قازاقستان الەمدى شوشقا ەتىمەن اسىراماق پا؟ بۇلاي دەپ باجايلاۋىمىزعا، وتكەندەگى قازاقستاننىڭ اۋىلشارۋاشىلىق ءمينيسترى  ساپارحان وماروۆتىڭ بايانداماسى سەبەپ بولدى. مينيستر مىرزا ۇكىمەت وتىرىسىندا ارنايى بايانداما جاساپ، ءوزى باسقاراتىن مينيسترلىكتىڭ شارۋاسى تۋرالى ايتقان. سول جيىندا وماروۆ مىرزا شوشقا ءوسىرۋدى ەكى ەسەگە ۇلعايتۋ جاسپارلانىپ جاتقانىن مالىمدەگەن. 

قازاقستاندا شوشقا شارۋاشىلىعىن دامىتۋدىڭ 2018-2027 جىلدارعا ارنالعان دامۋ جوسپارى بار-مىس. وندا شوشقا ءوسىرۋ تەحنولوگياسىن ەكى ەسە كوبەيتۋدى كوزدەلگەن. وعان “شوشقا فەرمالار وداعى” قاۋىمداستىعىنىڭ توراعاسى ۆيكتور ليم دەگەن ادام جاۋاپتى ەكەن.

اتالعان باعدارلاماعا سايكەس، شوشقا ەتىن ءوندىرۋدى 91,9 مىڭنان 200 مىڭعا دەيىن ۇلعايتۋ كوزدەلگەن. بۇل باعدارلاماعا مەملەكەت تاراپىنان قولداۋ دا از ەمەس. ماسەلەن، شوشقا شارۋاشىلىعىنداعى ينۆەستيتسيالىق شىعىندار ۇلەسىن وتەۋ، ونىڭ ىشىندە قايتا وڭدەۋگە +10,65 ملرد.تەڭگە بولىنگەن. ال، جاناما سۋبسيديا: سىرتقى ينفراقۇرىلىمعا  +10,2 ملرد تەڭگە، ساقتاندىرۋ سىياقىسىن سۋبسيديالاۋعا 3,78 ملرد تەڭگە تاعى بولىنگەن.

ۇكىمەت وتىرىسىندا اۋىلشارۋاشىلىعى ءمينيسترى ساپارحان وماروۆ، 2025 جىلى شوشقا ەتىنىڭ ەكسپورتىن وتكەن جىلمەن سالىستىرعاندا 43% -عا ارتتىرۋدى جوسپارلاپ وتىرعانىن مالىمدەدى.ودان بولەك، وماروۆ باسقاراتىن مينيسترلىك سيىر مەن قوي ەتىنىڭ ەكسپورتىن 37% جانە 32% -عا ارتتىرۋدى جوسپارلاعان.

ءمينيستردىڭ ايتۋىنشا، اگروونەركاسىپ ونىمدەرىنىڭ ءوسىمىن ەكولوگيالىق تازا، باسەكەگە قابىلەتتى قازاقستاندىق ونىمدەر ارقىلى كوبەيتۋگە بولادى.

سونىمەن قاتار، قۇس شارۋاشىلىعىن دامىتۋ باعدارلاماسىنا سايكەس، ءوندىرىستى ءۇش ەسە ارتتىرۋ ءۇشىن كاسىپورىندار جەلىسىن كەڭەيتۋ جوسپارلانىپ وتىر. بۇل ارقىلى ەلىمىزدىڭ قۇس ەتىن ەركىن يمپورتتاۋ كوزدەلگەن.

ەستەرىڭىزدە بولسا، وتكەن جىلى قاراعاندى وبلىسىنىڭ اكىمى ەرلان قوشانوۆ وڭىردە شوشقا ونەركاسىبىن دامىتۋ ءۇشىن 200 گەكتار جەر ءبولىپ، قۇنى 16 ملرد تەڭگە بولاتىن جوبانى ماقۇلداعان ەدى. ول ءۇشىن اقش-تىڭ AGCO Corporation كومپانياسىنىڭ وكىلى توماس ف.ۆەلكەمەن كەلىسسوزدەر جاسادى. بۇل جوبا قازاقستانعا جاڭا ەكسپورتتىق مۇمكىندىكتەر بەرەدى دەگەن قوشانوۆ مىرزا، ەگەر مەملەكەت قولداپ، قارجىلاندىرسا بۇحار جىراۋ اۋدانى، شەشەنقارا اۋىلىنىڭ ماڭىنان شوشقا ونەركاسىبىنىڭ قۇرىلىسى باستالاتىنىن ايتقان بولاتىن.

قوشانوۆتىڭ ايتۋىنشا، بۇل كاسىپورىن ىسكە قوسىلسا قازاقستان كەلەشەكتە ۆەتنام، فيليپپين ەلدەرىمەن باسەكەگە تۇسە الاتىن كورىنەدى. ال، ازىرگە بۇل كورپوراتسيا شوشقا ەتىن قىتاي مەن رەسەيگە ەكسپورتتايدى. بىراق، ول ءۇشىن سۋبسيديالاردى قارجىلاندىرۋ مەن الۋدى ويداعىداي جۇزەگە اسىرۋ قاجەت دەگەن بولاتىن.

نۇربيكە بەكسۇلتانقىزى

Abai.kz