قاسىم-جومارت توكاەۆتىڭ توراعالىق ەتۋىمەن سەنات بيۋروسىنىڭ وتىرىسى بولدى. دەپۋتاتتار قازاقستان پرەزيدەنتى ن.نازارباەۆتىڭ جاستار جىلىنىڭ اشىلۋىندا ايتقان باستامالارىن تالقىلادى.

«مەملەكەت باسشىسى جاستاردى مۇقيات تىڭداپ، ولاردىڭ ۇسىنىستارىنا قولداۋ كورسەتىپ، جىگەرىنە دەمەۋ بەردى. پرەزيدەنت ءوز سوزىندە جاستارعا قاتىستى ماسەلەلەردى جان-جاقتى تالداپ، شەشۋ جولدارىن كورسەتە وتىرىپ، ناقتى كەڭەستەرىن ايتتى. سونىمەن بىرگە، جاستارعا ساپالى ءبىلىم بەرۋ;    جۇمىسپەن قامتۋ، تۇرعىن ۇيمەن قامتاماسىز ەتۋ جانە وتباسىن قۇرۋعا قاجەتتى ماڭىزدى شارالاردى جۇزەگە اسىرۋ ماسەلەلەرى بويىنشا ۇكىمەت پەن اكىمدەرگە ارنايى جول كارتاسىن ازىرلەۋ تاپسىرىلدى»، - دەدى ق.توقاەۆ.

جوعارعى پالاتا باسشىسى جاستاردىڭ ءبىلىمى مەن تالابى، كۇش-قايراتى مەن وتانشىلدىعى ەلىمىزدىڭ دامۋىنا ارقاشان تىڭ سەرپىنمەن اسەر ەتەتىنىن ايتا كەلىپ، جاستاردىڭ بۇل يگى باستامالارىنا ءاردايىم قولداۋ كورسەتۋگە سەنات دەپۋتاتتارىنىڭ نازارىن اۋداردى. وسىعان بايلانىستى ق.توقاەۆ 7 اقپاندا سەناتتا جاستار ساياساتىنا ارنالعان دوڭگەلەك ۇستەل وتەتىنىن، وندا جاستاردى تولعاندىرىپ جۇرگەن وزەكتى ماسەلەلەر تالقىلاناتىنىن اتاپ ءوتتى.

بيۋرو بارىسىندا پالاتانىڭ 31 قاڭتاردا بولاتىن كەزەكتى وتىرىسىنىڭ كۇن ءتارتىبى كەلىسىلدى.

سەناتورلار كاسپي تەڭىزىنىڭ قۇقىقتىق مارتەبەسى تۋرالى; 2014 جىلعى 29 مامىرداعى ەۋرازيالىق ەكونوميكالىق وداق تۋرالى شارتقا وزگەرىس ەنگىزۋ تۋرالى حاتتامانى; ەۋرازيالىق ەكونوميكالىق وداقتىڭ ءۇشىنشى مەملەكەتتەرمەن، حالىقارالىق ۇيىمدارمەن نەمەسە حالىقارالىق ينتەگراتسيالىق بىرلەستىكتەرمەن حالىقارالىق شارتتارى تۋرالى كەلىسىمدى; تمد-عا قاتىسۋشى مەملەكەتتەردىڭ تەرروريزمگە جانە ەكسترەميزمنىڭ وزگە دە زورلىق-زومبىلىق كورىنىستەرىنە قارسى كۇرەستى جۇزەگە اسىراتىن قۇزىرەتتى ورگانداردى ماتەريالدىق-تەحنيكالىق قامتاماسىز ەتۋدەگى ىنتىماقتاستىعى تۋرالى كەلىسىمدى راتيفيكاتسيالاۋ تۋرالى زاڭ جوبالارىن قارايتىن بولدى.

بيۋرو وتىرىسىندا ماجىلىستەن تۇسكەن زاڭ جوبالارى پالاتا كوميتەتتەرىنە ءبولىنىپ بەرىلدى.

كونستيتۋتسيالىق زاڭناما، سوت جۇيەسى جانە قۇقىق قورعاۋ ورگاندارى كوميتەتى «قازاقستان رەسپۋبليكاسىنىڭ سوت جۇيەسى مەن سۋديالارىنىڭ مارتەبەسى تۋرالى» كونستيتۋتسيالىق زاڭعا وزگەرىستەر مەن تولىقتىرۋلار ەنگىزۋ تۋرالى» كونستيتۋتسيالىق زاڭ جوباسى بويىنشا باس كوميتەت بولىپ بەلگىلەندى.

ەكونوميكالىق ساياسات، يننوۆاتسيالىق دامۋ جانە كاسىپكەرلىك كوميتەتى «2010 جىلعى 9 جەلتوقسانداعى قازاقستان رەسپۋبليكاسىنىڭ ۇكىمەتى مەن رەسەي فەدەراتسياسىنىڭ ۇكىمەتى اراسىنداعى قازاقستان رەسپۋبليكاسىنا مۇناي جانە مۇناي ونىمدەرىن جەتكىزۋ سالاسىنداعى ساۋدا-ەكونوميكالىق ىنتىماقتاستىق تۋرالى كەلىسىمگە وزگەرىستەر ەنگىزۋ تۋرالى حاتتامانى راتيفيكاتسيالاۋ تۋرالى» زاڭ جوباسىن ودان ءارى پىسىقتاۋمەن اينالىساتىن بولدى.

الەۋمەتتىك-مادەني دامۋ جانە عىلىم كوميتەتى «قازاقستان رەسپۋبليكاسىنىڭ كەيبىر زاڭنامالىق اكتىلەرىنە بالانىڭ قۇقىقتارىن قورعاۋ جونىندەگى فۋنكتسيالاردى جۇزەگە اسىراتىن ۇيىمداردىڭ قىزمەتى تۋرالى   وزگەرىستەر مەن تولىقتىرۋلار ەنگىزۋ تۋرالى» زاڭ جوباسى بويىنشا باس كوميتەت بولىپ بەلگىلەندى.

قازاقستان رەسپۋبليكاسى پارلامەنتى
سەناتىنىڭ ءباسپاسوز قىزمەتى

Abai.kz