قازاقستان 2019 جىلى شيكىزاتتىق ەمەس ەكسپورت شەكاراسىن كەڭەيتەدى
قر ۇكىمەتىنىڭ ءباسپاسوز ورتالىعىندا وتكەن ءباسپاسوز كونفەرەنتسياسى بارىسىندا قر يندۋستريا جانە ينفراقۇرىلىمدىق دامۋ ۆيتسە-ءمينيسترى ارىستان قابىكەنوۆ مەملەكەت باسشىسىنىڭ «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» جولداۋىندا بەرىلگەن تاپسىرمالارىن ورىنداۋ اياسىندا ەكسپورت كولەمىن ۇلعايتۋ بويىنشا جۇرگىزىلىپ جاتقان جۇمىستار تۋرالى ايتىپ بەردى.
وڭدەۋ ونەركاسىبىندەگى ەكسپورتتىڭ ۇلەسى سوڭعى 5 جىلدا 9%-عا وسكەن.قر يدم دەرەكتەرى بويىنشا، 2018 جىلدىڭ 11 ايىندا ەكسپورتتىڭ جالپى كولەمى وتكەن جىلدىڭ سايكەس كەزەڭىمەن سالىستىرعاندا 26,4%-عا وسكەن. شيكىزاتتىق ەمەس ونىمدەر ەكسپورتىنىڭ كولەمى $14,3 ملرد قۇرادى.
ا. قابىكەنوۆتىڭ ايتۋىنشا، ەكسپورتتى ىلگەرىلەتۋ اياسىندا بۇگىندە مەملەكەتتىك قولداۋدىڭ ءارتۇرلى قارجىلىق جانە قارجىلىق ەمەس شارالارى ۇسىنىلۋدا. 2018 جىلدىڭ قورىتىندىسى بويىنشا قارجىلىق قولداۋ كورسەتۋ شارالارىنىڭ اياسىندا «KazakhExport» اق-ى جەلىسى بويىنشا 50 ەكسپورتتاۋشىعا قولداۋ كورسەتىلگەن، ونىڭ ىشىندە 27 كومپانيا العاش رەت اتالعان قولداۋدى پايدالاندى. قولداۋ كورسەتىلگەن ەكسپورتتىق كەلىسىمشارتتاردىڭ سومماسى 419,7 ملرد تگ قۇرادى.
2018 جىلى ەكسپورتتاۋشىلارعا سەرۆيستىك قولداۋ كورسەتۋ اياسىندا شەتەلدە 50-دەن استام ءىس-شارا وتكىزىلدى. قازاقستاندىق ەكسپورتتاۋشىلاردىڭ شەتەلدىك كورمەلەر مەن ساۋدا ميسسيالارىنا قاتىسۋى شامامەن $0,5 ملرد قۇرايتىن 100-دەن استام ەكسپورتتىق كەلىسىمشارت جاساسۋعا مۇمكىندىك بەردى.
وتكەن جىلى «اتامەكەن» ۇقپ قارجىلىق ەمەس قولداۋ كورسەتۋ شارالارى اياسىندا ەكسپورتقا باعىتتالعان 368 كاسىپورىنعا پاسپورت بەردى.
بۇگىنگى تاڭدا قازاقستان 119 ەلگە 800-گە جۋىق ءونىم ەكسپورتتايدى. سونىمەن قاتار قر-نىڭ ەكسپورتتىق قورجىنى جىل سايىن ورتا ەسەپپەن العان 5-8 ءونىم توپتارىمەن تولىقتىرىلادى. اتاپ ايتقاندا، 2017 جىلى ەكسپورتتىق تاۋارلاردىڭ جاڭا توپتارى اۆتوكولىكتەر، كۇن پانەلدەرى، گاز قازاندىقتارى، كارتريدجدەر، رەلستەر جانە POS-تەرمينالدارى بولدى.
«2018 جىلى ءباا نارىعىنا بالدى ونەركاسىپتىك مولشەردە ەكسپورتتاي باستادىق، قحر نارىعىنا العاش رەت قازاقستاندىق بالمۇزداقتى شىعارا باستادىق. ءبىزدىڭ مينيسترلىكتىڭ قولداۋىمەن قحر-دا ۇيىمداستىرىلعان ساۋدا-ەكونوميكالىق ميسسيانىڭ اياسىندا العاش رەت قىتاي نارىعىنا قازاقستاندىق ەت جەتكىزىلدى، كەلىسىمشارت ۇزاق مەرزىمگە، 5 جىلعا جاسالدى»، — دەدى ا. قابىكەنوۆ.
بۇعان قوسا، وتكەن جىلى سيان قالاسىندا قازاقستاننىڭ ءبىرىنشى ساۋدا ءۇيى اشىلدى، وندا بيىل قازاقستاندىق ونىمدەر ۇسىنىلاتىن بولادى، ولار سونىمەن قاتار قحر ەلەكتروندىق ساۋدا جەلىلەرىندە دە ىلگەرىلەتىلەتىن بولادى.
ا. قابىكەنوۆ بۇگىنگى كۇنى رف، ازەربايجان، قحر، وزبەكستان، ۋكراينا جانە يران سەكىلدى جاقىن ماڭداعى ەلدەرگە قازاقستاندىق ونىمدەردىڭ ەكسپورتىن ارتتىرۋعا مۇمكىندىك بار ەكەنىن اتاپ ءوتتى. نەگىزگى الەۋەتتى تاۋارلار — ماشينا جاساۋ، تاماق، ءسۇت، سونداي-اق قۇرىلىس ماتەريالدارى ونىمدەرى.
سونىمەن قاتار، ەلباسىنىڭ جولداۋى اياسىندا ءداستۇرلى نارىقتاردان ايىرىلماۋ، سونىمەن قاتار ەكسپورت كولەمىن جانە گەوگرافياسىن ارتتىرۋ ماقساتىندا الداعى ءۇش جىلعا 500 ملرد تەڭگە ءبولىندى.
پرەزيدەنت جولداۋى اياسىندا بولىنگەن قاراجات كەلىسى باعىتتارعا جولدانادى:
1. ەكسپورتقا باعىتتالعان جوبالاردى قارجىلاندىرۋعا;
2. ەكسپورتتاۋشىلار مەن يمپورتتاۋشىلارعا «قدب» اق قۇرالدارى ارقىلى نەسيە بەرۋگە);
3. «KazakhExport ESC» اق جارعىلىق كاپيتالىن ۇلعايتۋ جانە مەملەكەتتىك كەپىلدىكتەردىڭ جاڭا ءتۇرىن ەنگىزۋ;
4. وتاندىق ەكسپورتتاۋشىلارعا كولىك شىعىندارىنىڭ ءبىر بولىگىن وتەۋ تەتىگىن ەنگىزۋ;
5. ءداستۇرلى تيپتەردى كۇشەيتۋ جانە سەرۆيستىك قولداۋدىڭ جاڭا قۇرالدارىن ەنگىزۋ.
2021 جىلعا دەيىن كۇتىلەتىن ەكسپورتتىق پايدا ءوسىمى — 725 ملرد تگ.
2019 جىلى سەرۆيستىك قولداۋدىڭ جاڭا شارالارىن ەنگىزۋ ءۇشىن ورتالىق ازيا، قحر، تۇركيا، ءباا ەلدەرىندە ساۋدا وكىلدىكتەرىن اشۋ جوسپارلانىپ وتىر. بۇل وكىلدىكتەردىڭ ماقساتى — قازاقستاندىق ەكسپورتتاۋشىلاردى شەتەلدە قولمەن سۇيەمەلدەۋ.
سونىمەن قاتار سىرتقى نارىقتارعا قولجەتىمدىلىكتى جەڭىلدەتۋ ءۇشىن شەتەلدىك تەحنيكالىق رەگلامەنتتەر مەن تالاپتاردى مەملەكەتتىك جانە ورىس تىلدەرىنە اۋدارۋ جوسپارلانىپ وتىر. export.gov.kz پورتالى ەكسپورتتاۋشىلارعا مەملەكەتتىك قولداۋ الۋدى جەڭىلدەتۋ ءۇشىن جاڭارتىلعان، وندا ءاربىر كاسىپكەر ەكسپورتتى ىلگەرىلەتۋگە بايلانىستى قىزمەتتەردى الا الادى، سونداي-اق ساۋدا-ەكونوميكالىق ميسسيالارعا قاتىسۋعا ءوتىنىم بەرە الادى. بۇدان وزگە، پورتالدى جەتەكشى نارىقتارمەن، لوگيستيكالىق قىزمەتتەر ديسپەتچەرلەرىمەن جانە ەلەكتروندىق كەدەندىك دەكلاراتسيالاۋ جۇيەسىمەن بىرىكتىرۋ جوسپارلانىپ وتىر.
قحر، ءباا جانە يراننىڭ نارىقتارىنا كىرۋدى جەڭىلدەتۋ ءۇشىن وسى ەلدەردەن ينسپەكتسيالىق كوميسسيالارىن قازاقستاندىق ەكسپورتتاۋشىلاردىڭ كاسىپورىندارىنا بارۋ ءۇشىن شاقىرۋ جوسپارلانۋدا. سونىمەن قاتار، وسى جىلى قر يدم شەتەلدىك ساتىپ الۋشىلاردى (Metro (قىتاي، رەسەي، تاياۋ شىعىس), Migros (تۇركيا), اشان (رەسەي، ەو), Wumart (قىتاي), Vanguard (قىتاي), Yonghui (قىتاي) وتاندىق تاۋار وندىرۋشىلەرمەن كەزدەسۋ ءۇشىن شاقىرۋدى جوسپارلاۋدا.
«ناقتى جوسپارلار بار. قازاقستاندا جىل سايىن سىرتقى نارىقتاردا 8-10 ءونىم ءتۇرى كوبەيتىلەدى. بۇل جاڭا ونىمدەر بولماسا، ونەركاسىپتىك اۋقىمعا شىعامىز. بيىل ەكسپورت شەكاراسىن كەڭەيتۋ كوزدەلگەن. جالپى جۇمىس وڭ قارقىنمەن جۇرگىزىلىپ جاتىر. جوعارىدا اتالعان شارالار تابىستى جۇزەگە اسىرىلسا، ەكسپورت كولەمى 2022 جىلعا قاراي 1,5 ەسەگە ارتادى»، — دەپ تۇيىندەدى ا. قابىكەنوۆ.
دەرەككوز: primeminister.kz
Abai.kz
