كەشە پرەزيدەنت قاسىم-جومارت توقاەۆ انت قابىلداپ بولىسىمەن، مەملەكەت استاناسىنا نۇرسۇلتان نازارباەۆتىڭ ەسىمىن بەرۋ كەرەك دەگەن ۇسىنىس ايتقان ەدى. 

پرەزيدەنتتىڭ ۇسىنىسىن پارلامەنت ماقۇلداعان سوڭ، استانا قالاسىنىڭ اتاۋى نۇر-سۇلتان قالاسى بولىپ وزگەرگەن ەدى.

بۇگىن باس قالانىڭ باسشىسى باقىت سۇلتانوۆ قالا اتاۋىنىڭ وزگەرۋىنە قاتىستى ەكى اۋىز پىكىرىن ايتىپتى. ەلورداداعى ناۋرىز مەرەكەسىن تويلاۋعا بارعان باكەڭ، ونداعى ءوزىن كۇتكەن جۇرتقا سوڭعى جاڭالىقتاردى ايتىپ تۇسىندىرۋگە تىرىسىپتى.

ء"بىز بارلىعىمىز دا استانا تۇرعىندارىمىز. ال مەن قازاقستان رەسپۋبليكاسىنىڭ استاناسى - نۇر-سۇلتان قالاسىنىڭ اكىمىمىن.

مەن پرەزيدەنت توقاەۆتىڭ ەلدىڭ باس قالاسىنىڭ اتاۋىن وزگەرتىپ، تۇڭعىش پرەزيدەنت، جاڭا قازاقستاننىڭ نەگىزىن قالاۋشى ادامنىڭ قۇرمەتىنە ونىڭ ەسىمىن ۇلىقتاۋ تۋرالى شەشىمى دۇرىس دەپ ەسەپتەيمىن. بۇل ارقىلى ءبىز، تاۋەلسىز ەلدىڭ ازاماتتارى بارلىعى ءۇشىن ەلباسىنا قۇرمەتىمىزدى كورسەتەمىز. ول ءبىزدىڭ ەلىمىز ءۇشىن بارلىعىن جاسادى. استىن سىزىپ ايتامىن، مەملەكەتىمىزدىڭ نەگىزىن قالاۋداعى ءرولى ەرەكشە", دەپتى اكىم باقىت سۇلتانوۆ.

اكىم قالا اتاۋىنىڭ وزگەرۋى كەزەڭ-كەزەڭىمەن جۇرگىزىلەتىنىن دە ايتقان.

سونداي-اق، باس قالاداعى باستى نىساندار - "استانا وپەرا", "استانا-ارەنا", باسقا دا سپورت عيماراتتارى مەن نەگىزگى وبەكتىلەردىڭ اتاۋى وزگەرمەيتىنى بەلگىلى بولدى.

Abai.kz