سوڭعى بىرنەشە كۇندە "دۇنيەجۇزى تاريحى" ءپانى قازاق مەكتەپتەرىندە دە ورىس تىلىندە وقىتىلادى ەكەن" دەگەن اڭگىمە الەۋمەتتىك جەلىگە تاراعان ەدى. 

بۇگىن اتالعان ماسەلەگە قاتىستى قازاقستاننىڭ ءبىلىم جانە عىلىم مينيسترلىگى رەسمي مالىمدەمە جاساپ، جەلىدەگى اقپاراتتىڭ شىندىققا جاناسپايتىنىن ايتتى. بۇل تۋرالى اقپارات مينيسترلىكتىڭ "Facebook" جەلىسىندەگى پاراقشاسىندا جاريا بولدى.

"قۇرمەتتى وقىرماندار! الەۋمەتتىك جەلىدە "دۇنيە ءجۇزى تاريحى" ءپانى وقۋ جىلى باسىنان قازاق مەكتەپتەرىندە ورىس تىلىندە، ال "قازاقستان تاريحى" ورىس مەكتەپتەرىندە قازاق تىلىندە جۇرگىزىلەدى دەگەن جالعان اقپارات تاراتىلۋدا.

بۇل ماسەلە وسىدان بىرنەشە جىل بۇرىن كوتەرىلگەن. بىراق قازىرگى ۋاقىتتا جالپى ءبىلىم بەرەتىن مەكتەپتەردە وسى پاندەر وقىتۋ تىلىنە بايلانىستى، ياعني قازاق سىنىپتارىندا قازاق تىلىندە، ال ورىس سىنىپتارىندا ورىسشا جۇرگىزىلىپ جاتىر. بۇگىنگى كۇنى باسقا جوسپار جوق.

بارلىق سۇراقتارعا بعم ارقاشان جاۋاپ بەرۋگە دايىن. تاراتىلىپ جاتقان جالعان اقپاراتقا (fake news) سەنبەۋلەرىڭىزدى سۇرايمىز", دەپ جازىلعان رەسمي مالىمدەمەدە. 

ەستەرىڭىزگە سالا كەتەيىك، سوڭعى اپتادا "دۇنيەجۇزى تاريحى" ورىس تىلىندە، "قازاقستان تاريحى" قازاق تىلىندە وقىتىلادى ەكەن دەگەن اڭگىمە الەۋمەتتىك جەلىدە قىزۋ تالقى بولدى. بۇل تۋرالى رەسپۋبليكالىق "QAZBILIM" ورتالىعى ديرەكتورى اياتجان احمەتجانۇلى "Facebook" جەلىسىندەگى پاراقشاسىندا جازعان بولاتىن.

Abai.kz