سەيسەنبى, 25 اقپان 2020
ساڭلاق 1871 1 پىكىر 28 اقپان, 2019 ساعات 13:40

اتاقتى شاڭعىشى اۆستريادا دوپينگ تەكسەرىسى كەزىندە ۇستالدى

كەشە، 27 اقپان كۇنى اۆستريانىڭ زەەفەلد قالاسىندا الەم چەمپيوناتىنا قاتىسىپ جاتقان قازاقستاندىق شاڭعىشى الەكسەي پولتورانين دوپينگكە قارسى ەرەجەلەردى بۇزدى دەگەن كۇدىككە ىلىكتى.

اۆستريا پوليتسياسى جۇرگىزگەن دوپينگكە قارسى رەيد كەزىندە توعىز ادام ۇستالعان.

ۆەدومستۆونىڭ رەسمي مالىمدەمەسىندە، ۇستالعانداردىڭ بەسەۋى سپورتشى ەكەنى، ونىڭ ىشىندە اۆستريا مەن ەستونيادان ەكىدەن، قازاقستاننان ءبىر سپورتشى بار ەكەنى ايتىلعان. كەيىن ۇستالعان قازاقستاندىقتىڭ الەكسەي پولتورانين ەكەنى انىقتالدى.

قازاقستان ۇلتتىق قۇراماسىنىڭ كوشباسشىسى پولتورانين كەشە كلاسسيكالىق ستيلدە 15 شاقىرىمدىق جارىسقا قاتىسۋى كەرەك بولاتىن. الايدا ول جارىس جولىنا شىقپادى. وسىعان قاراپ ماماندار الەكسەيدىڭ دوپينگ داۋىنا ۇشىراعانىن بولجاعان. كەيىن بۇل بولجامنىڭ شىن ەكەنى انىقتالدى.

بۇگىن قازاقستان شاڭعى سپورتى تۇرلەرى فەدەراتسياسى الەكسەي پولتورانينگە قاتىستى اقپارات بەردى.

- ەگەر ونىڭ دوپينگ قولدانعانى شىن مانىندە راستالسا، فەدەراتسيا بۇل تۋرالى رەسمي مالىمەت جاريالايدى. ءبىز دوپينگ قولدانۋعا «نولدىك توزىمدىلىك» ساياساتىن ۇستانامىز. ادىلەتسىز ادىستەرمەن جەڭىسكە جەتۋگە جانە تىيىم سالىنعان نەگىزدەمەلەرگە تۇبەگەيلى قارسىمىز. بىراق ءپولتورانيننىڭ دوپينگكە قارسى ەرەجەلەردى بۇزعانى تولىعىمەن دالەلدەنبەيىنشە جانە فەدەراتسيا WADA, حوك، FIS سەكىلدى ۇيىمداردىڭ الەكسەيگە رەسمي تۇردە ايىپ تاققانىنا كوز جەتكىزبەيىنشە، ءبىز سپورتشىمىزدى قورعايتىن بولامىز, - دەدى شاڭعى سپورتى تۇرلەرى ۇلتتىق فەدەراتسياسىنىڭ ءباسپاسوز-حاتشىسى سامال ناۋرىزوۆا.

Abai.kz

1 پىكىر