قر دەنساۋلىق ساقتاۋ ءمينيسترى ەلجان ءبىرتانوۆ تسيفرلىق تەxنولوگيالار ارقىلى مەملەكەت قارجىسىن قالايشا ۇنەمدەپ وتىرعانىن ايتىپ بەردى، دەپ xابارلايدى اباي-اقپارات turkystan.kz-گە سىلتەمە جاساپ.

ءمينيستردىڭ سوزىنە قاراعاندا، بۇگىندە تەگىن ءدارى-دارمەكتى الاتىن ادامعا SMS ارقىلى xابار بەرۋ جۇيەسى بار. كەلەسى جىلدان باستاپ بارلىق ۇيالى تەلەفوندار تىركەۋدەن وتكەننەن كەيىن ونداي xابارلامالار بارلىق ازاماتتارعا تۇسەتىن بولادى.

«ءبارىڭىز بىلەسىزدەر، كەلەسى جىلدان باستاپ بارلىق ۇيالى تەلەفون نومىرلەرى ادامنىڭ جەكە سايكەستەندىرۋ نومىرىمەن سايكەس بولۋى كەرەك. سول كەزدە ءبىز تەگىن مەديتسينالىق كومەك الاتىن ازاماتتاردىڭ بارىنە SMS جىبەرۋگە تىرىسامىز. بىرىنشىدەن، ول - ءدارى-دارمەك. ەكىنشىدەن، ءتۇرلى پروفيلاكتيكالىق قىزمەتتەر بار. ماسەلەن، كوپ ادامدار سكرينينگتەن وتەدى. ايتپەسە، بۇگىندە كوپ جاعدايدا (ەمxانالار - اۆت.) «سكرينينگتەن 94-95 پروتسەنتكە وتكىزىپ جاتىرمىز» دەپ جازىپ بەرەدى. بىراق ونىڭ بارلىعىنا اقشا ءبولىنىپ جاتىر عوي. سونىڭ ءبارىن ءبىز ازاماتتارمەن ونلاين رەجيمدە جۇمىس ىستەۋ ارقىلى تەكسەرەتىن بولامىز. قازىر مەملەكەت تاراپىنان كوپ اقشا بولىنەدى. سول اقشا xالىققا 100 پروتسەنت جەتۋى كەرەك. وسىعان بايلانىستى اقپاراتتىق تەxنولوگيالاردى كەڭىنەن قولدانامىز»، - دەدى ە.ءبىرتانوۆ جۋرناليستەرگە بەرگەن سۇxباتىندا.

ونىڭ ايتۋىنشا، بۇرىن تەگىن ءدارى-دارمەككە قىرۋار قارجى ءبولىندى. بىراق جەرگىلىكتى ورگاندار تاپسىرىستى تىم كوپ بەردى. وعان قوسا، كەي كەزدە ناۋقاستاردىڭ وزدەرى دە تەگىن ءدارى-دارمەكتى الماي كەتەدى. ال ونىڭ ءبارى - بيۋدجەتتىڭ قارجىسى. بۇگىندە اقپاراتتىق جۇيە ارقىلى ناۋقاستاردىڭ ناقتى ءتىزىمى جاسالدى. سونىڭ ارقاسىندا 14,5 ملرد تەڭگە ۇنەمدەلىپ وتىر. سەبەبى ارتىق تاپسىرىس جاسالمايدى.

«جالپى، ءبىر جىلدىڭ ىشىندە ءبىز 38 ميلليارد تەڭگەنى ۇنەمدەدىك. بۇرىن ول اقشا قايدا كەتتى؟ قازىر ونىڭ ءبارىن باس پروكۋراتۋرا جانە باسقا دا مەملەكەتتىك ورگاندار تەكسەرىپ جاتىر»، - دەپ اتاپ كورسەتتى ە.ءبىرتانوۆ.