كەزدەسۋ بارىسىندا مەملەكەت باسشىسىنا ۇلتتىق بانكتىڭ 2018 جىلى اتقارعان جۇمىسىنىڭ قورىتىندىسى جونىندە ەسەپ بەرىلىپ، ەلدەگى ۆاليۋتا-قارجى نارىعىنىڭ قازىرگى احۋالى تۋرالى باياندالدى، دەپ جازادى اقوردانىڭ رەسمي سايتى.

ەلباسى بىرقاتار ەكونوميكالىق ينديكاتورلاردىڭ وڭ قارقىنمەن ءوسىپ كەلە جاتقانىن اتاپ ءوتىپ، ينفلياتسيا دەڭگەيىن تومەندەتۋ ءۇشىن قابىلدانىپ جاتقان شارالاردىڭ تيىمدىلىگى تۋرالى ماسەلەگە توقتالدى.

– 5,3 پايىز دەڭگەيىندەگى ينفلياتسيا – بۇل جاقسى كورسەتكىش. بىراق، بۇعان ەكونوميكانىڭ تيىمدىلىگىنەن ەمەس، نارىقتاعى وتىمدىلىك كولەمىنىڭ قىسقارۋى ەسەبىنەن قول جەتكىزىلىپ وتىر. ۇلتتىق بانك پەن ۇكىمەتتىڭ بۇل باعىتتاعى جۇمىسى ناشار. قاراجاتتى اينالىمنان شىعارۋ ارقىلى ينفلياتسيانى ودان ءارى تومەندەتۋگە بولادى، بىراق بۇل شەشىمنىڭ ەكونوميكاعا قالاي اسەر ەتەتىنى بەلگىسىز. سونىمەن قاتار، ۇزاق مەرزىمدى نەسيەلەردىڭ ازايعانىن بايقاۋعا بولادى، – دەدى نۇرسۇلتان نازارباەۆ.

قازاقستان پرەزيدەنتى قولدانىستاعى زاڭناماعا بىرقاتار وزگەرىستەر ەنگىزىلگەنىنە توقتالىپ، ۇلتتىق بانك تاراپىنان بۇل سالاعا ءتيىستى باقىلاۋ جۇرگىزىلۋى قاجەت ەكەنىن ايتتى.

دانيار اقىشەۆ مەملەكەت باسشىسىنىڭ قازاقستان حالقىنا ارنالعان جولداۋىندا ايتىلعان قايتا وڭدەۋ ونەركاسىبىن نەسيەلەۋ جونىندەگى تاپسىرمالاردىڭ ورىندالۋ بارىسى تۋرالى اڭگىمەلەدى.

سونداي-اق، ۇلتتىق بانك توراعاسى قازاقستان پرەزيدەنتىنە ۇلتتىق ۆاليۋتا باعامىنىڭ وزگەرۋىنە ىقپال ەتەتىن فاكتورلار تۋرالى باياندادى.

– تەڭگەنىڭ اقش دوللارىنا شاققانداعى ايىرباس باعامى جىل ىشىندە 15,6 پايىزعا تومەندەدى. بۇعان، نەگىزىنەن، سىرتقى فاكتورلار سەبەپشى بولدى. الەمدەگى مۇناي باعاسى وتە قۇبىلمالى بولىپ وتىر. سىرتقى جاعدايلار، سونىڭ ىشىندە قولداۋشىلىق پەن سانكتسيالىق ساياسات تا تۇراقتى ەمەس. دەي تۇرعانمەن، ەركىن ايىرباس باعامى رەجىمى بارلىق اۋىرتپالىقتى جەڭىلدەتىپ، وتكەن جىلدىڭ سوڭىندا 30,9 ميلليارد اقش دوللارىن قۇرايتىن التىن ۆاليۋتا رەزەرۆىن ساقتاپ قالۋعا مۇمكىندىك بەردى. ۇلتتىق قوردىڭ شەتەل ۆاليۋتاسىنداعى اكتيۆى 57,7 ميلليارد اقش دوللارىنا جەتتى، – دەدى ۇلتتىق بانك توراعاسى.

د.اقىشەۆ قارجى نارىعىن نەسيەلەۋ جانە ساۋىقتىرۋ ءۇشىن اتقارىلىپ جاتقان جۇمىستار جونىندە مالىمدەدى.

– ءبىز قارجى سەكتورىن جاقسارتۋ ارقىلى نارىققا لايىقتى قاتىسۋشىلاردىڭ جۇمىسىن ىلگەرىلەتۋگە مۇمكىندىك بەرەمىز. ءتيىستى شارالار قابىلدانعاننان كەيىن نەسيە كولەمى ايتارلىقتاي ارتادى دەپ ويلايمىز. بۇل كورسەتكىش 2019 جىلى 10 پايىزعا وسەدى دەپ بولجامداپ وتىرمىز. بۇل نومينالدى ىشكى جالپى ونىمنەن جوعارى. تيىسىنشە، نەسيەلەردىڭ قول جەتىمدىلىگى ارتىپ، بىرتە-بىرتە جاعداي جاقسارا تۇسەدى. ءبىز كەلەشەكتە پروبلەمالار تۋىنداتۋى مۇمكىن كۇرت وسىمنەن گورى تەڭگەرىمدى ءوسىمدى ماقۇل كورەمىز، – دەدى ۇلتتىق بانك توراعاسى.

كەزدەسۋ سوڭىندا قازاقستان پرەزيدەنتى بىرقاتار ناقتى تاپسىرما بەردى.

Abai.kz