امەريكا ازاماتىنىڭ ادۆوكاتى ۆلاديمير جەرەبەنكوۆ ينتەرفاكسكە ۋيلاندى كەپىلمەن شىعارۋدى سۇراپ، ارىزدانعانىن ايتقان. جەرەبەنكوۆتىڭ ايتۋىنشا، اپەللياتسيالىق شاعىمدى ماسكەۋ قالالىق سوتقا جىبەرگەن. ادۆوكات ءارى قاراي تەرگەۋ ىسىنە جۇگىنىپ، تۇسىنىكتەمە بەرۋدەن باس تارتقان.
فسب 48 جاستاعى ۋيلاندى 28 جەلتوقساندا ۇستاعان. 29 جەلتوقساندا ماسكەۋدىڭ لەفورتوۆسكي سوتى امەريكالىق ازاماتتى قاماۋعا الۋ جونىندە شەشىم شىعارعان. وعان تاعىلعان ايىپ بويىنشا 20 جىلعا دەيىن باس بوستاندىعىنان ايىرىلۋ قاۋپى بار.
"روسبالت" اگەنتتىگى ارنايى قىزمەتتىڭ دەرەككوزىنە سىلتەمە جاساپ، ۋيلان رەسەيلىك قۇپيا مەكەمەنىڭ قىزمەتكەرلەرىنىڭ ءتىزىمى بار فلەش-كارتا الىپ جاتقان كەزىندە ۇستالعان. بۇل مالىمەت مەملەكەتتىك قۇپيا بولىپ سانالادى.
سارسەنبى كۇنى "لەفورتوۆو" تەرگەۋ اباقتىسىندا وتىرعان امەريكالىققا اقش-تىڭ رەسەيدەگى ەلشىسى دجون حانتسمان باردى. اقش مەملەكەتتىك حاتشىسى مايك پومپەو رەسەيدەن ۋيلاندى نە ءۇشىن ۇستاعانىن اشىق مالىمدەۋدى سۇراپ. تەز ارادا بوساتۋدى تالاپ ەتكەن.
ۋيلان كولىك بولشەكتەرىن شىعاراتىن BorgWarner امەريكالىق كومپانياسىندا قاۋىپسىزدىك جونىندەگى ديرەكتورى قىزمەتىن اتقارادى. 1994-2008 جىلدار ارالىعىندا اقش تەڭىز جاياۋ اسكەرى كورپۋسىنىڭ زاپاسىندا قىزمەت ەتكەن. ول ۇرلىعى ءۇشىن قىزمەتىنەن قۋىلعان.
ۋيلاننىڭ تۋىستارى ونىڭ بارلاۋ ىسىنە قاتىسى بار دەگەندى تەرىسكە شىعارادى. ولاردىڭ سوزىنشە، ۋيلان ماسكەۋگە دوسىنىڭ تويىنا بارعان.
Abai.kz
