تۇركيا ءبىلىم مينيسترلىگىنە تىكەلەي باعىنىشتى ءبىلىم ورداسى قىعىزستاندا بىرنەشە جىل رۇقساتسىز جۇمىس ىستەپ كەلگەن. قىرعىزستان سىرتقى ىستەر مينيسترلىگىنىڭ مالىمەتىنە سايكەس قىرعىزستاندا اتالعان تۇرىك مەكتەبىن اشۋ تۋرالى رۇقساتتاما جوق. ۇكىمەتارالىق كەلىسىم دە جاسالماعان. بىشكەك اكىمدىگىنىڭ حابارلاۋىنشا، ءتىپتى بۇل مەكتەپتىڭ قۇرىلىسىنا دا رۇقسات بەرىلمەگەن. بۇعان قاراماستان اتالعان تۇرىك مەكتەبى 2 گەكتار جەردى ءوز يەلىگىنە الىپ 1995 جىلدان بەرى جۇمىس ىستەپ كەلەدى. مەكتەپ جانىندا بالاباقشا مەن ليتسەي دە ورنالاسقان.

بۇل جايىندا vesti.kg سايتى جازادى. بۇل تۋرالى قىرعىز دەپۋتاتتارى دا دابىل قاقتى.

جانجالعا تولى وقيعا تۋرالى مەكتەپ وقۋشىسىنىڭ اناسى جاننا (ەسىم اۋىستىرىلعان) تولىقتاي تارقاتىپ بەردى. بۇعان دەيىن وقۋشىنىڭ اناسىنا «اۋىز باستىرىق» ءۇشىن اقشا ۇسىنعان كورىنەدى. 9 جاسار بالاعا «سەكسۋالدىق زورلىق» كورسەتكەن بىشكەكتەگى ۋنيۆەرسيتەت ىشىندەگى تۇرىك مەكتەبىنىڭ باسشىسى بۇعان دەيىن وزگە وقۋشىلارعا دا ءجابىر كورسەتكەن.  جاننانىڭ ايتۋى بويىنشا ومەر ايدىن اتالعان مەكتەپتى ءبىر جارىم جىل بۇرىن باسقارعان. ول تۇرىك مەكتەبىنىڭ باسشىلىعىنا كەلگەن ۋاقىتتان باستاپ مەكتەپ ىشىندە بەيبەرەكەت باستالعان كورىنەدى.  وتكەن جىلى ءبىر ايەل ونىڭ ەكى نەمەرەسىنە مەكتەپ ديرەكتورىنىڭ سەكسۋىلدىق ازعىندىق جاساماق بولعانىن ايتىپ شاعىمدانعانىمەن، ءىس جۇزىندە ەش دالەلدەي الماعان. «سوڭىندا ديرەكتور سۇتتەن اق، سۋدان تازا بولىپ شىعا كەلدى»، - دەيدى جابىرلەنۋشىنىڭ اناسى.

«مەنىڭ ۇلىما ەكى رەت جامان نيەتتە «تيىسپەك» بولدى. بۇل جاعداي سوڭعى رەت ورىن العاندا ومەر ايدىن ۇلىمدى زورلاماق بولعان، باقىتىنا وراي بالا ءدال ۋاقىتىندا قاشىپ ۇلگەرگەن. قازىرگى ۋاقىتتا سەكسۋالدىق زورلىق كورسەتۋ فاكتىسىنە بايلانىستى تەرگەۋ جۇرگىزىلىپ جاتىر. تەرگەۋ ىسىنە قاجەتتىلىگى تۋىنداۋى مۇمكىن دەگەن ماقساتتا وقيعانى تولىققاندى بايانداپ بەرە الامىن. ەڭ باستىسى بالانىڭ بۇل جايتتان قاتتى شوشىنعانىن، ايتقىم كەلەدى. بۇگىندە بالاممەن پسيحولوگتار جۇمىس جاساۋدا. ۇلىم ءتىپتى تۋىس ەر كىسىلەردەن دە مەكتەپكە قايتا بارۋدان دا قورىقادى. ءبىز لەنين اۋداندىق پوليتسيا بولىمشەسىنە ارىزىمىزدى قالدىردىق»، - دەيدى.

تۇركيا ەلشىسىنىڭ كەڭەسشىسى  ومەر ايدىننىڭ اۋىلداسى ەكەنىن ناقتىلانعان

بالانىڭ اناسى مەكتەپ ديرەكتورىنىڭ بۇل ارەكەتىن قىرعىزستانداعى تۇركيا ەلشىلىگى جاۋىپ، جاسىرىپ وتىر دەپ ايىپتايدى. ءتىپتى قىرعىزستانداعى تۇركيا ەلشىسىنىڭ كەڭەسشىسى  ومەر ايدىننىڭ اۋىلداسى ەكەنىن ناقتىلانعان.

«ماعان بۇل جايتتى قايتا قوزعاماۋىم ءۇشىن قىرعىزستانداعى تۇركيا ەلشىلىگىنىڭ وكىلدەرى اقشا ۇسىندى، الايدا مەن باس تارتتىم»، -  دەيدى جاننا. قازىرگى ۋاقىتتا تۇرىك مەكتەبىندە 200-دەن استام قىزعىز ازاماتتارى ءبىلىم الۋدا.

«كوپتەگەن اتا-انالار بالالارىنىڭ مەكتەپتەن شەتتەتىلىپ وزدەرىنە تۇركياعا كىرۋگە تىيىم سالىناتىن بولعاندىقتان مەكتەپ ديرەكتورىنىڭ ۇستىنەن شاعىندانىپ ارىز جازۋعا قورقادى. بۇرىنعى مەكتەپ ديرەكتورى مەن مۇعالىمدەرىنە ەشقانداي ارىز-شاعىمىمىز جوق بولاتىن. مەكتەپ ىشىندەگى كەلەڭسىزدىكتەر ومەر ايدىن باسشىلىققا كەلگەننەن كەيىن باستالدى.   سونىمەن قاتار جاننا اتالعان تۇرىك مەكتەبىنىڭ قازىرگى تاڭدا زاڭسىز جۇمىس ىستەپ وتىرعانىنا سەنىمدى. بۇل ماسەلەدە ءبىلىم مينيسترلىگىنە جۇگىنگەن بولاتىنبىز، الايدا مينيسترلىك بۇل مەكتەپتىڭ جۇمىسى تۋرالى ەشتەڭەدەن حابارسىز بولىپ شىقتى دەيدى.مەكتەپ اكىمشىلىگى ازاماتتاردى قىرعىزستان ازاماتتىعىنان باس تارتىپ تۇركيا ازاماتتىعىن الۋعا ماجبۇرلەيدى. ومەر ايدىن بۇگىندە بىزگە يگيل جەتىسپەيدى دەپ تە ايتقان بولاتىن. بۇل سوزىمە كۋاگەر بولاتىندار جەتەرلىك. ونىڭ ايتۋى بويىنشا ءبىز تىم ەركىنسىپ كەتكەنبىز. وعان ايەلدەردىڭ شالبار نەمەسە دجينسى كيىپ جۇرگەنى ۇنامايتىن» دەيدى.

جاننا مەكتەپ ديرەكتورى ومەر ايدىننىڭ وزىنەن جانە ۇلىنىڭ الدىندا رەسمي تۇردە كەشىرىم سۇراۋىن تالاپ ەتەدى.  الايدا قازىرگى ۋاقىتتا ومەر ايدىننىڭ ەلدەن قاشىپ كەتكەندىگى تۋرالى اقپاراتتى راستايدى.

جانار تىلەۋبەردى

Abai.kz