اقش پرەزيدەنتى دونالد ترامپ پەن سولتۇستىك كورەيا پرەزيدەنتى كيم چەن ىننىڭ سارسەنبى كۇنى ۆەتنامدا بولعان ىسكەرلىك تۇسكى اسى كەيىنگە شەگەرىلگەن. دونالد ترامپ پەن كيم چەن ىن  ەكى كۇندىك كەزدەسۋدە ءوزارا كەلىسىمگە كەلە الماعان، - دەپ حابارلايدى اق ءۇي.

اقش پرەزيدەنتى دونالد ترامپ پەن كحدر توراعاسى كيم چەن ىننىڭ حانويدا وتكەن كەزدەسۋى «جاقسى ءارى كونسترۋكتيۆتى» بولعان. بۇل تۋرالى ەكى ەلدىڭ باسشىسى مالىمدەدى. «قازىر ەكى جاق كەلىسىمگە كەلگەن جوق، بىراق ولاردىڭ كوماندالارى مۇنى اسىعا كۇتىپ وتىر» دەلىنگەن اق ءۇيدىڭ حابارلاماسىندا.

كەزدەسۋ ناتيجەسىنە سۇيەنسەك، ەكى جاقتى دەكلاراتسياعا قول قويىلماۋى مۇمكىن. ال سامميت باعدارلاماسى بەلگىلەنگەن ۋاقىتتان ەرتەرەك اياقتالادى دەپ بولجام جاسالىپ وتىر.

سولتۇستىك كورەيانىڭ دەنۋكلەاريزاتسيالانۋى مۇمكىن بە؟

بۇعان دەيىن كيم چەن ىن اقش پرەزيدەنتى دونالد ترامپپەن ەكىنشى كۇنى كەزدەسۋدە يادرولىق قارۋدان باس تارتۋعا دايىن ەكەنىن مالىمدەگەن بولاتىن. قوس باسشى دا دوڭگەلەك ۇستەلدە پىكىر الماسىپ، دەنۋكلەاريزاتسياعا قاتىستى ورتاق شەشىمگە كەلۋگە تىرىستى.

«يادرولىق قارۋدان باس تارتۋعا دايىنسىز با؟» دەگەن جۋرناليستەردىڭ سۇراعىنا كيم چەن ىن: «ەگەر مەن دايىن بولماسام، مۇندا كەلمەس ەدىم» دەپ جاۋاپ بەرگەن. الايدا، سولتۇستىك كورەيا باسشىسى دەنۋكلەاريزاتسيانى قالاي جۇزەگە اسىراتىنىن جانە قانداي شارالار قولداناتىنىن اشىپ ايتپادى.

اقش ءوز تاراپىنان كحدر-ءدىڭ يادرولىق قارۋدان تولىعىمەن باس تارتقانىن، ال كحدر بۇگىندە اقش-تىڭ ازيالىق وداقتاستارىن – وڭتۇستىك كورەيا مەن جاپونيانى – قورعاپ تۇرعان  يادرولىق قالقانىنان باس تارتقانىن قالايدى.

ترامپتىڭ سوزىنە سۇيەنسەك، سولتۇستىك كورەيانىڭ دەنۋكلەاريزاتسياسىنا اسىعۋدىڭ قاجەتى جوق.

«اۋەل باستان مەن ۋاقىتتى تەزدەتۋدىڭ ماڭىزدى ەمەس ەكەنىن ايتقان بولاتىنمىن. يادرولىق راكەتالاردى سىناقتان وتكىزۋ دوعارىلعانىن وتە جوعارى باعالايمىن. كيم مىرزا ەكەۋمىز دۇرىس كەلىسىم جاساعىمىز كەلەدى» دەدى ول.

كيم چەن ىننىڭ ترامپپەن كەلىسىم-شارتقا قول قويۋ ماسەلەسى جۇمباق كۇيدە قالدى.

«ءالى ءبىر نارسە ايتۋعا ەرتە. بىراق، مەن پەسسيميست ەمەسپىن. بىزدە جاقسى ناتيجە بولادى دەپ ويلايمىن» دەدى كيم چەن ىن.

جۋرناليستەردىڭ كيم چەن ىنعا قاراتا قويىلعان «ادام قۇقىقتارى تۋرالى ماسەلە تالقىلاندى ما؟» دەگەن سۇراعىنا ترامپ: «ءبارىن تالقىلادىق» دەپ جاۋاپ بەردى.

«بىزدە پرودۋكتيۆتى پىكىرتالاس بولدى. قارىم-قاتىناسىمىز  ادەتتەگىدەي، مۇمكىن ودان الدەقايدا جاقسى» دەدى ول.

سالتانات ءشىنادىل

Abai.kz