مەملەكەتىمىز ەگەمەندىگىن الىپ، ەڭسەسىن تىكتەگەلى شەت ەلدەردەگى وتانداستارىمىز اتاجۇرتىن اڭساپ، تۋعان ەلگە، اتامەكەنگە جەتۋدى اڭسايدى. وتكەنىمىزدى تۇگەندەپ، ءبىر-ءبىرىمىزدىڭ تۋىس، باۋىر ەكەنىمىزدى ۇمىتپاي دوستىق، تاتۋلىقتى بولاشاق ۇرپاققا ونەگە ەتۋ بۇگىنگىنىڭ پارىزى.

وسىعان وراي مەملەكەت باسشىسى نۇرسۇلتان نازارباەۆتىڭ «بولاشاققا باعدار: رۋحاني جاڭعىرۋ» اتتى باعدارلامالىق ماقالاسىندا ايتىلعان مىندەتتەردى جۇزەگە اسىرۋ اياسىندا «وتانداستار قورى» ۇيىمىنىڭ تۇركىستان وبلىسىندا «تۋعان جەرگە تاعزىم» ءىس-شاراسى وتكىزىلمەك. بۇگىن اتالعان شاراعا شەكارا اسىپ كەلگەن قوناقتار اۋدانىمىزعا ارنايى كەلىپ، بابتاردىڭ بابى – ارىستانباب بابامىزدىڭ كەسەنەسىنە زيارات ەتتى.

ەل اراسىندا «ارىستان بابقا تۇنە، قوجا احمەتتەن تىلە» دەگەن ۇلاعاتتى ءسوز بار. ارىستانباب بابامىز مۇسىلمان ءدىنىن تاراتۋشى قوجا احمەت ءياساۋيدىڭ ۇستازى بولعان. اتا-بابامىزدان قالعان وسىناۋ قاعيدانى بۇزباي ارىستانباب جاتقان كيەلى مەكەنگە كەلگەن مەيمانداردى اۋدان اكىم ەرلان ايتاحانوۆ كۇتىپ الىپ، قازاق وركەنيەتىنىڭ التىن دىڭگەگىنە اينالعان وتىراردىڭ تەرەڭ تاريحىن كەڭىنەن اڭگىمەلەپ بەردى.

ارىستان بابا كەسەنەسىنە بارىپ بابا رۋحىنا تاعزىم ەتكەن قوناقتار ەلدىڭ بىرلىگىن، حالىقتىڭ اماندىعىن تىلەپ، قۇران وقىدى. مۇنان سوڭ انگليا، ۆەنگريا، فرانتسيا، مونعوليا، قىتاي، رەسەي، قىرعىستان، وزبەكستان، تۇركىمەنستان جانە تاعى دا باسقا ەلدەردەن ات ارىلتىپ كەلگەن وتانداستارىمىز «فاراب» ءدامحاناسىندا وتىراردىڭ ءدامى ءتىل ۇيىرەتىن قاۋىن قاعى مەن قاۋىنقۇرتىنان، شۇباتى مەن تارى-تالقانىنان، قۇرتى پەن سارى ماي سەكىلدى تابيعي ونىمدەردەن ءدام تاتتى. داستارحان باسىندا اۋدان ونەرپازدارى ءداستۇرلى اندەردى ناقىشىنا كەلتىرە ورىنداپ، ءاننىڭ قۇدىرەتىمەن كوڭىل-كۇيلەرى كوتەرىلىپ بيلەپ تە الدى.

قانداس باۋىرلارعا شىنايى تىلەگىن ايتقان اۋدان باسشىسى قاي ەلدە جۇرسە دە قازاق تاريحىن ۇمىتپاي، ونى وسكەلەڭ ۇرپاقتىڭ ساناسىنا ءسىڭىرىپ، تۋعان جەرىمىزدىڭ دامۋى جولىندا ايانباي ەڭبەك ەتۋگە شاقىردى. مەيمانداردىڭ ارقايسىسىنا جەرلەسىمىز، الەم اقىنى مۇحتار شاحانوۆتىڭ جىر جيناقتارى شىققان كىتاپ پەن جەرگىلىكتى قولونەر شەبەرلەرى جاساعان بۇيىمداردى تارتۋ ەتتى.

اۋدان اكىمىنىڭ قازاق حالقىنا ءتان مىنەزبەن قوناقجايلىلىق تانىتىپ، دارحان دالامىزدىڭ كەڭدىگىندەي پەيىلىن كورسەتكەنىنە شىنايى ريزاشىلىقتارىن ايتقان قوناقتار تۇركى دۇنيەسىنىڭ رۋحاني استاناسى تۇركىستان قالاسىنا اتتانىپ كەتتى.