ۇلى ابايدىڭ 175 جىلدىعىنا وراي اقىن شىعارمالارىنان ءۇزىندى وقۋ چەللەندجى جالپىحالىقتىق سيپات الدى.

بۇگىن «Nur Otan» پارتياسى توراعاسىنىڭ ءبىرىنشى ورىنباسارى باۋىرجان بايبەك دانىشپان شىعارمالارىنان ءۇزىندى وقۋ ەستافەتاسىن جالعاستىردى. باۋىرجان قىدىرعاليۇلى ەستافەتانى ءانشى ءمولدىر اۋەلبەكوۆادان قابىلداپ الىپ، ونى كورنەكتى جازۋشى سماعۇل ەلۋبايعا، پارلامەنت ماجىلىسىندەگى «Nur Otan» فراكتسياسىنىڭ ءتورايىمى گۇلميرا يسيمباەۆاعا جانە «Jas Otan» جاستار قاناتىنىڭ بەلسەندىسى ايسۇلۋ ەرنيازوۆاعا جولدادى.

باۋىرجان بايبەك، «Nur Otan» پارتياسى توراعاسىنىڭ ءبىرىنشى ورىنباسارى:

–اباي – قازاق رۋحانياتىنىڭ ايناسى، كەمەل دۇنيەتانىمىنىڭ كورىنىسى. اباي مۇراسى – اقىلدىڭ كەنى، سارقىلماس رۋحاني قازىنا. ۇلى ويشىلدىڭ قاي تۋىندىسىن الساڭىز دا، ساليقالى وي، سالماقتى تۇجىرىمعا تۇنىپ تۇر.
⠀
ۇلى ابايدىڭ وسيەت ەتكەن وي-پىكىرلەرى، بىزگە مۇرا ەتىپ قالدىرعان قارا سوزدەرى مەن ولەڭدەرى تاعلىمدى ءمان-ماعىناعا تولى، قازىر دە وزەكتى. ولاردىڭ نەگىزگى ءتۇيىنى بىرلىك، ەڭبەك جانە ادامگەرشىلىك سەكىلدى باستى قۇندىلىقتاردىڭ وزەگىندە توعىسقان. قاشاندا ەلدىكتىڭ باستاۋى – بىرلىكتە.
⠀
وسىعان وراي مەنىڭ تاڭداۋىم حاكىم ابايدىڭ «ساۋلەڭ بولسا كەۋدەڭدە» ولەڭىنە ءتۇستى.
⠀
ساۋلەڭ بولسا كەۋدەڭدە،
مىنا سوزگە كوڭىل ءبول.
ەگەر ساۋلەڭ بولماسا،
مەيلىڭ ءتىرىل، مەيلىڭ ءول.
كوپ شۋىلداق نە تابار،
بيلەمەسە ءبىر كەمەل؟
بەرەكەلى بولسا ەل –
جاعاسى جايلاۋ ول ءبىر كول.
جاپىراعى جايقالىپ،
بۇلعاقتايدى سوقسا جەل.
جان-جاعىنان كۇركىرەپ
قۇيىپ جاتسا اققان سەل،
ونىڭ مالى وزگەدەن
وزگەشە بوپ وسەر ءتول.
بەرەكەسى كەتكەن ەل –
سۋى اشىعان باتپاق كول.
قۇس قاڭقىلداپ، جاعالاپ،
سۋلاي الماس جازعى ءتول.
ونىڭ سۋىن ىشكەن مال
تىشقاق ءتيىپ، اسپاس بەل.
بەرەكەڭدى قاشىرما،
ەل تىنىش بولسا، جاقسى سول.
راس سوزگە تالاسىپ،
اقجەم بولما، جانىم، كەل!

⠀
قازاق بالاسى وسى قۇندىلىقتارعا تابان تىرەپ، ويىن دا، بويىن دا ابايعا قاراپ تۇزەسە، اداسپايدى. بىرلىگىمىز بەكەم، ادامشىلىعىمىز كەمەل، ەلدىگىمىز ماڭگى بولماق.

Abai.kz