پارلامەنت سەناتى الەۋمەتتىك-مادەني دامۋ جانە عىلىم كوميتەتىنىڭ كەڭەيتىلگەن وتىرىسىندا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دەنساۋلىق ساقتاۋ ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

زاڭ جوباسى مەملەكەت باسشىسىنىڭ 2018 جىلعى 10 قاڭتارداعى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىن ورىنداۋ ءۇشىن ازىرلەندى جانە دەنساۋلىق ساقتاۋ سالاسىنداعى قولدانىستاعى زاڭنامانى ودان ءارى دامىتۋعا باعىتتالعان.

زاڭ جوباسىندا نەگىزگى باعىتتاردى قامتيتىن بىرقاتار زاڭنامالىق اكتىلەرگە تۇزەتۋ ەنگىزۋدى كوزدەيدى. ولار: تەگىن مەديتسينالىق كومەكتىڭ مەملەكەتتىك كولەمىنىڭ جاڭا ۇلگىسىن ەندىرۋ; مەديتسينالىق ۇيىمدارداعى كورپوراتيۆتىك باسقارۋ جۇيەسىن جەتىلدىرۋ; دەنساۋلىق ساقتاۋ ينفراقۇرىلىمىن دامىتۋدىڭ بىرىڭعاي پەرسپەكتيۆالىق جوسپارىن ەندىرۋ; قوعامدىق دەنساۋلىقتى ساقتاۋ ماسەلەلەرىن جەتىلدىرۋ; مەديتسينالىق ءبىلىم بەرۋ جۇيەسى مەن عىلىمدى جەتىلدىرۋ، مەديتسينالىق كادرلاردى دايىنداۋ ساپاسىن ارتتىرۋ; دونورلىقتى دامىتۋ.

ماسەلەن، زاڭ جوباسىمەن كورسەتىلەتىن مەديتسينالىق كومەكتەر كولەمدەرىن توپتامالار بويىنشا ءبولۋ ۇسىنىلادى: ەڭ تومەن – تەگىن مەديتسينالىق كومەكتىڭ كەپىلدىك بەرىلگەن كولەمى; بازالىق – «مىندەتتى الەۋمەتتىك مەديتسينالىق ساقتاندىرۋ تۋرالى» قازاقستان رەسپۋبليكاسىنىڭ زاڭىنا سايكەس ۇسىنىلاتىن مىندەتتى الەۋمەتتىك مەديتسينالىق ساقتاندىرۋ جۇيەسىندەگى مەديتسينالىق كومەك (بۇدان ءارى – ءمامس); «ساقتاندىرۋ قىزمەتى تۋرالى» قازاقستان رەسپۋبليكاسىنىڭ زاڭىنا سايكەس  ەرىكتى مەديتسينالىق ساقتاندىرۋ شاڭبەرىندەگى مەديتسينالىق كومەك; قازاقستان رەسپۋبليكاسىنىڭ زاڭناماسىنا قايشى كەلمەيتىن اقىلى قىزمەتتەر كورسەتۋ مەن وزگە دە كوزدەردىڭ ەسەبىنەن ۇسىنىلاتىن مەديتسينالىق كومەكتى قامتيتىن مەديتسينالىق كومەكتىڭ قوسىمشا كولەمى.

زاڭ جوباسىنا سايكەس، تەگىن مەديتسينالىق كومەكتىڭ كەپىلدىك بەرىلگەن كولەمى قازاقستان رەسپۋبليكاسىنىڭ ازاماتتارىنا، ورالماندارعا، قازاقستان رەسپۋبليكاسىنىڭ اۋماعىندا تۇراقتى تۇراتىن شەتەلدىكتەر مەن ازاماتتىعى جوق ادامدارعا بيۋدجەت قاراجاتى ەسەبىنەن ۇسىنىلادى، بارىنشا دالەلدەنگەن تيىمدىلىگى بار پروفيلاكتيكالىق، دياگنوستيكالىق جانە ەمدىك مەديتسينالىق كورسەتىلەتىن قىزمەتتەردى، سونداي-اق دارىلىك كومەكتى قامتيدى.

تەگىن مەديتسينالىق كومەكتىڭ كەپىلدىك بەرىلگەن كولەمىنىڭ تىزبەسىن قازاقستان رەسپۋبليكاسىنىڭ ۇكىمەتى بەكىتەدى.

تەگىن مەديتسينالىق كومەكتىڭ كەپىلدىك بەرىلگەن كولەمى مەن مىندەتتى الەۋمەتتىك مەديتسينالىق ساقتاندىرۋ جۇيەسى شەڭبەرىندەگى مەديتسينالىق قىزمەتتەر ۇسىنۋ ۇلگىسىن ودان ءارى جەتىلدىرۋ ماقساتىندا «مىندەتتى الەۋمەتتىك مەديتسينالىق ساقتاندىرۋ تۋرالى» قازاقستان رەسپۋبليكاسىنىڭ زاڭىنا وزگەرىستەر مەن تولىقتىرۋلار ەنگىزىلەدى، وعان سايكەس مىندەتتى الەۋمەتتىك مەديتسينالىق ساقتاندىرۋ جۇيەسىندە: العاشقى مەديتسينالىق-سانيتاريالىق كومەك مامانىنىڭ جانە بەيىندى مامانداردىڭ جولداماسى بويىنشا كونسۋلتاتسيالىق-دياگنوستيكالىق كومەك; العاشقى مەديتسينالىق-سانيتاريالىق كومەك مامانىنىڭ نەمەسە مەديتسينالىق ۇيىمنىڭ جولداماسى بويىنشا اۋرۋلاردى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە ەمدەۋ جاعدايلارىن قوسپاعاندا، ستاتسيوناردى الماستىراتىن كومەك; اۋرۋحاناعا جاتقىزۋ جاعدايلارىنىڭ جوسپارلانعان سانى شەڭبەرىندە العاشقى مەديتسينالىق-سانيتاريالىق كومەك مامانىنىڭ نەمەسە مەديتسينالىق ۇيىمنىڭ جولداماسى بويىنشا اۋرۋلاردى تەگىن مەديتسينالىق كومەكتىڭ كەپىلدىك بەرىلگەن كولەمى شەڭبەرىندە ەمدەۋ جاعدايلارىن قوسپاعاندا، جوسپارلى ستاتسيونارلىق كومەك; ۋاكىلەتتى ورگان ايقىندايتىن اۋرۋلار (جاي-كۇيلەر) تىزبەسى بويىنشا العاشقى مەديتسينالىق-سانيتاريالىق كومەك مامانىنىڭ نەمەسە مەديتسينالىق ۇيىمنىڭ جولداماسى بويىنشا مەديتسينالىق وڭالتۋ جانە قالپىنا كەلتىرۋ ەمى; تەگىن مەديتسينالىق كومەكتىڭ كەپىلدىك بەرىلگەن كولەمىنە كىرمەيتىن اۋرۋلاردىڭ پاتالوگيالىق-اناتوميالىق دياگنوستيكاسى ۇسىنىلاتىن بولادى.

زاڭ جوباسىندا سونداي-اق ءبىلىم بەرۋدى، زەرتتەۋلەردى جانە كلينيكالىق پراكتيكانى ۇشتاستىرۋ ارقىلى مەديتسينالىق كادرلار دايىنداۋ مەن مەديتسينالىق قىزمەتتەر ساپاسىن ارتتىرۋعا، بىرقاتار اكىمشىلىك جانە قىلمىستىق قۇقىق بۇزۋشىلىقتار قۇرامىن قايتا قاراۋعا، دونورلىق جانە ترانسپلانتولوگيا ينستيتۋتىن جەتىلدىرۋگە، تۋبەركۋلەزبەن جانە ايتۆ-پەن اۋىراتىندارعا مەديتسينالىق كومەك كورسەتۋگە، سونداي-اق دەنساۋلىق ساقتاۋ جۇيەسى ماسەلەلەرى بويىنشا قولدانىستاعى زاڭناماداعى ولقىلىقتاردى جويۋعا باعىتتالعان نورمالار كوزدەلگەن.

سونىمەن قاتار، سەناتورلار «قازاقستان رەسپۋبليكاسىنىڭ كەيبىر زاڭنامالىق اكتىلەرىنە دارىلىك زاتتار مەن مەديتسينالىق بۇيىمداردىڭ اينالىسى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسىن قارادى.

زاڭ جوباسى بىرقاتار زاڭناما اكتىلەرىنە وزگەرتۋلەر مەن تولىقتىرۋلار ەنگىزۋدى كوزدەيدى.

ەنگىزىلەتىن تۇزەتۋلەر شەكتى باعالاردى بەكىتۋ ارقىلى 2019 جىلعى 1 قاڭتاردان باستاپ بارلىق دارىلىك زاتتارعا ارنالعان باعالاردى رەتتەۋدى ەنگىزۋدى; اكىمدەردىڭ قۇزىرەتىنەن فارماتسەۆتيكالىق قىزمەتتى جۇزەگە اسىرۋعا ارنالعان ليتسەنزيالاردى بەرۋ جونىندەگى فۋنكتسيالاردى الىپ تاستاۋدى; ازاماتتاردىڭ جەكەلەگەن ساناتتارىن تەگىن نەمەسە جەڭىلدىكپەن امبۋلاتوريالىق قامتاماسىز ەتۋ ءۇشىن كەشەندى باعالاۋدىڭ نەگىزىندە  دارىلىك پرەپاراتتار مەن مەديتسينالىق بۇيىمداردىڭ ۇلتتىق فورمۋليارلىق تىزبەسىن قالىپتاستىرۋدى; دارىلىك زاتتار مەن مەديتسينالىق بۇيىمداردى ەلەكتروندىق ساتىپ الۋعا كوشۋدى، سونداي-اق دارىلىك زاتتار مەن مەديتسينالىق بۇيىمداردىڭ اينالىسى سالاسىنداعى زاڭنامانى جەتىلدىرۋگە باعىتتالعان باسقا دا نورمالاردى كوزدەيدى.

سونداي-اق، وتىرىستا «قازاقستان رەسپۋبليكاسىنىڭ كەيبىر زاڭنامالىق اكتىلەرىنە حالىقتىڭ جۇمىسپەن قامتىلۋى ماسەلەلەرى بويىنشا وزگەرىستەر مەن تولىقتىرۋلار ەنگىزۋ تۋرالى» زاڭ جوباسى قارالدى.

زاڭ جوباسى مەملەكەت باسشىسىنىڭ ءوزىن-ءوزى جۇمىسپەن قامتىعان حالىقتىڭ كىرىسىن ەسەپكە الۋ، سالىق تولەۋ جانە پروبلەمالارىن شەشۋ، ونىڭ الەۋمەتتىك قامسىزداندىرۋ جۇيەسىنە قاتىسۋى جونىندەگى ماسەلەلەردى ناقتى ازىرلەپ دايىنداۋ قاجەتتىلىگى تۋرالى تاپسىرماسىن ىسكە اسىرۋ ءۇشىن، سونداي-اق 2018 جىلعى 10 قاڭتارداعى «ءتورتىنشى ونەركاسىپتىك رەۆوليۋتسيا جاعدايىنداعى دامۋدىڭ جاڭا مۇمكىندىكتەرى» اتتى قازاقستان حالقىنا جولداۋىندا ايتىلعان ساپالى جۇمىسپەن قامتۋدى جانە الەۋمەتتىك قامسىزداندىرۋدىڭ ءادىل جۇيەسىن قامتاماسىز ەتۋ جونىندەگى مىندەتتەردى ىسكە اسىرۋ ماقساتىندا ازىرلەنگەن.

زاڭ جوباسى بەيرەسمي جۇمىسقا تارتىلعانداردىڭ ءوز قىزمەتىن زاڭداستىرۋىنا جانە بىرىڭعاي جيىنتىق تولەمدى تولەۋدىڭ ەسەبىنەن زەينەتاقىمەن قامسىزداندىرۋ، الەۋمەتتىك جانە مەديتسينالىق ساقتاندىرۋ جۇيەسىنىڭ تولىق مۇشەسى بولۋىنا مۇمكىندىك بەرەتىن جۇيەلى شارالاردى ەندىرۋ ارقىلى شارتتاستىرۋعا جانە ولاردى ەلىمىزدىڭ ەكونوميكاسىنا تارتۋعا باعىتتالعان.

زاڭ جوباسىمەن بىرقاتار زاڭنامالىق اكتىلەرگە تۇزەتۋلەر ەنگىزىلەدى.

زاڭ جوباسىنىڭ نەگىزگى ەرەجەلەرى:

-  2019 جىلعى 1 قاڭتاردان باستاپ بەيرەسمي جۇمىسپەن قامتىلعان ادامداردىڭ قىزمەتىن سالىق ورگاندارىندا تىركەۋدىڭ جەڭىلدەتىلگەن ءتارتىبىن كوزدەيتىن بىرىڭعاي جيىنتىق تولەمدى ەنگىزۋدى; بەيرەسمي جۇمىسپەن قامتىلعاندار ءۇشىن بىرىڭعاي جيىنتىق تولەمدى ەنگىزۋ:

- مىندەتتى الەۋمەتتىك مەديتسينالىق ساقتاندىرۋ جۇيەسىنە جانە مەديتسينالىق ۇيىمداردى تاڭداۋ قۇقىعىمەن سوماسى مەن ءتۇرى بويىنشا شەكتەۋسىز مەديتسينالىق قىزمەتتەرگە قولجەتىمدىلىكتى الۋعا;

زەينەتاقى جيناقتاۋ جۇيەسىنە قاتىسۋعا جانە جۇيەگە قاتىسۋ وتىلىنە قاراي بازالىق زەينەتاقى تولەمدەرىن الۋعا;

ەڭبەككە جارامدىلىعىن جوعالتۋ، اسىراۋشىسىنان ايىرىلۋ، جۇكتى بولۋ جانە بوسانۋ، بالا نەمەسە قىز اسىراپ الۋ، 1 جىلعا دەيىن بالا كۇتۋ جاعدايلارىندا الەۋمەتتىك تولەمدەردى الۋعا مۇمكىندىك بەرەدى;

– مىندەتتى الەۋمەتتىك اۋدارىمداردى، مىندەتتى زەينەتاقى جارنالارىن، مىندەتتى مەديتسينالىق ساقتاندىرۋ اۋدارىمدارىن تولەۋشىلەردىڭ ساناتتارىن بىرىزدەندىرۋدى;

– «جۇمىسپەن قامتىلعان ادام»، «جالدامالى جۇمىسكەر»، «تاۋەلسىز جۇمىسكەر» ۇعىمدارىن جانە حالىقارالىق ەڭبەك ۇيىمى بەلگىلەگەن جۇمىسپەن قامتىلعانداردىڭ حالىقارالىق سىنىپتاۋىشى نەگىزىندە ولاردىڭ مارتەبەسىن ايقىنداۋدى;

– بيزنەسكە، جۇمىس بەرۋشىلەرگە جانە بيۋدجەتكە اۋىرتپالىقتى ۇلعايتۋعا جول بەرمەۋ ماقساتىندا جەكەلەگەن سالىق شەگەرىمدەرىن ەسەپتەۋ ءۇشىن دەرەكقوردى ەڭ تومەنگى جالاقىدان ايلىق ەسەپتىك كورسەتكىشكە وزگەرتۋدى;

– «استانا حاب» حالىقارالىق تەحنولوگيالىق پاركىنە قاتىسۋشىلار ءۇشىن سالىقتىق ارتىقشىلىقتار بەرۋدى;

– ەتنوستىق قازاقتار-رەپاتريانتتاردىڭ زەينەتكە شىعۋى كەزىندە ولاردىڭ شەتەلدە تۇرۋى كەزەڭىندەگى جيناقتالعان ەڭبەك ءوتىلىن ەسەپكە الۋدى جانە باسقالاردى كوزدەيدى.

بارلىق قۇجاتتار پالاتا قاراۋىنا جىبەرىلدى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz