قازاقستان رەسپۋبليكاسىنىڭ تۇڭعىش پرەزيدەنتى – ەلباسى نۇرسۇلتان ءابىشۇلى نازارباەۆتىڭ «ەل ەرتەڭى – جاستار» دەگەن ايگىلى ءسوزىن ءبارىمىز بىلەمىز. بۇل ءسوز ەلىمىزدىڭ ەرتەڭى، ۇلتىمىزدىڭ بولاشاعى بولعان جاستارعا دەگەن ەلباسىنىڭ شەكسىز سەنىمى مەن ءۇمىتىن بەينەلەسە كەرەك.

ەلباسى ءاردايىم جاستارعا قولداۋ ءبىلدىرىپ، قامقورلىق كورسەتىپ جۇرەدى. تاۋەلسىزدىك تۋىن قاداعان العاشقى جىلداردان باستاپ ەلباسىنىڭ جاستارىنا سەنىم ارتپاعان، قولداۋ بىلدىرمەگەن كەزى جوق. بۇنداي قولداۋدى شىن كوڭىلىمەن سەزىنە بىلگەن ەل جاستارى مەملەكەت ءۇشىن تىنباي تىنىمسىز تىرشىلىك ەتىپ كەلەدى.

ەلباسىنىڭ جاستارعا دەگەن قولداۋىنىڭ ايقىن كورىنىسىن ايتايىق. 2019 جىل قازاقستاندىق جاستار ءۇشىن جاقسىلىققا تولى جىل بولعالى تۇر. ءبارىمىز بىلەتىندەي بۇل جىل ەلباسىنىڭ باستاماسىمەن "جاستار جىلى" دەپ جاريالاندى. سونىڭ ايقىن كورىنىسەندەي جىل باسىنان بەرى جاستارعان دەگەن قولداۋ ەرەكشە مول.

اڭگىمەمىزدى باستاماس بۇرىن، "جاستار جىلىنىڭ" جاريالانۋى جايلى ءبىر اۋىز مالىمەت بەرە كەتەيىك. ەلباسىمىز نۇرسۇلتان ءابىشۇلى نازارباەۆتىڭ وتكەن جىلعى 5 قازانداعى «قازاقستاندىقتاردىڭ ءال-اۋقاتىنىڭ ءوسۋى: تابىس پەن تۇرمىس ساپاسىن ارتتىرۋ» اتتى قازاقستان حالقىنا جولداۋىندا 2019 جىلدى ەلىمىزدە جاستار جىلى دەپ جاريالاعان بولاتىن. وسىنىڭ ءوزى اسا قۇرمەتتى ەلباسىمىزدىڭ جاستارعا جاس بۋىنعا دەگەن شەكىز سەنىمىنىڭ كورىنىسى دەپ بىلەمىز.

ەلباسىنىڭ وسى جولداۋىنا ساي ەلىمىزدىڭ تۇكپىر-تۇكپىرىندە جاستاردى قولداۋعا باعىتتالعان ءىس-شارالار ءوتىپ جاتىر. سونىڭ ءبىرى، ءبىرى بولعاندا دا بىرەگەيى «نۇر وتان» پارتياسى قولعا الىپ، جۇزەگە اسىرىپ جاتقان «جاستار كادرلىق رەزەرۆ» جوباسى دەر ەدىك.

2019 جىلدىڭ 26 شىلدەسىنەن باستاپ «جاستار كادرلىق رەزەرۆ» جوباسىنا ءوتىنىش قابىلداۋ جۇمىستارى باستالدى. بۇل جوبانىڭ ماقساتى - جاستار اراسىندا مەملەكەتتىك باسقارۋ جۇيەسى، بيزنەس جانە قوعامدىق قىزمەت سالاسى ءۇشىن زاماناۋي، ءتيىمدى باسقارۋشىلاردىڭ جاڭا گەنەراتسياسىن قالىپتاستىرۋ ەكەنى بەلگىلى.

جوبانىڭ سوڭعى قورىتىندىسىنا ساي قازاقستاننىڭ ءار ايماعىنان ءۇش ادامنان 51 جاس ىرىكتەلىپ الىنادى. ىرىكتەلىپ الىنعان جاستاردىڭ وتىز ءتورتى پارلامەنتتە، ون جەتىسى ورتالىق مەملەكەتتىك ورگانداردا جانە ۇلتتىق كومپانيالاردا تاعىلىمدامادان ءوتىپ، تاجىريبە قابىلدايدى.

"بيىل مەرەيتويلىق 10-شى رەت وتكىزىلەدى جوبا. مىنا 10 جىلدىڭ ىشىندە 15 مىڭنان استام جاستار جوباعا قاتىستى. ونىڭ ىشىندە 468 جوبا قاتىسۋشىسى ماجىلىستە، سەناتتا، مەملەكەتتىك ورگانداردا ءوز پراكتيكاسىن ءوتتى", - دەيدى «بولاشاق» قاۋىمداستىعىنىڭ اتقارۋشى ديرەكتورى لاۋرا دەمەسىنوۆا.

اتالعان كونكۋرسقا قاتىسۋشىلاردى وبلىستىق جانە قالالىق ءماسليحات دەپۋتاتتارى، سونىمەن قاتارا، مەملەكەتتىك ورگاندار، قوعامدىق ۇيىمدار، باق جانە بيزنەس سالاسى وكىلدەرى كىرەتىن ارنايى كوميسسيالار ىرىكتەپ الادى. بۇل جوباعا 18 بەن 29 جاس ارالىعىنداعى ازاماتتار قاتىسۋىنا بولادى. جوباعا قاتىسۋ ءۇشىن وتىنىمدەر ونلاين تۇردە jastar-reserv.kz سايتى ارقىلى 5 قىركۇيەكە دەيىن قابىلداناتىن بولادى.

"ەشقانداي اعا-كوكەسى جوق، ءوز كۇشىمەن ارى قاراي وسكىسى كەلەتىن، بىلىمىنە سەنەتىن جاستاردىڭ دامۋىنا جاعداي جاساۋ. الەۋمەتتىك ليفت رەتىندە، الەۋمەتتىك تەپشەك رەتىندە جاستاردىڭ جاڭا ورىنداردا ءوزىن بايقاپ، سىناپ كورۋىنە، ءوزىنىڭ ءبىلىمىنىڭ جەتۋىنە شىعارماشىلىق جانە تۇلعالىق دامۋىنا اسەر ەتەتىن ءبىزدىڭ جوبالاردىڭ ءبىرى", - دەيدى «Nur Otan» پارتياسى «Jas Otan» جاستار قاناتىنىڭ توراعاسى داۋلەت كارىبەك.

ءسوز سوڭىندا ايتپاعىمىز، بۇل باستامانىڭ ءوزى جاستارعا دەگەن مەملەكەت تاراپىنان بەرىلىپ وتىرعان مول مۇمكىندىك. "جاستار جىلىنا" وراي كورسەتىلىپ وتىرعان قولداۋ دەپ ءبىلۋ كەرەك. ءبىزدىڭ بىلۋىمىزشە، «جاستار كادرلىق رەزەرۆ» جوباسى ەلباسى سوزىمەن ايتقاندا "ەل ەرتەڭى" بولعان جاستاردىڭ وسى باستان ءپىسىپ-جەتىلىپ، مىقتى مامان بولۋىنا ءوز سەپتىگىن تيگىزەتىن بولادى. ەلباسى "جاستار جىلى" دەپ جاريالاعان 2019 جىلى ءدال وسىنداي مەملەكەتتىك باعدارلامالاردىڭ ارقاسىندا ەلىمىزدەگى كوپتەگەن جاستار جۇمىسپەن قامتىلىپ جانە ۇلكەن ومىرگە نىق قادام باسادى دەپ سەنەمىز.

Abai.kz