قۇرىلتايدىڭ «بولعانىنان بولادىسى قىزىق بولدى». بۇعان دەيىن  «اباي.كز» اقپاراتتىق پورتالىندا كوتەرىلگەن «قازاق تاعدىرىن شەشپەيتىن قازاق قۇرىلتايى بولا ما؟» دەگەن تۇرعىداعى سۇراققا جاۋاپتى 25 مامىردا باستالعان دۇنيەجۇزى قازاقتارىنىڭ IV قۇرىلتايى بەرە باستادى. كوڭىلىمىز كۇپتى بولارلىق كورىنىستى جۇرتتان ءسۇيىنشى سۇراعانداي حابارلاۋىمىز دۇرىس بولماس، بىراق جان جابىرقاتار  جايتتى جاسىرا المايمىز.

پرەزيدەنتىمىز نۇرسۇلتان نازارباەۆتىڭ «قازاقستان - الەمدەگى بارشا قازاقتىڭ قۇتتى قارا شاڭىراعى» دەگەن تەزيسكە قۇرىلتاي بارىسىندا كوزىمىزدى جەتكىزگىمىز كەلگەنى راس ەدى. بىراق...

جيىنعا جينالعان جۇرت كازىرگى استانالىق ادەتكە اينالعان قالىڭ تەكسەرىسكە تاپ بولىپ، ۇزىن شيراتقا تۇرعانىن، ورىس تىلىندە قوقاڭداعان قاۋىپسىزدىك مەكەمەسىنىڭ قازاق جىگىتتەرىنىڭ سونداي جاتباۋىر تۇرىنەن شوشىنا، تاۋەلسىزدىك سارايىنا كىرگەنىمىز اۋەلگى اۋەيى كوڭىلىمىزدى ساپ باسقانىن كىمگە ايتىپ جاتايىق. ونداي-پۇندايعا ۇيرەنگەن سابيكوكەي  قازەكەڭنىڭ كوڭىلىن ەشتەڭە دە جابىرقاتپادى، كورمەگە قويارداي الاشتىڭ كوپتەن كورىسپەگەن اتپال ازاماتتارى مەن ازاماتشالارى، ىعاي مەن سىعايلارى ءبىر بىرىمەن شۇرقىراي سالەمدەسىپ، ەلسارايدىڭ ءىشى حانبازارعا اينالدى دا كەتتى...

قۇرىلتايدىڭ «بولعانىنان بولادىسى قىزىق بولدى». بۇعان دەيىن  «اباي.كز» اقپاراتتىق پورتالىندا كوتەرىلگەن «قازاق تاعدىرىن شەشپەيتىن قازاق قۇرىلتايى بولا ما؟» دەگەن تۇرعىداعى سۇراققا جاۋاپتى 25 مامىردا باستالعان دۇنيەجۇزى قازاقتارىنىڭ IV قۇرىلتايى بەرە باستادى. كوڭىلىمىز كۇپتى بولارلىق كورىنىستى جۇرتتان ءسۇيىنشى سۇراعانداي حابارلاۋىمىز دۇرىس بولماس، بىراق جان جابىرقاتار  جايتتى جاسىرا المايمىز.

پرەزيدەنتىمىز نۇرسۇلتان نازارباەۆتىڭ «قازاقستان - الەمدەگى بارشا قازاقتىڭ قۇتتى قارا شاڭىراعى» دەگەن تەزيسكە قۇرىلتاي بارىسىندا كوزىمىزدى جەتكىزگىمىز كەلگەنى راس ەدى. بىراق...

جيىنعا جينالعان جۇرت كازىرگى استانالىق ادەتكە اينالعان قالىڭ تەكسەرىسكە تاپ بولىپ، ۇزىن شيراتقا تۇرعانىن، ورىس تىلىندە قوقاڭداعان قاۋىپسىزدىك مەكەمەسىنىڭ قازاق جىگىتتەرىنىڭ سونداي جاتباۋىر تۇرىنەن شوشىنا، تاۋەلسىزدىك سارايىنا كىرگەنىمىز اۋەلگى اۋەيى كوڭىلىمىزدى ساپ باسقانىن كىمگە ايتىپ جاتايىق. ونداي-پۇندايعا ۇيرەنگەن سابيكوكەي  قازەكەڭنىڭ كوڭىلىن ەشتەڭە دە جابىرقاتپادى، كورمەگە قويارداي الاشتىڭ كوپتەن كورىسپەگەن اتپال ازاماتتارى مەن ازاماتشالارى، ىعاي مەن سىعايلارى ءبىر بىرىمەن شۇرقىراي سالەمدەسىپ، ەلسارايدىڭ ءىشى حانبازارعا اينالدى دا كەتتى...

بەس جىلدان كەيىن باس قوسقان قۇرىلتاي باستالىپ، ءسوزدى الاشتىڭ اقساقالىنا اينالعان، قازاقستان پرەزيدەنتى نۇرسۇلتان نازارباەۆ الدى. ول قازاقستاننىڭ جيىرما جىلدىق جەڭىسى مەن جەمىسىن بايانداپ، جۇرت ونىڭ ءسوزىن اۋىق-اۋىق دۋ قول شاپالاقپەن ءۇزىپ وتىردى. پرەزيدەنت «نۇرلى كوش» باعدارلاماسىنىڭ جاڭا ساتىسى كەلەر جىلدان باستالارىن، وعان مول قارجى ءبولىنىپ، اسىرەسە، شەتتەن ورالاتىن قازاق جاستارىنا جول اشىلارىن باياندادى. دەسەك تە، تالاي الەمدى استاناعا جيىپ سويلەگەندە كوسىلەتىن قازاق كوسەمىنىڭ داۋىسىنان جارقىندىق اڭعارىلمادى. مىنبەگە شىققان ءتۇرى كەلىسكەن قىتايلىق تىلەپالدى اعامىز قىتاي كومپارتياسىنىڭ سەزىندە وقىلار بايانداماسىن شاتاستىرىپ الدى ما، الدە رەتى سولاي ما، سىقىيعان سوزدەردى اعىتىپ، بىزگە ۇمىت بولعان جارىقتىق كسرو جيىنىن ەسكە ءبىر سالىپ ءوتتى. وعان نە دەرسىڭ، قازاقتاردى باقىلاپ، قىتايلىق دەلەگاتسيا سوڭىندا ءۇش-ءتورت قىتاي ازاماتتارى بىرگە كەلىپتى.

سونىمەن، دۇنيەجۇزى قازاقتارى قاۋىمداستىعىنىڭ توراعاسىنان كەيىن ءتورت بەس ادام ءسوز الىپ، اقىرى ءۇزىلىس جاريالاندى. قۇرىلتايدى ۇزۋگە ارانداتقان رەسەيلىك قازاق قىز (ايەل دەۋگە اۋىز بارمايدى) نۇرعايشا بارىنقىزىنىڭ ميلليوننان اسا رەسەيدەگى قازاقتاردا ەكى-اق مەكتەپ بارىن، مادەني-رۋحاني ماسەلەلەردى، رەسمي بەكىتىلگەن «كەزەكشى ءماتىندى» بىتىرە سالا اعىتقانى سەبەپ بولسا كەرەك.

ءبىر ءبىرىن جاڭا كورگەن جۇزدەگەن قازاق ءۇزىلىستى فوتولاسۋعا جۇمساپ، كورىسۋدى ودان ءارى جالعادى. شەتەلدەن كەلگەن قازاق جاستارى نۇراعامەن سۋرەتكە ءتۇسىپ قارىق بولدى. الايدا، ول كىسىنىڭ ۇزىلىستە كەتىپ قالعانىن توردەگى ورىننىڭ بوساعانىنان ءبىر-اق  بىلدىك.

ۇزىلىستەن سوڭ ءتورت بەس ادام ءسوز الدى. ءسوز جازۋشى سماعۇل ەلۋبايعا بەرىلگەندە كۇبىر-سىبىر زال باسىن كوتەرىپ ەلەڭدەستى. سمەكەڭ ءسوزىن بارىنشا قازاقى جايتتارعا اۋدارعان بولدى، ۇرىمجىدەگى قازاق كونسۋلدىعىنىڭ باسشىلارى قىزمەتتەن كەتكەنى جونىندە حابارلاپ، قىتايلىق قازاقتاردىڭ وتانعا ورالۋىنا ساڭىلاۋ اشىلعانىن جەتكىزدى. الايدا، زيالى اعامىز كوسىلىپ، قازاق ماسەلەسىن اشۋ مەن شەشۋگە بارا الماي، ءسوزىن جىلدام ءبىتىردى. اسىرەسە، ماجىلىسمەن كوكەمىز ءۋاليحان قاليجان ءوز سوزىندە ەلباسىنىڭ بارلىق جەتىستىگى مەن تۇلعاسىن تۇرپاتتاپ تۇرىپ الدى. نۇراعامىزدىڭ تۇلعاسىنا كۇمانمەن قاراعان ادام بولماسا دا، ۋاكەڭنىڭ مول ءسوزى بار قازاقتان گورى ءبىر قازاققا عانا ويىسقانى ءبىر ءتۇرلى بولدى... ودان كەيىن مىنبەگە كوتەرىلگەن جۋرناليست اعامىز ساۋىتبەك ءابدىراحمانوۆ اعاي دا وسىدان جيىرما جىل بۇرىنعى بولعان دۇنيەجۇزى قازاقتارىنىڭ العاشقى قۇرىلتايىن وتكىزۋ يدەياسىنىڭ اۆتورى نۇرسۇلتان ءابىشۇلى ەكەنىنە جۇرتتى سەندىرۋمەن الەككە ءتۇستى. مۇنىڭ ءبارى نەگە كەرەك ەكەنىن ءسوزدى مەملەكەتتىك حاتشى قانات  ساۋداباەۆ مىرزا العاندا ۇققانداي بولدىق. ول اتالعان قۇرىلتاي ماڭىزىن اشۋعا ءبىرشاما ءسوزىن ارناۋ كەزىندە اۋىزىنا «دۇنيەجۇزىلىك قازاقستان قۇرالتايى» دەگەن تىركەستىڭ ءتۇسۋىن بايقامادى ما، كوپ قازاقتىڭ جينالعانىنا تولقىدى ما، الدە ءتىلىنىڭ كەلگەنى سول ما، ايتەۋىر، جۇرتتى كۇبىرلەتىپ بارىپ، اقىرىندا قاۋىمداستىق تورالقا توراعاسىنا تاعى دا بەس جىلعا نۇلسۇلتان نازارباەۆ كانديداتۋراسىن ۇسىندى. ۇسىنىس ءبىراۋىزدان قابىلداندى. 1-ورىنباسارلىق ورىنعا دا تالعات ماماشەۆ مىرزا قايتا وتىرىپ، قاۋىمداستىقتىڭ سالتاناتتى جيىنىن جاۋىپ تىندى.

ودان ءارى كونگرەسس-حولدا قۇرىلتاي قاتىسۋشىلارىنا ارنالعان تۇسكى اس بەرىلدى. الايدا، ونى «تۇسكى اس» دەگەننەن گورى ادەتتەگى شارالاردا وتەتىن شاي-ءۇزىلىس دەۋگە بولار - مەيماندارعا ىستىق اس بەرىلمەدى. بىلتىرعى وبسە كەزىندەگى توننالاعان تاعامنىڭ قازاقتىڭ باس جيىنىنا قاتىسۋشىلاردىڭ تۇسىنە دە كىرمەگەنى ءمالىم بولدى.

سونىمەن، قۇرىلتاي جالعاسۋدا، باعدارلاما بويىنشا قاشان جابىلارى بەلگىسىز. سەبەبى، ون كىسىنىڭ عانا ءسوز الىپ، شالا سويلەگەنىن قۇرىلتايدىڭ كۇن ءتارتىبى دەۋگە كەلمەيدى: ەشبىر ماسەلە كوتەرىلىپ، ونىڭ شەشىلۋى تالقىعا تۇسكەن جوق جانە ت.ماماشەۆتىڭ سوزىمەن ايتقاندا سالتاناتتى جيىن عانا جابىلدى، ال قۇرىلتاي جابىلدى دەپ جاريالانعان جوق.

بۇگىن، ياعني 26 مامىردا شەتەلدىك قازاقتار استانانىڭ كورىكتى ورىندارىن ارالاپ، «ەتنواۋىلدى» تاماشالايدى، قالا اكىمىنىڭ قابىلداۋىندا بولىپ، مينيسترلىكتەردە كەزدەسۋلەر وتكىزەدى، ودان ءارى سپورت كەشەندەرىنە بارادى; 27 مامىردا شەتەلدىك قانداستارىمىز ۇلتتىق سپورت ويىندارىن تاماشالايدى، قولونەر شەبەرلەرىنىڭ كورمەسىن كورەدى، ودان ارى جىر ءمۇشايراسى مەن قازاق جاستارىنىڭ كونتسەرتى، سوسىن كەشكە قاراي «ديسكوتەكا»; 28-نە قوناقتاردى شىعارىپ سالۋ - وسىمەن ءبىتتى!

قورىتا كەلگەندە، بولىپ وتكەن شارا - «دۇنيەجۇزى قازاقتارىنىڭ قۇرىلتايى ما، الدە شەتەلدىك قازاق دەلەگاتسيالارىنىڭ استاناعا كەلىپ كەتۋى مە؟» دەگەن ساۋال تۋىندادى. ونى وقىرماننىڭ ءوزى باعامداسىن.

«اباي اقپارات»،

قازاقستان. استانا. تاۋەلسىزدىك سارايى - كونگرەسس-حول