سارسەنبى, 20 ناۋرىز 2019
46 - ءسوز 4212 8 پىكىر 11 قاڭتار, 2019 ساعات 12:35

قىتايدىڭ قۋلىعىنا قۇرىق بويلامايدى

تاريحتان بىلەمىز ءھام سول ەلدە تۋىپ-ءوستىم. وزگەنىڭ كوزىن بايلاۋدا، ساياسي قۋلىققا كەلگەندە بۇلار الدارىنا جان سالعان ەمەس. وعان كوممۋنيستەردىڭ زالىمدىعى مەن ايارلىعىن، راحىمسىزدىعى مەن دىنسىزدىگىن قوسىڭىز.

قىتايدىڭ كوممۋنيستىك بيلىگى وزدەرىنە قارىزدار نەمەسە ەكونوميكالىق-تاۋەلدى بايلانىسى بار 12 ەلدىڭ ەلشىلىك وكىلدەرىن، جۋرناليستەرىن شاقىرىپ، الدىن الا دايىندالىپ قويعان بىرنەشە «ساياسي تاربيەلەۋ ورتالىقتارىن» «ەمىن-ەركىن» ارالاتىپتى.

الىستان ىزدەمەي-اق، ءوزىم تانيتىن نەمەسە تۋىستىق بايلانىسى بىرنەشە ادامنىڭ سول «ورتالىقتا» ولگەنىن، سۇيەگىنە ساراپتاما جاساتپاق تۇگىلى جاقىندارىنا كورسەتپەي جەرلەتكەنىن بىلەمىن.

سوڭعى جىلدارى ولاردا «قىتاي ارمانى» دەگەن ءسوز ءجيى ايتىلاتىن بولدى.
ءار ەلدىڭ، ءار ۇلتتىڭ ءوز ارمانى بار. قۇقىقتىق، دەموكراتيالىق، شىنايى تاۋەلسىز، بەيبىت ەل قۇرساق دەگەن قازاق ەلىنىڭ دە اسقاق مۇراتى بار.
ال «قىتاي ارمانى» تۋرالى ايتساق تاڭدى تاڭعا جالعاپ لەكتسيا جاساۋعا بولادى. ءوز ىشىندە جانە سىرتقى ءالسىز كورشى مەملەكەتتەرگە جۇرگىزىپ وتىرعان ساياساتىنا قاراپ-اق، ءوز ءىشىن ءبىرتۇتاس قىتايلاستىرۋ، ماڭىنداعى شاعىن ەلدەردى قارجىلىق تاۋەلدىلىككە بۇلجىتپاي بايلاپ، بىرتىندەپ وتارلاپ الۋ ەكەنى ءسال ساۋاتى بار كەز كەلگەن ادامعا ايان.

بۇدان 3 مىڭ جىل بۇرىنعى تەرريتورياسى «ۇلى قورعاننىڭ» ىشىندە عانا، شاعىن اۋماقتا بولعان قىتايدىڭ قازىرگى كولەمىن قاراپ كورىڭىز. عاسىرلىق ەسەپكە شاقساق، شەكاراسىن مولشەرمەن ءار جىل سايىن ءبىر شاقىرىمعا كەڭەيتىپ وتىرعانىن كورۋگە بولادى.

قىتايعا جياڭ زى مين باسشىلىق ەتكەن داۋىردە قازاق ەلى قىتايمەن شەكارانى زاڭ جۇزىندە، قۇجاتتىق نەگىزدە انىق بەلگىلەدى. حالىقارالىق كارتاعا نىقتاپ سىزدى. بۇنى ساياسي ءىرى جەڭىس دەپ اتار ەدىم.

جاراتۋشى نەسىپ ەتىپ، تاۋاريح سىيعا تارتاقن، ەكى ءىرى ەلدىڭ ورتاسىنان بۇيىرعان ءبىزدىڭ اتاقونىسىمىز ءوز ۇرپاقتارىمىزعا عانا قالۋى ءتيىس.
سانىمىز 30 ميلليونعا جەتسە، ساناسى اشىق، جىگەرى بەكەم، نامىسى اسقاق بالالارىمىز كوبەيسە، ءبىزدىڭ قازاق «كۇن سونگەنشە سونبەيدى!»

ۇلاربەك دالەيۇلىنىڭ facebook پاراقشاسىنان

Abai.kz

8 پىكىر