قازاقستان رەسپۋبليكاسى

پارلامەنتى سەناتى دەپۋتاتتارىنا!

قۇرمەتتى حالىق قالاۋلىلارى!

وسى حاتتى ءوز اتىمنان جانە بۇكىل جەلتوقساندىقتار اتىنان سىزدەرگە جولداپ وتىرمىن.

الەمدە 200-دەن استام تاۋەلسىز مەملەكەت بولسا، سولاردىڭ ءار قايسىسىنىڭ تاريحي وتپەلى كەزەڭى بار. سونىڭ ىشىندە ءبىزدىڭ حالقىمىزعا، قازاق حالقىنا دا ەگەمەندىككە قول جەتكىزۋ وڭايعا تۇسكەن جوق. قازاق دالاسىندا 300-دەن استام ۇلكەندى-كىشىلى كوتەرەلىس پەن باس كوتەرۋلەر بولعان. سونىڭ بارلىعىنا دەرلىك نۇكتە قويعان - الماتىداعى، 1986 جىلى بولعان جەلتوقسان كوتەرىلىسى.

سودان بەرى ەلباسىمىز ايتقانداي:«الماتى – تاۋەلسىزدىكتىڭ التىن بەسىگىنە» اينالدى. بۇعان ەشكىم داۋ ايتا الماس دەپ ويلايمىز.

كەڭەس وكىمەتى تۇسىندا بيلىككە قارسى كەلۋ تۇگىلى، قارسى سويلەۋگە ەشكىمنىڭ ءداتى شىدامايتىن. سول بۇعاۋدان بوساۋ ءۇشىن، ەلىمىزدى بوداندىقتان قۇتقارۋ ءۇشىن قازاقتىڭ قارشاداي ۇل-قىزدارى باسىن بايگەگە تىكتى. قانشا بوزداق قىرشىن كەتتى. بۇعان تاريح كۋا، ءسىز بەن ءبىز كۋامىز.

قايرات، ءلاززات، ەربول، سابيرا، ت.ب. قاتارلى قانشاما بەيكۇنا جاس تەمىر تورعا قامالىپ، قانشاسى مۇگەدەك بولدى. كەيبىر ۇل-قىزدارىمىز ءومىر بويى اتا-انا بولۋ باقىتىنان ايىرىلدى. ءيا، بۇل وسىنداي قيىنشىلىقپەن كەلگەن تاۋەلسىزدىڭ ەدى.

كەرەك دەسەڭىز، جەلتوقسان كوتەرىلىسى بىزگە عانا ەمەس، كەشەگى كەڭەس وداعى مەملەكەتتەرىنە دە ەگەمەندىك الىپ بەردى!

ايتپاعىم، جەلتوقسان كوتەرىلىسىنە دە 30 جىلدان اسىپ كەتتى. بىراق ءالى كۇنگە ءوزىنىڭ تاريحي جانە ساياسي باعاسىن (ستاتۋس) العان جوق. تاريحي وقيعالاردىڭ اراعا ۋاقىت تاستاپ بارىپ ءوز باعاسىن الىپ جاتاتىنى بار. الايدا، قانمەن كەلگەن تاۋەلسىزدىكتىڭ ەشتەڭەگە تاۋەلدى بولماي، شىندىقتىڭ سالتانات قۇرعانىن قالايمىز.

2016 جىلى استانا قالاسىندا جەلتوقساننىڭ 30 جىلدىعىنا ارنالعان حالىقارالىق عىلىمي كونفەرەنتسيادا وتكەن ەدى. سوندا ونشاقتى مەملەكەتتەن عالىمدار مەن ساياساتكەرلەر كەلدى. سول باسقا ەلدەن كەلگەن كىسىلەر ءبىر اۋىزدان جەلتوقساندى «كوتەرىلىس» دەپ مويىندادى. سوندا بۇكىل الەم باعاسىن بەرىپ وتىرعان جەلتوقساننىڭ باعاسىن نەگە ءبىزدىڭ مەملەكەت بەرمەيدى، مويىندامايدى.

قۇرمەتتى حالىق قالاۋلىلارى!

سىزدەردىڭ ۇلتجاندىلىقتارىڭىز بەن ادامي قاسيەتتەرىڭىزگە سەنە وتىرىپ جەلتوقساننىڭ تاريحي جانە ساياسي باعاسىن (ستاتۋس) بەرۋگە ات سالىسادى دەپ سەنىم ارتامىز!

قۇدايشۇكىر راحماتۋللاۇلى ابدۋللاەۆ

Abai.kz