ساقتىقتا قورلىق جوق
رەسەيدە "كازاكتاردىڭ ورتاق بىرىككەن وداعى" قۇرىلدى. ونىڭ باسشىسىن پۋتين تىكەلەي تاعايىندايتىن بولادى. بىرىككەن كازاكتار وداعىندا 200 مىڭ كازاك اسكەرى بولاتىنى ايتىلۋدا. بۇل ۇيىمنىڭ ماقساتى ءبىرتۇتاس رەسەيدى ساقتاۋ جانە وزگە مەملەكەتتەردەگى كازاك ۇيىمدارىمەن قاتىناستى نىعايتۋ بولماق. بۇل وتە قاۋىپتى تەندەنتسيا دەگەن ءسوز.
كازاك اسكەرلەرى قاشاندا رەسەيدىڭ ايتقانىن ورىنداعان. پاتشالىق رەسەيگە، كەيىننەن كسرو-عا، ودان كەيىن رەسەي فەدەراتسياسىنا قىزمەت ەتكەن. رەسەي تەرريتورياسىنىڭ وسىنشالىقتى كەڭدىگى - كازاك اسكەرلەرىنىڭ وزگە حالىقتارعا اياۋسىز شاپقىنشىلىقتارىنىڭ ارقاسى. قازاقتىڭ جەرىن وتارلاۋداعى باستى كۇش، ارتىنشا جازالاۋشى اسكەري جاساقتارى دا وسىلار ەدى. جۇزدەگەن مىڭ قازاقتىڭ قازاسىن تاعى قوسىڭىز. اتامان اننەنكوۆتىڭ ءبىر اسكەرى جەتىسۋ مەن شىعىستى قان قاقساتقانى تاعى بار. ءتىپتى 90-جىلدارى ءتۇرلى كازاك ۇيىمدارى ەلىمىزدىڭ باتىسى مەن شىعىسىندا باس كوتەرىپ، سەپاراتيزم ءدانىن سەپپەك بولدى. بۇنىڭ ءبارى ءبىزدى اتالمىش جاعدايدى مۇقيات نازارعا الۋعا يتەرمەلەۋى ءتيىس.
ۋكراينانىڭ شىعىسىندا كازاك جاساقتارىنىڭ سوعىسىپ جاتقانى جاسىرىن ەمەس. ءتىپتى سيريادا دا بار دەگەن اقپاراتتار جەلدەي ەسىپ ءجۇر. شىن مانىندە مۇنداي وداقتارعا رەسەي قانداي بۇيرىق بەرسە دە، قايدا بار دەسە دە ورىندايتىنى انىق. وسىنى قاپەرگە الۋ كەرەك.
وسى رەتتە ءبىزدىڭ قۇقىق قورعاۋ ورگاندارى، ۇقك، بارلاۋ قىزمەتتەرى اسا ساق بولادى دەپ سەنەمىن. سەنىم ارتامىن. كەز كەلگەن ۇلتتىڭ بەيبىت ءومىر سۇرۋىنە قۇداي دا، زاڭ دا رۇقسات بەرگەن. الايدا ۇلتتاردىڭ مەملەكەتتىك قۇرىلىمدى، تىنىشتىقتى، اۋماقتىق تۇتاستىقتى بۇزۋعا باعىتتالعان وداق قۇرۋىنا قاتاڭ تىيىم سالىنعان.
"ساقتىقتا قورلىق جوق" دەپ بارلىق بىرلەستىكتەردى تەكسەرىپ، قارۋدىڭ بار-جوعىن انىقتاپ، يدەولوگياسى مەن ماقساتىن بىلگەن ابزال.
ءبىزدىڭ قورعانىس سالاسى كەز كەلگەن كريزيستىك جاعدايعا دايىن دەپ ويلايمىن. تىم بولماعاندا سوعان ۇمىتتەنەمىن.
اسحات قاسەنعاليدىڭ facebook پاراقشاسىنان
Abai.kz
