ءتىفا، ءتىفا، ەلىمىز «نۇرلانىپ» كەلەدى. قۋانىشتان باسى اينالىپ، بايلىققا بەلشەدەن باتىپ، ايلىقتان مول تابىس تاپقان حالىقتىڭ نۇرلى جۇزدەرىنەن قاناعاتشىل سەزىمنىڭ لەبى ەسەدى. جاھاندانۋدان جالت بەرىپ اينالىپ وتكەن، ارزان دا ءتيىمدى تۇراقتى باعانىڭ بۋىنا ماستانعان قالا مەن دالانى «نۇر» كەزىپ ءجۇر. ەلىمىز تاۋەلسىزدىك العالى بەرى شىر ەتىپ دۇنيە ەسىگىن اشقان سابيلەر ەسىمى مەن ءوسىمى دە "نۇرلى" سانعا ارتقانى بايقالادى. بەيرەسمي دەرەك «نۇرعا» بوگىپ، «نۇرلى» ومىرگە بەت العان سابيلەر سانى جيىرما مىڭنان اسىپ كەتتى دەپ وتىر. ىرىمشىل حالىقپىز عوي، «اتالاردىڭ ارۋاعى» «نۇردان» ايىرماسىن.

ءتىفا، ءتىفا، ەلىمىز «نۇرلانىپ» كەلەدى. قۋانىشتان باسى اينالىپ، بايلىققا بەلشەدەن باتىپ، ايلىقتان مول تابىس تاپقان حالىقتىڭ نۇرلى جۇزدەرىنەن قاناعاتشىل سەزىمنىڭ لەبى ەسەدى. جاھاندانۋدان جالت بەرىپ اينالىپ وتكەن، ارزان دا ءتيىمدى تۇراقتى باعانىڭ بۋىنا ماستانعان قالا مەن دالانى «نۇر» كەزىپ ءجۇر. ەلىمىز تاۋەلسىزدىك العالى بەرى شىر ەتىپ دۇنيە ەسىگىن اشقان سابيلەر ەسىمى مەن ءوسىمى دە "نۇرلى" سانعا ارتقانى بايقالادى. بەيرەسمي دەرەك «نۇرعا» بوگىپ، «نۇرلى» ومىرگە بەت العان سابيلەر سانى جيىرما مىڭنان اسىپ كەتتى دەپ وتىر. ىرىمشىل حالىقپىز عوي، «اتالاردىڭ ارۋاعى» «نۇردان» ايىرماسىن.

ايتپاقشى، ۇمىتىپ بارادى ەكەنمىن عوي، كوشى-قوننىڭ نۇرى سولعىن تارتقاسىن «نۇرلى كوش» باعدارلاماسى قولعا الىندى ەمەس پە؟ استانانىڭ قاق تورىنە «نۇر استانا» مەشىتىن سالىپ تاستادىق. «نۇر وتان» مەن «نۇر مەديا» قانداي. قۇستىڭ قوس قاناتىنداي. «باتىس ەۋروپا-باتىس قىتاي» ترانزيتتىك جولىن، "نۇرلى" جولعا اينالدىرۋ قولعا الىنۋدا. «نۇر شۋاق»، «نۇر سايا»، «نۇر قانات»، «نۇر شاتتىق» سەكىلدى «نۇردان» باستالاتىن بالا باقشالار كەز كەلگەن قالانىڭ ءسانى. «نۇر» ەسىمىن يەلەنگەن مەكتەپتەر مەن ۋنيۆەرسيتەتتەر بار. ءبىر عاجابى «نۇر» سەبەلەسە پارلامەنت پەن ۇكىمەتتىڭ تۇكسيگەن قاباقتارى جازىلىپ، ەندى «ەرىمەيتىندەي» كورىنەتىن قىراۋ-زاڭدار دا بۇرمالانىپ بورشا-بورشا ەرىپ جاتادى. توق ەتەرى «نۇردىڭ» جولى بولىپ تۇر.

وسى قاتارعا بىلتىردان بەرى «نۇر وتان» حدپ «ويلاپ» شىعارعان «نۇر سۇڭقار» جۋرناليستەر بايقاۋى قوسىلعان. كوز الدارىڭىزعا سۇڭقاردى «نۇرسىز» ەلەستەتىپ كورىڭىزشى. اسپاننىڭ ءور مىنەزدى جىرتقىشىنىڭ ايبارى ءپاس تارتىپ قالارى ھاق. سول «نۇر سۇڭقار» بيىل «نۇر سارايدا»، كەشىرىڭىزدەر، "كونگرەسس حولدا" ەكىنشى رەت جالاۋىن كوتەردى. "بىتكەن ىسكە سىنشى كوپ" دەمەكشى، بەت الدى سىناپ، جۋرناليست ارىپتەستەردىڭ جىرتىعىن جاماۋعا از دا بولسا سەپتىگىن تيگىزىپ جۇرگەن «نۇر سۇڭقاردىڭ» قاناتىن قىرقۋ ويىمىزدا جوق. قايتا قولداپ قورعاۋعا، قالامىنان باسقا قارۋى جوق قالامداستاردى ەلەپ ەسكەرگەنى ءۇشىن، برەجنەۆ اتامىز قۇساپ بەتتەرىنەن شوپىلدەتىپ سۇيۋگە بارمىز. شىنىمىز وسى.

بىراق كەيبىر تۇسىنبەگەن جەرىمىزدى ايتپاي تاعى وتىرا المايمىز. «ايتپاسا ءسوزدىڭ اتاسى ولەدى». «نۇر وتاننىڭ» اتى «نۇردان» باستالاتىن ءبىرىنشى ورىنباسارى نىعماتۋلين ءوز سوزىندە: «بۇل جولعى «نۇر سۇڭقار» بايگەسى تاۋەلسىزدىكتىڭ 20 جىلدىعىنا ارنالىپ وتىر» دەي كەلىپ، ابدەن قۇلاعىمىز ساسىعان «بۇگىنگى كۇنگە جەتۋ ءۇشىن نۇرسۇلتان ءابىشۇلى نازارباەۆتىڭ سىڭىرگەن ەڭبەگىن ەكى تىلدە 15 مينۋت باياندادى. وسى ارالىقتا «نۇر وتان» مەن نۇرەكەڭنىڭ ەسىمدەرى "كونگرەسس حولدىڭ" كەڭ زالىندا 27 رەت جاڭعىردى. پاي-پاي دەستىك. جاتتاندى سوزدەن ءسال اۋىتقىعاندا، «نۇر سۇڭقار» بايقاۋىندا شىندىقتى شىرىلداپ ايتىپ، ورىندى سىنىمەن ەل ىشىندەگى كەلەڭسىزدىكتەردى اشىپ كورسەتكەن، بيلىكتىڭ باعىت باعدارىن ايقىنداپ، تەزگە سالىپ وتىراتىن جۋرناليستەر ىرىكتەلىپ الىنعانىن ەستىپ توبەمىز كوككە جەتىپ، دۇركىرەتە قول سوققانداردىڭ ىشىندە ءبىز دە بولدىق.

18 نوميناتسيا بويىنشا سىنعا تۇسكەن جۇمىستاردى «قارا قىلدى قاق جاراتىن» كوميسسيا جىلىكتەپ تالداعانىن ەستىگەندە بوركىمىزدى اسپانعا اتپاساق تا بەرىلىپ تىڭدادىق. ساراپتاما نوميناتسياسىندا «ايتپارك پىكىر سايىس كلۋبىنىڭ» توراعاسى، «گورياچايا ستۋديا»-نىڭ قىزۋ قاندى جۇرگىزۋشىسى اتى «نۇردان» باستالاتىن ەرىمبەتوۆ جۇلدەگە ىلىككەندە جوعارىدا ايتىلعان ءسوز راس ەكەن دەستىك. ءوز ايتارى بار ازاماتتىڭ توپ جارعانى قۇپتارلىق. الايدا ءۇش ءجۇز مىڭ تەڭگە اقشانىڭ بۋى ما، الدە «نۇر وتاننىڭ» الدىندا تولقىپ كەتتى مە: «ەلۋگە دەيىن ەسكەرۋسىز كەلىپ ەم، ءومىرىم جاڭا باستالعانداي اسەردە تۇرمىن» دەپ «بوساعانى» جارامادى. ساياساتتى سۋداي ساپىرىپ، جالىنان سيپاتپايتىن تارپاڭ جىگىتتىڭ، كەلەشەكتە «تۇسالىپ» باۋىرىنان كىم كورىنگەندى وتكىزىپ، جيناعان ازعانتاي بەدەلىنەن جۇرداي بولىپ، حالىقتىڭ بەتىنە قاراي الماي قالماسا جارادى دەستى جينالعان قاۋىم.

«نۇر» اتى اتالماي، «ۇمىتىلا» باستاعاندا، قىزىقتى قاراڭىز، جەڭىمپازدار مەن جينالعان جۋرناليستەردى مەرەكەلەرىمەن قۇتتىقتاپ ساحنا تورىنە قازاق ەستراداسىنىڭ جارىق جۇلدىزى ەسىمى «نۇردان» باستالاتىن ابدۋللين كوتەرىلدى.

وسىدان كەيىن «نۇر وتاننىڭ» بۇلاعىنان ءشول باساتىن جۋرناليستەر ءوز سالاسىنا ءتان نوميناتسيالاردى قانجىعالارىنا بايلاپ جاتتى. تەك اراسىندا «مىنبەر» سايتىنان ەسەنگۇل كاپقىزى مەن كتك تەلەارناسىنىڭ «استارلى اقيقات» باعدارلاماسىمەن تانىمال دينا تولەپبەرگەن «نۇر وتاننىڭ» «تاباعىنا» قول سالىپ «ۇيات جاسادى». قاتتى تولقىعان دينا قارىنداسىمىز «استارلى اقيقاتتى» اشۋعا كومەكتەسكەن نۇرسۇلتان ءابىشۇلىنا ايتار العىسىم شەكسىز دەپ ءبارىن «ءبۇلدىردى». ءسويتىپ «استارلى اقيقاتتىڭ» «استارى» بەلگىلى بولىپ قالدى.

ەل جۇرتقا بەيمالىم گەننادي بەلگيتسكي دەگەن جۋرناليست جۇلدەسىن الىپ جاتىپ: «مەن «نۇر وتان» دەگەندى بىلمەيمىن. بىلگىم دە كەلمەيدى. كەرەك دەسەڭىزدەر وعان مۇشە بولىپ كىرمەيمىن دە» دەپ سالدى. قۋانعان ادام نە دەمەيدى. بالكىم ايتپاعى باسقا بولعان شىعار. ويىندا تۇرعان كورىكتى ءسوزى اۋزىنا تۇسكەندە ادىرا قالىپ، سوزدەرىنىڭ ورىندارى الماسىپ كەتسە ءوز وبالى وزىنە.

نۇرلان زايروللاۇلى ايتقانداي «نۇر وتان» پارتياسى «نۇر سۇڭقار» سىيلىعىن شىندىقتى، حالىقتىڭ جوعىن جوقتايتىن، ادىلدىكتى تۋ ەتەتىن باسىلىمدار مەن تەلە ارنالارعا ۇلەستىرگەنى راس بولسا، كەشەگى «نۇر وتاننىڭ» اۋلاسىندا وتقا ورانعان ايەلدى، «حابار»، «قازاقستان»، «ەگەمەن»، «ايقىن»، «دالا مەن قالا» ت.ب تولىپ جاتقان حالىقشىل باسىلىمدار تارقاتىپ جازىپ، تالداپ كورسەتىپ بەرۋگە جاراماعانى قالاي؟ بىراق جۇلدەنىڭ استىندا سولار قالادى.

«بايدىڭ مالىن بايعۇس قىزعانىپ» جاتىر دەپ ويلاماساڭىزدار ەكەن. ويتكەنى بولىپ جاتقان كەز كەلگەن  وقيعانى دەر ۋاقىتىندا حالىققا جەتكىزۋگە كۇش سالاتىن تەلەارنالار مەن ينتەرنەت گازەتتەردىڭ ءدۇبىرلى دودانىڭ مارەسىنەن قاراسىن كورە الماي پۇشايمان بولدىق. جوعارىدا جۇلدەگەر اتانعان، اششى ايتىپ، ۇكىمەت پەن بيلىكتى سىناۋعا ءبىر تابان جاقىن ءبىر-ەكى ءجۋرناليستى «الامانعا» قوسىپ قويۋ، «ارپا ىشىندە ءبىر بيداي» سەكىلدى كورىنىس قوي. ءبىزدىڭ ايتارىمىز كەلەشەكتە «نۇر وتاندىقتار» نۇراعانىڭ ەلۋدە ەلۋ ساياساتىن «نۇر سۇڭقارعا» ەنگىزسە نۇر ۇستىنە نۇر بولار ەدى.

اڭگىمەنى «نۇرمەن» باستادىق، ەندى «نۇرمەن» اياقتايىق. سىيلىقتار ۇلەستىرىلىپ بولعان سوڭ ەڭ تاڭداۋلى سىيلىقتى نۇرلان زايروللاۇلى، ءوز قولىمەن ەفيرى «نۇرلى» حابار ارناسىنىڭ ءجۋرناليسى نۇرلان وكاۇلىنا تاپسىردى. ول سىيلىق استانا قالاسىنىڭ قاق تورىندەگى ءۇش بولمەلى پاتەردىڭ كىلتى بولىپ شىقتى. قۇتتىقتايمىز! نۇرلارىڭىز جارقىراي بەرسىن!

www.masa.kz ينتەرنەت گازەتى