بۇگىن، ماۋسىمنىڭ 12-ءسى نۇر-سۇلتان قالاسىندا 9 ماۋسىمدا وتكەن قر پرەزيدەنتىنىڭ كەزەكتەن تىس سايلاۋىندا سايلانعان قاسىم-جومارت توقاەۆتى ۇلىقتاۋ ءراسىمى ءوتتى. وسىعان بايلانىستى قر پارلامەنت سەناتىنىڭ دەپۋتاتى مۇرات باقتيارۇلى پىكىر ءبىلدىردى.

«بۇگىن قازاقستان ءۇشىن ەرەكشە تاريحي ساياسي كۇن. ويتكەنى، بۇگىن ۇلىقتاۋ ءراسىمى ءوتتى - ەل تاريىحىنداعى ەكىنشى پرەزيدەنتتى ۇلىقتادىق. وزدەرىڭىز بىلەسىزدەر، 28 جىلدان استام ۋاقىت قازاقستاندى باسقارىپ كەلگەن ەلباسى - تۇڭعىش پرەزيدەنت قىزمەتىن دوعارعاننان كەيىن، قاسىم-جومارت توقاەۆ بۇل لاۋازىمعا ۋاقىتشا كەلگەن بولاتىن. 9 ماۋسىمداعى سايلاۋ ناتيجەسىندە قاسىم-جومارت توقاەۆ جەڭىسكە جەتىپ، بۇگىن رەسمي تۇردە پرەزيدەنتتىك قىزمەتىنە كىرىستى»، - دەپ ءتۇسىندىردى سەناتور مۇرات باقتيارۇلى.

ونىڭ ايتۋنىشا، بۇگىنگى ۇلىقتاۋ ءراسىمى اسا جوعارى دەڭگەيدە ءوتتى. وندا ءتيىستى زاڭنامادا كورسەتىلگەنىندەي، بارلىق اتريبۋتتار ساقتالدى.

«لاۋازىمىنا كىرىسكەن قاسىم-جومارت توقاەۆ باعدارلامالىق ءسوزىن دە جاريالادى. وندا بىرقاتار ماڭىزدى ماسەلەلەر قامتىلىپ وتىر. سونىڭ ۇشەۋىنە توقتالعىم كەلەدى. ءبىرىنشىسى - سىبايلاس جەمقورلىق. بۇل قاراپايىم حالىقتى دا تولعاندىراتىن ماسەلەگە اينالدى. پرەزيدەنت وسى كەلەڭسىزدىكپەن زاڭدى قاتايتۋ ارقىلى كۇرەسۋ كەرەكتىگىن اتاپ ءوتتى. سوسىن - ادىلەتتىلىك. سونىڭ ىشىندە قاراپايىم حالىقتىڭ باسىنداعى ادىلدىك. پرەزيدەنت بۇل رەتتە ەلدىڭ تۇرمىس دارەجەسىنىڭ دە تومەندەپ كەتكەنىنە نازار اۋدارتىپ، ونىڭ سەبەبىن دە اشىپ كورسەتتى. ءۇشىنشىسى - قوعامداعى ءارتۇرلى كوزقاراستاردى سىيلاي وتىرىپ، ورتاق ۇستانىمعا شاقىرۋ. ارينە، قوعام بولعاننان سوڭ ءارتۇرلى پىكىر بولادى، سونىڭ ءبارى ەسكەرىلۋى ءتيىس. الايدا سول ءتۇرلى پىكىرلەر ءبىرتۇتاس ۇلتقا قىزمەت ەتۋى شارت»، - دەدى سەناتتور.

دەپۋتات پرەزيدەنت سوزىندە بيزنەستى دامىتۋ، وسى باعىتتاعى كەمشىلىكتەردى دۇرىستاۋ، جول مەن اۋىز سۋ ماسەلەلەرى دە ورىندى كوتەرىلىپ وتىرعانىن اتاپ ءوتتى.

«الەۋمەتتىك ماسەلەنىڭ ىشىندە ءالجۋاز توپتاردىڭ، جالعىزباستى انالاردىڭ جاعدايى، ولاردىڭ مەملەكەتتەن قامقورلىعى تۋرالى دا دۇرىس پىكىرلەر ايتىلدى. جەكە باسىم ۇلىقتالعان پرەزيدەنتتەن ءوزى ايتقان باعدارلامالارى بويىنشا ۇلكەن ءۇمىت كۇتەمىن. ءبىز وسى باعىتتا قولدان كەلگەنشە قولداپ، زاڭنامالىق قامتاماسىز ەتۋ تۇرعىسىنان اتسالىسامىز. ەڭ باستىسى بىزگە بىرلىك پەن ىنتىماق كەرەك. ادىلدىك ورناۋ دا باستى پرينتسپ. بۇل ەلدىڭ بيلىككە دەگەن سەنىمىن نىعايتادى»، - دەدى م. باقتيارۇلى.

ەسكە سالا كەتەيىك، قر ورتالىق سايلاۋ كوميسسياسىنىڭ شىعارعان قورىتىندىسىنا سايكەس، 9 ماۋسىمداعى كەزەكتەن تىس سايلاۋدا كانديدات قاسىم-جومارت توقاەۆ سايلاۋشىلاردىڭ 70,96 پروتسەنت داۋىسىن (سايلاۋشىلاردىڭ 6 539 715 داۋىسى) الىپ، جەڭىسكە جەتكەن بولاتىن. وسىعان بايلانىستى ورتالىق سايلاۋ كوميسسياسى قر پرەزيدەنتىنىڭ انت بەرۋ كۇنىن 12 ماۋسىمعا بەلگىلەۋ تۋرالى ارنايى قاۋلى قابىلدادى.

ۇلىقتاۋ ءراسىمى بارىسىندا قاسىم-جومارت توقاەۆ قازاقستان حالقىنا انت بەردى. ال انت بەرگەن ساتتەن باستاپ جاڭادان سايلانعان پرەزيدەنت رەسمي قىزمەتiنە كiرiسكەن بولىپ سانالادى.

تۇپنۇسقا: قازاقپارات

Abai.kz