ەسىمى كۇللى الەمگە تانىلا باستاعان، قازاقتىڭ ماڭدايىنا بىتكەن اسا تالانتتى ءانشىسى ديماش قۇدايبەرگەن ءتول مەرەكەمىز - ناۋرىزدا ماسكەۋ شاھارىنىڭ ونەر سۇيەر قاۋىمىن تاعى دا ءدۇر سىلكىندىردى.

22 جانە 23 ناۋرىزدا رەسەي استاناسىندا وتكەن ەكى بىردەي جەكە كونتسەرتى تالاي جۇرتتىڭ ەسىندە قالارى ءسوزسىز. وندا قازاقتىڭ قاسيەتتى دومبىراسىنان كۇي توگىلىپ، اسەم ءان شىرقالدى. ديماشتىڭ قازاق، ورىس، اعىلشىن، فرانتسۋز جانە قىتاي تىلىندەگى شىرقاعان اندەرى ماسكەۋ اسپانىندا قالىقتاپ تۇردى دەسەك، ارتىق ايتپاسپىز.

التى مىڭ ادام ەركىن سياتىن كرەمل سارايىندا ينە شانشار جەر قالمادى. بۇل كونتسەرتكە تمد ەلدەرىن ايتپاعاندا، شەتەلدىڭ 56 ەلىنەن 400-دەن استام جانكۇيەرلەرى جينالدى.

ءتىپتى ءانشىنىڭ ءوزى شىعارعان «ۇمتىلىماس كۇن» ءانىن بىرگە شىرقاعاندا ولار ءتىپتى ماسكەۋدە ەمەس قازاق ەلىندە وتىرعانداي كۇي كەشتىك. ديماشتىڭ ءوزى بولسا، بۇل جولى دا قازاقتىڭ ءان ونەرىن عانا ەمەس، كيەلى ءداستۇرىمىزدى دە، سالت-سانامىزدى دا ناسيحاتتاۋدان جالىقپادى. ساحنا تورىنە الدىمەن اتا-اجەسىن شاقىرىپ، ءوزىنىڭ سولاردىڭ قولىندا وسكەندىگىن، مۇنىڭ ءوزى قازاق حالقىنىڭ عاسىر قويناۋىنان جەتكەن جاقسى سالتى ەكەندىگىن ايتىپ، ءوزىن قاشاندا قازاق حالقىنىڭ قولداپ وتىراتىندىعىن، سوندىقتان دا ءوزىن قازاق ەكەندىگىن ماقتان تۇتاتىندىعىن ەرەكشە سەزىممەن جەتكىزدى. ۇلكەنگە دەگەن ىزەتىن پاش ەتتى. قازىر ءوزىنىڭ  قولتىعىنان دەمەپ جۇرگەن رەسەيدىڭ عانا ەمەس، وزگە جۇرتقا دا كەڭىنەن ءمالىم سازگەر ءارى پروديۋسسەر يگور كرۋتويدى ساحناعا شاقىرىپ، ونىڭ جاڭا ءانىن ناقىشىنا كەلتىرىپ ورىنداپ شىقتى.

جالپى وسىناۋ ءۇش ساعاتقا سوزىلعان قازاقتىڭ ءان ونەرى سالتانات قۇرعان كونتسەرتتىڭ جۇرت كوڭىلەنەن شىققاندىعى سونشالىق، كونتسەرت سوڭىندا كورەرەمەندەر ونى ساحنادان ۇزاق ۋاقىت جىبەرمەي، گۇلگە كومىپ تاستادى. بۇل كونتسەرتتىڭ عالامتوردى ءاپ-ساتتە جاۋلاپ العان شولۋلارىنا قاراعاندا وعان رەسەيدەگى قازاقستاننىڭ ەلشىسى يمانعالي تاسماعانبەتوۆ مەن قازاقستاننىڭ مادەنيەت ءمينيسترى ارىستانبەك مۇقاممەديۇلى قاتىسقان. سونداي-اق ونى تاماشالاۋعا رەسەيدىڭ پرەمەر-ءمينيسترى دميتري مەدۆەدەۆتىڭ جۇبايى سۆەتلانا مەدۆەدەۆانىڭ دا ارنايى كەلگەندىگى ءمالىم بولدى. ءبىزدىڭ ەلدەن بۇل مەرەكەگە جالعىز عانا ەركە ەسماحانننىڭ بارعان كورىنەدى. وسى ورايدا «شىركىن بىزدەگى بەلگىلى-بەلگىلى دەگەن، اتاقتارى جەر جاراتىن انشىلەرىمىز وسى كونتسەرتكە ايتقىزباي كەلىپ، ماسكەۋدىڭ تورىندە وتىرىپ، وسىنداعى زىر جۇگىرىپ جۇرگەن جۋرناليستەرگە ءوز لەبىزدەرىن ءبىلدىرىپ جاتسا، قانداي جاراسىمدى بولار ەدى. ديماش سوندا مۇمكىن ءوز ەلىنىڭ ايالى الاقانىنىڭ تابىن تاعى ءبىر سەزىنىپ قالار ما ەدى» دەگەن وي كەلەدى.

مىنەكەي، ديماشتىڭ بۇكىل ماسكەۋدى دۇبىرلەتكەن ءان شەرۋى دە اياقتالدى. الايدا ونىڭ تالانتىنا تابىنعان، بۇل كونتسەرتتەن العان اسەرلەرىن ورتاعا سالۋدى وزدەرىنە پارىز ساناعان رەسەيدىڭ عانا ەمەس، شەتەلدىك بلوگەرلەردىڭ لەبىزدەرى بۇكىل عالامتوردى شارلاپ كەتتى. ال ءبىزدىڭ قازاق بلوگەرەلەرى تاعى دا ءۇنسىز. ەڭ بولماسا، سولارعا قوسىلىپ، ءبىر ماقتانىپ قالسا ارتىق ەتپەس تە ەدى. وكىنىشتى-اق.

جايبەرگەن بولاتوۆ

Abai.kz