Reuters اگەنتتىگىنىڭ جازۋىنشا، سيرياداعى اقش مەملەكەتتىك دەپارتامەنت وكىلدەرىن ءبىر تاۋلىكتىڭ ىشىندە الىپ شىعادى. اگەنتتىك مالىمەتىنشە، ۆاشينگتون 60-100 كۇن ارالىعىندا اسكەرىن تولىق شىعارادى. ايماقتا ەكى مىڭنان استام امەريكالىق سارباز بار.

سارسەنبى كۇنى اقش پرەزيدەنتى دونالد ترامپ Twitter-دە "يسلام مەملەكەتى" ەكسترەميستىك توبىنىڭ كۇيرەگەنىن، "اقش اسكەرىنىڭ سيريادا قالۋىنىڭ جالعىز سەبەبى يم-ءدى جەڭۋ بولعانىن" جازعان.

Bloomberg باسىلىمى دا ۆاشينگتونداعى رەسمي دەرەككوزگە سۇيەنىپ، سيريادان اسكەردى شىعارۋ جونىندە جارلىققا قول قويىلعانىن جازادى.

سوڭعى ۋاقىتقا دەيىن اقش سيرياداعى يم-مەن جانە وزگە دە تەرروريستىك ۇيىمدارمەن سوعىسقان كۇرد بولىمشەسىنە كومەك كورسەتىپ كەلگەن.

"يسلام مەملەكەتى" 2013 جىلى سيريا مەن يراك اۋماعىندا قۇرىلعان ەكسترەميستىك توپ. بىرنەشە جىل بويى ەكى ەل اۋماعىنىڭ نەگىزگى بولىگىن باسىپ الىپ، حاليفات ورناتپاق بولعان. 2018 جىلدان باستاپ يم قۇلدىراي باستادى. قازاقستاندا تەرروريستىك ۇيىم دەپ تانىلعان.

قازاقستان ۇلتتىق قاۋىپسىزدىك كوميتەتىنىڭ دەرەگىنشە، 800-گە جۋىق قازاقستاندىق سيرياعا كەتىپ، "يسلام مەملەكەتى" توبىنىڭ ساپىندا سوعىسقان.

Abai.kz