قازاقستان پرەزيدەنتى قاسىم-جومارت توقاەۆ قورعانىس مينيسترلىگى القاسىنىڭ كەڭەيتىلگەن وتىرىسىنا قاتىستى.

جيىنعا پرەزيدەنت اكىمشىلىگىنىڭ باسشىسى ب.ساعىنتاەۆ، پرەزيدەنتتىڭ كومەكشىسى – قاۋىپسىزدىك كەڭەسىنىڭ حاتشىسى ق.قاسىموۆ، پرەمەر-ءمينيستردىڭ ءبىرىنشى ورىنباسارى – قارجى ءمينيسترى ءا.سمايىلوۆ، ۇلتتىق ەكونوميكا ءمينيسترى ر.دالەنوۆ، سونداي-اق قورعانىس مينيسترلىگىنىڭ باسشىلىق قۇرامى قاتىستى.

قازاقستان پرەزيدەنتى – جوعارعى باس قولباسشى قاسىم-جومارت توقاەۆ ەلباسىنىڭ تۇراقتى قولداۋىنىڭ ارقاسىندا قازاقستاندا ىقشام، ءموبيلدى جانە سوعىسقا قابىلەتتى ارميا قۇرىلدى. ونىڭ نەگىزگى ميسسياسى – مەملەكەتتىڭ ەگەمەندىگى مەن اۋماعىنىڭ تۇتاستىعىن قورعاۋ ەكەنىن ايتتى.

– قارۋلى كۇشتەردىڭ باسشىلىق قۇرامىنىڭ الدىندا بولىپ جاتقان وزگەرىستەرگە بەيىمدەلۋ عانا ەمەس، سونداي-اق الدىن الۋ جۇمىستارى تۇر. بۇل قاۋىپ-قاتەرلەرگە جان-جاقتى تالداۋ جاساۋدى تالاپ ەتەدى. بۇگىندە ءبىز گەوساياسي قايشىلىقتاردىڭ شيەلەنىسە تۇسكەنىنە، جاڭا قاقتىعىستاردىڭ پايدا بولعانىنا كۋا بولىپ وتىرمىز. اسكەري ءىس-قيمىلداردى جۇرگىزۋدىڭ فورمالارى مەن تاسىلدەرى وزگەردى، دالدىگى جوعارى قارۋلار مەن باسقا دا زاماناۋي قارۋ-جاراقتاردىڭ ۇلەسى ارتتى. سوندىقتان، مەن «ايبالتا» وقۋ-جاتتىعۋى كەزىندە قورعانىس مينيسترىنە قارۋلى كۇشتەردى قۇرۋ جانە دامىتۋ تۇجىرىمداماسىنا ءتيىستى وزگەرىستەر ەنگىزۋ جونىندە تاپسىرما بەردىم، – دەدى قازاقستان پرەزيدەنتى.

مەملەكەت باسشىسى قورعانىس مينيسترلىگىنىڭ باسشىلىعىنا شەشىم قابىلداۋ ۋاقىتىن بارىنشا قىسقارتۋ ءۇشىن باسقارۋ جۇيەسىن جاڭعىرتۋدى مىندەتتەدى. سونداي-اق، روبوتتاندىرۋ، تسيفرلىق تەحنولوگيا، جاساندى ينتەللەكت جانە ۇشقىشسىز باسقارۋ جۇيەسىن ەنگىزۋدىڭ ماڭىزدىلىعىن ايتتى.

– ەڭ الدىمەن، قارۋ-جاراقتاردى تەحنولوگيالىق تۇرعىدان جەتىلدىرۋ جانە جاڭعىرتۋ ەسەبىنەن اسكەري الەۋەتتى ودان ءارى نىعايتۋدى قامتاماسىز ەتۋ قاجەت. كەشەندى قايتا قارۋلانۋ اياسىندا اسكەر قارۋ مەن تەحنيكانىڭ زاماناۋي ۇلگىلەرىمەن قامتاماسىز ەتىلەدى. قارۋلى كۇشتەر باسشىلىعى تاباندىلىق تانىتىپ، دايەكتى ءارى جۇيەلى ءتاسىل قولدانۋى جانە قارجىلىق ءتارتىپتى ساقتاۋى كەرەك، – دەدى قاسىم-جومارت توقاەۆ.

قازاقستان پرەزيدەنتى جاۋىنگەرلىك دايىندىقتىڭ دەڭگەيىن كوتەرۋ مەن شۇعىل ارەكەت ەتۋ، اسكەري ءبىلىم بەرۋ جۇيەسىن جەتىلدىرۋ ماسەلەلەرىنە ارنايى توقتالدى. ونىڭ ايتۋىنشا، وقۋ-جاتتىعۋ باعدارلامالارى ءتۇرلى جاعدايلاردى، ۇرىس جۇرگىزۋدىڭ زاماناۋي فورمالارى مەن ادىستەرىن، قارۋ-جاراق پەن تەحنيكانىڭ جاڭا تۇرلەرىن ۇيرەتىپ، قولدانۋى ءتيىس.

– مامانداردى دايارلاۋ جانە اسكەري-پاتريوتتىق تاربيە بەرۋ ىسىندە بولاشاق اسكەري ينجەنەرلەردى، ءىت ماماندارىن، روبوتتى تەحنيكالاردى، جاساندى ينتەللەكت بويىنشا مامانداردى تاربيەلەپ شىعارۋ كەرەك. ولار «SMART» دەپ اتالاتىن بۋىن. «جاس سارباز» قوزعالىسىنىڭ بازاسىندا، اسىرەسە فيزيكا-ماتەماتيكا بويىنشا تەرەڭدەتە وقىتىلاتىن مەكتەپتەردە «SMART-SARBAZ» ۇيىرمەلەرىن قۇرۋدى ۇسىنامىن، – دەدى قاسىم-جومارت توقاەۆ.

مەملەكەت باسشىسى كەلەسى اپتاعا جوسپارلانعان بىتىمگەرلىك جونىندە وتەتىن فورۋم، الداعى ۋاقىتتا قازاقستاننىڭ بەلسەندى بىتىمگەر-مەملەكەت رەتىندەگى مارتەبەسىن ارتتىرىپ، بۇل باعىتتاعى الەۋەتىنە تىڭ سەرپىن بەرەتىنىن جەتكىزدى. ونىڭ ايتۋىنشا، قازاقستان جاياۋ اسكەرلەردى عانا جىبەرمەي، بۇۇ بىتىمگەرلىك ميسسياسىنا اسا قاجەتتى ينجەنەر-ساپەر، بارلاۋشى، دارىگەرلەر قۇرامى جانە باسقا دا بولىمشەلەردى جىبەرۋ ارقىلى كوكجيەگىن كەڭەيتۋى قاجەت.

وتىرىس بارىسىندا قاسىم-جومارت توقاەۆ اسكەري ءتارتىپ پەن اسكەريلەردىڭ رۋحىن كۇشەيتۋ، ولاردى الەۋمەتتىك تۇرعىدان قامتاماسىز ەتۋ دەڭگەيىن كوتەرۋ قاجەتتىگىن اتاپ ءوتتى.

– 2017-2018 جىلدارى اسكەريلەردىڭ جالاقىلارى ءوسىپ، سىنىپتىق قوسىمشالار تولەنە باستادى. جۋىردا اسكەري ۇشقىشتاردىڭ جالاقىلارى ەكى ەسە ارتتى. جاڭا جۇيە بويىنشا اسكەريلەردى باسپانامەن قامتاماسىز ەتۋ ماسەلەلەرى شەشىلۋدە. بۇل كەستە جالپى العاندا وزىق بولعانمەن، تۇرعىن ءۇي تولەمىندە اۋىتقۋشىلىقتار بار. گارنيزونداردىڭ تۇرعىن ءۇي قورىن جاڭارتۋ قاجەت. ماسەلەنى قوردالاندىرماي شۇعىل شەشۋ كەرەك. سوندا عانا اسكەري قىزمەتتىڭ جانە اسكەريلەردىڭ الەۋمەتتىك مارتەبەسىن كوتەرەمىز، – دەدى قازاقستان پرەزيدەنتى.

جوعارعى باس قولباسشى ءىس-شارادان سوڭ قورعانىس مينيسترلىگىنىڭ ستراتەگيالىق باسقارۋ ورتالىعىنىڭ جۇمىسىمەن تانىستى.

Abai.kz