بۇگىن قر ورتالىق سايلاۋ كوميسسياسىنىڭ وتىرىسى ءوتىپ، وندا 2019 جىلدىڭ 9 ماۋسىمىنا تاعايىندالعان كەزەكتەن تىس پرەزيدەنت سايلاۋىنا كانديدات رەتىندە قاسىم-جومارت توقاەۆتى تىركەدى. 

قر وسك حاتشىسى ءسابيلا مۇستافينانىڭ اتاپ وتۋىنشە، قاسىم-جومارت كەمەلۇلى «قازاقستان رەسپۋبليكاسىنداعى سايلاۋ تۋرالى» قازاقستان رەسپۋبليكاسى كونستيتۋتسيالىق زاڭىنىڭ 54 جانە 55-بابىنا سايكەس ءتيىستى قۇجاتتارىن وتكىزگەن.

«2019 جىلعى 9 ماۋسىمعا تاعايىندالعان قر پرەزيدەنتىنىڭ كەزەكتەن تىس سايلاۋىندا قاسىم-جومارت كەمەلۇلى توقاەۆتى قر پرەزيدەنتتىگىنە كانديدات رەتىندە تىركەۋ تۋرالى قاۋلى جوباسى دايىندالدى.  قاۋلى جوباسىندا كەلەسى ماسەلەلەر قاراستىرىلعان:  ق.ك.توقاەۆ 2019 جىلعى 9 ماۋسىمعا تاعايىندالعان قر پرەزيدەنتىنىڭ كەزەكتەن تىس  سايلاۋىندا قر پرەزيدەنتىنە كانديدات رەتىندە تىركەلسىن. پرەزيدەنتكە كانديدات ق.ك.توقاەۆقا  ءتيىستى كۋالىك بەرىلسىن. ق.ك.توقاەۆ ارناۋلى ۋاقىتشا شوتتى  اشۋ ءۇشىن «قازاقستان حالىق جيناق بانكى» اق-نا پرەزيدەنتتىككە كانديدات بولىپ تىركەلگەنى تۋرالى مالىمەتتەر ۇسىنىلسىن. باق-تا ق.ك.توقاەۆتىڭ  قر پرەزيدەنتتىگىنە كانديدات بولىپ تىركەلگەنى تۋرالى حابار جاريالانسىن»، - دەدى س.مۇستافينا.

قر ورتالىق سايلاۋ كوميسسياسىنىڭ مۇشەلەرى قاۋلى جوباسىنا داۋىس بەرىپ، ول ءبىراۋىزدان قابىلداندى.  وسىدان كەيىن قر وسك توراعاسى بەرىك يماشەۆ پرەزيدەنتتىككە كانديدات قاسىم-جومارت توقاەۆتىڭ جۇمىس ساپارىندا بولۋىنا بايلانىستى  ءتيىستى كۋالىكتى ونىڭ سەنىمدى وكىلى «Nur Otan» پارتياسى توراعاسىنىڭ ءبىرىنشى ورىنباسارى ماۋلەن اشىمباەۆقا تابىس ەتتى.

Abai.kz