتى سانايتىن حالىق ەندى وعان قىزىعا باستايدى. جايلاپ-جايلاپ ولار جاڭالىقتاردان جىلتىڭداپ كورىنىپ، سايتتاردا سايران ساپ جۇرەدى. ءسويتىپ سەنساتسيا قۋعان تەلەباعدارلامالاردان دا بوي كورسەتەدى. سونان سوڭ ەل ىشىندە «ماسقارا، «ايەل باقىتىنا» ترانسۆەستيت كەلىپتى»، «استانادا ءبىر ترانسەكسۋال قىز پوليتسياعا ءتۇسىپ قالىپتى، كتك-دان كورسەتتى» دەگەن اڭگىمەلەر جايىلىپ، «شوك! جاعا ۇستاتتى! «ءوز ويىم» باعدارلاماسىندا جىنىسىن اۋىستىرعان گايانە اتتى جىگىت وتىر» دەگەن فرازالار فەيسبۋكتا جارىسا جازىلىپ جاتادى. جۇرت ولاردى جەك كورسە دە، قاراپ، تىجىرىنسا دا تىڭداپ وتىرادى. ازعىندىقتىڭ اتى جايىلۋ ءۇشىن ونى ۇزدىكسىز ايتىپ وتىرسا جەتكىلىكتى. ەڭ باستىسى، بۇرىن اقىلعا قونىمسىز بولعان ول ەكىنشى تەرەزەدەن دە وسىلاي وپ-وڭاي ءوتىپ كەتەدى. ۇلەس سالماعى 10% !

                  

ءۇشىنشى تەرەزە – ازعىندىقتى تۇسىنۋگە ۇمتىلدىرۋشى كەزەڭ

سول باعدارلامالارعا كەلگەن ترانسسەكسۋالدار ءوزىنىڭ باقىتسىز بالالىق شاعى، ەرەسەكتەردىڭ جاساعان زورلىعى، اينالاسىنداعى قيىندىقتار تۋرالى ايانىشتى اڭگىمەلەرىن ءۇزىپ-ءۇزىپ ايتىپ بەرەدى. ءسوز اراسىندا «كىشكەنتاي كەزىمدە ءوزىمنىڭ باسقاشا ەكەنىمدى سەزىنە باستادىم. قاتتى قينالدىم. الەمدە جالعىز قالعانداي بولدىم. ءوز-وزىمە قول جۇمساعىم كەلدى. مەن دە وسىنداي بولام دەپ ويلاعام جوق. تاعدىر شىعار. ماڭدايىما جازىلسا، قايتەم؟!» دەپ كوز جاستارىن ءبىر سىعىپ الادى. سودان كەيىنگىسىن «مەن سياقتى ءوزىن جالعىز سەزىنەتىندەر كوپ. ءبىز دە ادامبىز عوي، ءبىزدىڭ دە ءومىر سۇرۋگە قۇقىمىز بار» دەپ تۇيىندەيدى نەمەسە «نە ىستەسەم دە، ءوزىم بىلەم! ماعان جۇرتتىڭ پىكىرى ماڭىزدى ەمەس! اقىل ايتپاڭدار» دەپ اگرەسسياسىن كورسەتەدى. ونى كورگەن ادامداردىڭ پىكىرى ەكىگە جارىلادى.

ءبىرى: «بۇلاردى قۇرتۋ كەرەك! ولار قوعامدى، ۇرپاقتىڭ ساناسىن ۋلايدى»، «مولداعا كورسەتىپ، جىنىن قاعىپ السا عوي»، «مۇندايلاردى ناسيحاتتايتىن ارنالاردى توقتاتپاسا، ازعىندىقتىڭ اتى شىعا بەرەدى!» دەسە، ەكىنشىسى:

«ولاردى دا تۇسىنەيىك! بالا كەزىندە زورلىق كورگەن سوڭ، وسىنداي بولعان عوي»، «بۇلاردى ەمەس، كىشكەنتايلاردىڭ تاعدىرىن ويراندايتىن پەدوفيلدەردى جازالاۋ كەرەك!»، «شىنىمەن، اركىم قالاي قالاسا، سولاي ءومىر سۇرەدى»، «ادام ولتىرمەسە بولدى، جۇرە بەرسىن» دەگەن ادۆوكاتتىق اقتاۋ سوزدەر ايتادى. وپپا! جاساسىن، تۇسىنىستىك! ەندى ولاردى جازعىراتىندار ازايىپ، جاقتايتىندار ارتتى.  جەتىستىك–20% !

 

ءتورتىنشى تەرەزە – اقىلعا قونىمدى كەزەڭ

بۇل كەزەڭدە ازعىندىق تولىعىمەن اقتالىپ شىعادى. ولاردى قولدايتىندار سانى كۇننەن كۇنگە ارتادى.

«ءار تاۋەلسىز ادام ءوز تاعدىرىن ءوزى شەشەدى»

«ەۋروپادا لگبت-لار (لەسبي، گەي، بيسەكسۋال، ترانس) ەركىن ءومىر سۇرەدى  عوي. ولاردىڭ قۇقىعىن زاڭ دا قورعايدى»

«كىم قالاي ءومىر سۇرسە دە ءوزى بىلەدى. ءبىرۋدى ايىپتايتىنداي، كىنا تاعاتىنداي ءبىز كىمبىز؟» ءتارىزدى پىكىردى ەكىنىڭ ءبىرى ايتىپ جۇرەدى. ال وعان ءالى دە تۇبەگەيلى قارسى ادامدار ارتتا قالعان، تىم «ستارومودنىي» سانالادى. بۇرىن قوعامنان تەك مازاق پەن اگرەسسيا كورەتىن ترانسسەكسۋالدار ەندى ەمىن-ەركىن ءجۇرىپ تۇراتىن بولادى. ويتكەنى، ولارعا باعدارشامنىڭ جاسىل ءتۇسى جانىپ تۇر. ازعىندىقتىڭ داۋرەنى وسىلاي سالتانات قۇرا باستايدى. قورجىندا 30% !

 

بەسىنشى تەرەزە – ازعىندىقتى تانىمال ەتۋ

سونىمەن نە دەسەڭ دە، تراسسەكسۋالداردىڭ ايى وڭىنان تۋىپ تۇرادى. بىراق، قوعام ايدالاداعى بەرىك پەن سەرىكتىڭ جىنىسىن اۋىستىرعانىن نە قىلسىن؟! ولاردىڭ نازارىن اۋدارۋ ءۇشىن تانىمالدىق كەرەك. جايلاپ ەل سۇيەتىن جۇلدىزدار، سپورتشىلار،  ارتىستەر كامينگ-اۋت جاساي باستايدى (ءوزىنىڭ جىنىسىن اۋىستىرۋ تۋرالى اشىق ايتادى). ولاردىڭ جاي ءومىرىنىڭ ءوزىن كۇندە تالقىلاپ جاتاتىن جۇرت ودان سايىن قىزىعا تۇسەدى. ترانسسەكسۋالدار جايىندا ايتۋ موداعا اينالادى. ودان كەيىن،

«بىلەسىڭ بە، ەۋروپانىڭ ەڭ تانىمال مودەلدەرى جىنىسىن اۋىستىرعاندار ەكەن»

«ونى قويشى، «ماتريتسا»دەگەن فيلم بار ەدى عوي. سونىڭ ستسەناريستەرى، اپالى-ءسىڭىلى ۆاچوۆسكيلەر بۇرىن ەركەك بولىپتى عوي»

«تايلاندتا تراسسەكسۋالدار اراسىندا سۇلۋلىق بايقاۋى وتەدى ەكەن» دەگەن اڭگىمە ايتىلسا، ەشكىم تاڭعالمايتىن بولادى. الەمنىڭ ەڭ تانىمال ادامدارى وپ-وڭاي ەركەكتەن ايەلگە، ايەلدەن ەركەككە اۋىسىپ جاتقاندا، سەرىك پەن بەرىكتىڭ بويجەتكەن بولعىسى كەلەتىنى كىمدى تاڭىرقاتسىن.

سولايشا، تراسسەكسۋالدىق تورگە شىعادى. ولارعا جۇرت قىزىعا قارايتىن جاعدايعا جەتەدى. سارى باسىلىمدار مەن شوۋ باعدارلامالاردىڭ «جۇلدىزدى» قوناقتارى دا سولار بولادى. جەتىستىكتىڭ ۇلەسى–50%. مىنە، كورسەتكىشتىڭ كوكەسى!

 

التىنشى تەرەزە – ازعىندىق ساياساتتا!

ابدەن تانىلىپ العان ولار وزدەرى سياقتى «جالعىزسىراپ» جۇرگەندەردى قورعاۋ ءۇشىن ساياسي بيلىككە ۇمتىلا باستايدى. وزدەرى كورگەن ازاپتى كەيىنگى «ءىزباسارلارى» كورمەۋ ءۇشىن ولار بارىن سالىپ باعادى. ترانسسەكسۋالداردىڭ قۇقىعىن قورعاۋ، ولاردى سايلاۋعا قاتىستىرۋ، جىنىسىن اۋىستىرعىسى كەلەتىندەرگە قولداۋ كورسەتۋ سياقتى «ماڭىزدى» ماسەلەلەر ەندى مىنبەلەردە ايتىلىپ، كونفەرەنتسيالاردا تالقىلانادى. ودان كەيىن «ءوزىن باسقاشا سەزىنەتىن»، «ەركەك بولۋعا اتا-اناسى قارسى»، «ءوزىنىڭ جىنىسىن جەك كورەتىندەر» كۇرت كوبەيە باستايدى. ەگەر ارىز-تىلەكتەرى ورىندالماي جاتسا، امەريكاداعى لگبت-لاردىڭ قۇقىعىن قورعايتىن ۇيىمدارعا شاعىمدانادى. مىنە، وسى تۇستا وۆەرتوننىڭ التىنشى تەرەزەسى ايقارا اشىلادى دا، ازعىندىقتىڭ اتى اسپاندايدى. ودان كەيىنگى كورسەتكىشتىڭ قالاي شارىقتايتىنىن ايتۋدىڭ ءوزى قورقىنىشتى. بۇرىن ولاردىڭ اتىن ەستىسە تىجىرىناتىن جۇرت ەندى كوشەدە كەزدەسكەن جاۋىرىندى بويجەتكەن مەن بيازى بوزبالا كورسە، تاڭعالمايتىن بوپ الادى.

P.S. قازاق بۇرىن جاماناتتى ايتسا، كوبەيەدى دەپ، ازعىندىقتى اۋىزعا المايتىن بولعان. ال قازىر ايتساڭ دا، ايتپاساڭ دا ارامىزدا ترانسسەكسۋالداردىڭ بارى راس. وۆەرتوننىڭ التى تەرەزەسىن اشپاساق تا، تورتىنشىسىنەن سىعالاپ تۇرۋعا شامامىز جەتىپ تۇر. 2009 جىلدان بەرى ەلىمىزدە جيىرمادان اسا قىز-جىگىت جىنىسىن اۋىستىرعان.  ولاردىڭ ىشىندە ينتيمدىك قىزمەت كورسەتىپ، پايدا تاۋىپ جۇرگەندەرى دە جوق ەمەس. «اۋرۋىن جاسىرعان ولەدى». باقىتىمىزعا قاراي ازعىندىق تانىمال بولاتىن، ول ساياساتقا ارالاساتىن كەزەڭ ەلىمىزگە كەلە قويعان جوق. سول تەرەزەلەردى ەشكىم تىقىلداتىپ قاقپاۋ ءۇشىن نە ىستەيمىز؟! ەندىگى ساۋال وسى بولسا كەرەك!

اسەم قۇلمانوۆا

Abai.kz

1 پىكىر