ساۋلە ايتپاەۆا مەن ارۋجان سايندى سالىستىرۋدىڭ ءوزى ۇيات!
قازاقستان پرەزيدەنتى قاسىم-جومارت توقاەۆقا،
ققر ءپا جەتەكشىسى قىرىمبەك كوشەرباەۆقا:
«ارۋجان سايندى قازاقستانداعى بالا قۇقىقتارى بويىنشا ۋاكىلى ەتىپ تاعايىنداۋ – قاسقىرعا قوي باقتىرۋمەن بىردەي قيانات!». تۋراسىن ايتايىن: مەنىڭ «اۋىر دەرتكە شالدىققان بالالاردى شەتەلدە ەمدەتۋ ءۇشىن قارجى جيناۋمەن اينالىساتىن» دەگەن ايدارى بار «ميلوسەرديە» قوعامدىق قورىنىڭ ديرەكتورى ارۋجان سايندا التى الاسىم، بەس بەرەسىم جوق...
تەك، قايبىر جىلى بىرەۋلەردىڭ ىقپالىمەن مۇگەدەك ەكى بالامنىڭ ەمدەۋىنە جاردەم سۇراپ، حات جازعانمىن. جاۋاپسىز قالدىردى.
اقىرىندا، سول كەزدەگى استانا قالاسىنىڭ اكىمى ادىلبەك جاقسىبەكوۆتىڭ پارمەنىمەن، ونىڭ ورىنباسارى ەرمەك امانشاەۆتىڭ باقىلاۋىمەن از-ماز كومەك كوردىك. سوندا ارۋجان ساين مەن ونىڭ «قايىرىمدىلىق» دەپ اتالاتىن قورىنىڭ بەزبۇيرەكتىگىن ءوز كوزىممەن كورىپ، ءوز باسىمنان كەشكەنمىن.
قولىندا قالامى، بيلىكتە ادامى باردى مەنسىنبەي، مەكىرەنە قارايتىن ارۋجان سايننىڭ – اۋىلداعى قازاقتىڭ قارا بالاسىنا جانى اشيدى دەگەنگە باسىمدى كەسىپ السا دا، سەنبەيمىن!
قازاق ەلىنىڭ «سامۇرىق-قازىنا» سەكىلدى ءىرى ۇلتتىق كومپانياسىمەن امپەي-جامپەي بولىپ، قىرۋار قارجىلار «الاتىن» ارۋجان ساين كىم ءوزى؟!
ءسوزدىڭ مايىن، شەجىرەنىڭ تەرىن شىعاراتىن سىرعا تولى سىر توپىراعىندا تۋعان ارۋجان ساين تۋعان جەردەن كىندىگىن اجىراتىپ الىسىمەن، ءدىنى مەن ءدىلى بولەك، الەكسەي دەگەن ادامعا قىمباتىن قيىپ، تاعدىرىن تارك ەتىپ، جارى بولىپتى.
ارۋجان ساين سىر قازاعىنىڭ اراسىنان شىقسا دا، اناسىنىڭ ءتىلى قازاق تىلىندە سويلەمەيدى; بالكىم، سويلەي المايدى، مۇمكىن، ار ساناپ، سويلەگىسى كەلمەيدى. قىسقاسى اناسىنىڭ ەمەس، كۇيەۋىنىڭ تىلىندە، ورىس تىلىندە سويلەيدى.
ارۋجان ساين قۇداي بۇيىرتىپ، بوتەن قابىرعادان تاپقان ەگىز قىزدارىنىڭ ەسىمىنە دە اناسىنىڭ ءتىلىن جولاتپاي، سوفيا مەن ديانا دەپ ات قويعان...
بيىلعى جىلدىڭ باسىندا پرەزيدەنت قاسىم-جومارت توقاەۆ ارۋجان سايندى قابىلداعاندا، قازاق ۇلتىنىڭ قامى مەن قازاق بالاسىنىڭ قارەكەتىن ايتىپ، بوزتورعايشا شىرىلداعان – جالعىز مەن ەدىم!
ايتقانىم – ايداي كەلدى: قازاقستان پرەزيدەنتى قاسىم-جومارت توقاەۆ ارۋجان ساينعا مۇقتاج جانداردىڭ اتاۋلى الەۋمەتتىك كومەكتى ءتيىستى ۋاقىتتا الۋىن سەنىپ تاپسىرۋعا شاق قالدى... وكىنىشكە قاراي، قازاقستانداعى بالا قۇقىقتارى بويىنشا ۋاكىل بولىپ تاعايىندالدى. وسىنشاما ۇزاق ۋاقىت بويى «سامۇرىق-قازىنا» ءال-اۋقات قورىنان وزەنشە اققان قارجىلاردى قارماعان ارۋجان سايننان قازاق بالاسىنا تيتتەي دە دەمەۋ بولماعاندا، ەندى ەشتەڭە دە ىستەمەيدى. تاعدىردىڭ جازۋىمەن سىرقاتتانىپ قالعان قاراكوز قازاق بالالارىنا اللا تاعالام جار بولسىن!
...ەڭ قىزىعى، ەلدە ءتارتىپ ورناتپاققا «تالپىنىپ جۇرگەن» جاڭا پرەزيدەنت قاسىم-جومارت توقاەۆ قازاقستانداعى بالا قۇقىقتارى بويىنشا ۋاكىلى، ءوز ءىسىنىڭ كاسىبي مامانى ساۋلە ايتپاەۆانى شاقىرتىپ، قىزمەتىنەن كەتەتىندىگىن ەسكەرتپەي-اق، تۇلا بويىن مايپازداپ، تەلەارنالاردا تاڭعى جاتتىعۋ جاساپ وسكەن جانە كەيىنىرەك «ميلوسەرديە» دەپ اتالاتىن «التىن تاپقان جەردى – بەلدەن قازعان»، ال، شىن مانىسىندە، بالانىڭ تابيعاتى مەن قۇقىعىنا دىم قاتىسى جوق دەلەتانت ارۋجان سايندى جوعارعى لاۋازىمعا تاعايىنداي سالىپتى.
ساۋلە ايتپاەۆا ءوزىنىڭ قىزمەتتەن بوساتىلۋى تۋرالى اقپارات جايىندا جۋرناليستكە: «سىزدەن ەستىپ وتىرمىن» دەدى. ال، راسىندا، كادرلىق وفيتسەر، ومىرلىك كاسىبي تاجىريبەسى وراسان ساۋلە ايتپاەۆا مەن تەلەجاتتىقتىرۋشى ارۋجان سايندى سالىستىرۋدىڭ ءوزى ۇيات!
«ەڭ باستىسى، ءبىزدىڭ بالالارىمىزدىڭ باقىتتى بولعانى. ءاردايىم ولاردىڭ كوزى بال-بۇل جايناپ ءجۇرسىن» دەگەن بىلىكتى وفيتسەر، ادەپتى ادام ساۋلە ايتپاەۆا مۇنداي ادەپسىزدىك پەن ادىلەتسىزدىككە، بەلدەن باسۋ مەن باسسىزدىققا نە دەسىن؟!
قاجىمۇقان عابدوللا
Abai.kz
