سادۋباەۆتىڭ ايتۋىنشا، "ارمەنيا ازاماتى نارەك گۋرۋريان رەسەيدىڭ ومبى وبلىسىنىڭ اۋماعىندا ۇستالعان. قازىر ونى قازاقستانعا اكەلۋ جۇمىستارى ۇيىمداستىرىلىپ جاتىر".

ىشكى ىستەر مينيسترلىگىنىڭ حابارلاۋىنشا، گۋرۋريان 1 قاڭتار تۇنگى 10-دا قازاقستاننان رەسەيگە ءوتىپ كەتكەن.

جاڭا جىل ءتۇنى قاراعاندىداعى مەيرامحانالاردىڭ بىرىندە بولعان توبەلەس سالدارىنان ءبىر ادام قازا تاۋىپ، ءتورت ادام جارالانعان. بۇل وقيعاعا قاتىسى بار دەگەن كۇدىكپەن سەگىز ادام ۇستالعان. تاعى ءبىر كۇدىكتى نارەك گۋرۋريانعا حالىقارالىق ىزدەۋ جاريالانعان. 6 قاڭتاردا قاراعاندىدا جۇزدەگەن ادام "قىلمىسكەردى" تابۋدى تالاپ ەتكەن. قاراعاندى وبلىسى اكىمى ەرلان قوشانوۆ ىزدەۋ جۇمىستارى ءجۇرىپ جاتقانىن ايتقان.

7 قاڭتاردا ينتەرنەتتە نارەك گۋرۋريان ەسىمدى ادام ۆيدەوۇندەۋ جاريالاپ، "توبەلەسكەندەر اراسىندا بولعانىن، بىراق كىسى ولتىرمەگەنىن" ايتقان.

8 قاڭتاردا استانادا وتكەن بريفينگتە ىشكى ىستەر ءمينيسترىنىڭ ءبىرىنشى ورىنباسارى جانات سۇلەيمەنوۆ جانجالدىڭ ۇلتارالىق سيپاتى بارىن جوققا شىعارعان.

"جانجال تۇرمىستىق سيپاتتا وربىگەن. ءبىر تاراپتا ءبىر عانا ۇلتتىڭ، ەكىنشى تاراپتا وزگە ءبىر ۇلتتىڭ عانا وكىلدەرى توبەلەستى دەگەن جاعداي بولعان جوق. ءبىز تەرگەۋ كەزىندە بۇل تۋرالى ايتقان جوقپىز، سەبەبى بارلىعىن انىقتاپ العىمىز كەلدى. تەرگەۋ ءالى جۇرگىزىلىپ جاتقاندىقتان، ەگجەي-تەگجەيلى اقپارات بەرە المايمىز" دەدى سۇلەيمەنوۆ.

9 قاڭتاردا قازاقستان ىشكى ىستەر ءمينيسترى قالمۇحانبەت قاسىموۆ پەن ارمەنيانىڭ قازاقستانداعى ەلشىسى گاگيك گالاچيان كەزدەسكەن.

Abai.kz