بۇگىنگى تاڭدا جۇرتتىڭ كوپشىلىگىنىڭ كۇنكورىس قامىمەن ءجۇرىپ، ادامداردىڭ ءبىر-بىرىنە دەگەن قامقورلىعى، سۇرىنگەننىڭ قولتىعىنان دەمەۋ، ەشبىر قالتقىسىز كوڭىلمەن كومەك كورسەتۋ سەكىلدى اسىل قاسيەتتەردىڭ بىرتە-بىرتە ۇمىتىلىپ بارا جاتقاندىعى ءتىپتى دە قۇپيا ەمەس. مۇمكىن، بۇل ومىردە تەك پايدانى عانا ويلاۋ ءتارىزدى كاپيتاليستىك قوعامنىڭ ايىقپاس ءبىر دەرتى دە شىعار. قالاي بولعاندا دا جانىڭدا جۇرگەن جانداردىڭ ەمەس، تەك قاراقان باستىڭ عانا قامىن ويلاۋ تىرشىلىگىمىزدىڭ بۇلجىماس زاڭىنا اينالعالى قاشان.

مىنە وسىنداي جاعىمسىز جايتتارعا ابدەن قۇلاعىمىز ۇيرەنىپ، تەك ءوز كۇنىڭدى كۇيتتەۋدى سانامىزعا مىقتاپ سىڭىرگەنىمىز سونشالىقتى، الدەبىرەۋدىڭ ەشكىمنەن ەشتەڭە دە سۇراماستان، تەك جۇرەك قالاۋىمەن جاقسىلىق ىستەپ، وزگەلەرگە شاراپات تيگىزۋىن ەرەكشە قۇبىلىس سانايتىن دارەجەگە جەتتىك. ءبىر عانا مىسال. جاقىندا قوستاناي قالاسىندا جەتىم-جەسىرلەر مەن كەدەي-كەپشىككە كيىم تاراتاتىن دۇكەن اشىلدى دەگەندى ەستىپ، قايران قالعانىمىز راس. شىندىعىندا دا ءوزى جۇرتتان ءارتۇرلى كيىمدەردى ىزدەپ ءجۇرىپ جيناپ، سونان سوڭ قايمانا قازاققا تاراتۋ دەگەنگە سەنۋ دە قيىن-اۋ. الايدا بۇل راس دۇنيە ەدى. «قايىرىمدىلىق» دەگەن دۇكەنگە جەكە كاسىپكەر ساعيرا نۇرپەيىسوۆا قوجالىق ەتەدى.

— بۇل يدەيا اياق استىنان كەلدى، — دەيدى ساعيرا. — جۇرتتىڭ كوپشىلىگىندە كيىلە قويمايتىن ارتىق كيىمدەرى بار ەمەس پە؟ لاقتىرىپ تاستاۋعا قيمايسىڭ. مۇكىن ول بىرەۋلەردىڭ قاجەتىنە جارايتىن شىعار، — دەپ ىسكە كىرىسكەن.

ساعيرا اۋەلى جۇرتتى ارالاپ ءجۇرىپ، كيىمدەردى جينادى. سوسىن جالعا عيمارات تاپتى. باسپاسوزگە حابارلاندىرۋ بەردى. بۇدان قۇلاقتانعان ادامدار ەندى جاپ-جاقسى كيىمدەردى وزدەرى اكەلە باستادى. دۇكەنى بالالار مەن ۇلكەندەردىڭ كيىمدەرىنە، اياق كيىمدەرگە، كىتاپتار مەن ويىنشىقتارعا تولدى.

بۇل تاۋارلار ارينە تەگىن ەمەس. الايدا مەيلىنشە تىم ارزان، ءتىپتى سۋ تەگىن دەۋگە دە بولادى. كيىمدەردىڭ باعاسى 50 تەڭگەدەن 500 تەڭگەگە دەيىن. ال مۇنى تەگىن جاساۋعا مۇمكىندىگى جوق. ماسەلەن، دۇكەندى جالعا العانى ءۇشىن عانا ايىنا 63 مىڭ تەڭگە تولەۋگە ءماجبۇر. ونىڭ ۇستىنە كيىمدەرىن دۇكەنگە اكەلە المايتىن جاندارعا ءوزى كولىكپەن ارنايى بارىپ، جەتكىزۋى تاعى بار. كولىكتى جالداۋ، وعان كەتەتىن بەنزين اقىسى دەگەندەي، شىعىن دا از ەمەس. سوعان قاراماستان ساعيرا ەڭ تومەنگى باعانى ۇستاپ تۇرۋدى كوزدەپ وتىر.

— جاقىندا ءبىزدىڭ دۇكەنگە بەس بالاسىن ەرتكەن ءبىر ازامات كەلدى، — دەيدى ول.— ولاردىڭ بارلىعىن باستان-اياققا دەيىن كيىندىردىك. بۇل دۇنيە نەبارى 5 مىڭ تەڭگەگە ءتۇستى. الگى وتباسى قاتتى قۋانىپ قالدى، ايلىعى نەبارى 25 مىڭ تەڭگە عانا كورىنەدى. ول «بۇل اقشاعا نەبارى ءبىر بالامدى عانا كيىندىرەر ەدىم» دەپ العىسىن ايتىپ جاتىر.

مىنە ساعيرا نۇرپەيىسوۆانىڭ ەلگە كورسەتكەن «ەرلىگى» وسىنداي. بۇل دۇكەنگە قازىر وبلىس ورتالىعىنىڭ عانا ەمەس، ءوڭىرىمىزدىڭ شالعاي تۇكپىرىنەن ادامدار كەلىپ، ىزدەگەنىن تاۋىپ، العىستارىن جاۋدىرىپ جاتادى.

ءيا، ساعيرا سەكىلدى ادال جۇرەكتى جاندار تۇرعاندا حالقىمىزدىڭ بولاشاعىنان مول ءۇمىت كۇتۋگە بولار دەگەن سەنىم ۇيالايدى. اتتەڭ، حالىقتىڭ مول بايلىعىن قالتاسىنا باسقان پىسىقايلاردان مۇنداي جومارتتىقتى وسى كىسىدەن ۇيرەنۋگە نيەت بىلدىرە قويار ما ەكەن؟

جايبەرگەن بولاتوۆ، قوستاناي

Abai.kz