«Nur Otan» پارتياسىنىڭ ساياسي كەڭەسىنىڭ كەڭەيتىلگەن وتىرىسىندا قر تۇڭعىش پرەزيدەنتى – ەلباسى نۇرسۇلتان نازارباەۆ پارتيانىڭ ساياسي كەڭەسى بيۋروسىنىڭ قۇرامىنا وزگەرىس ەنگىزۋدى ۇسىندى.

ەلباسى اتاپ وتكەندەي، بيۋرونىڭ قازىرگى قۇرامىندا 11 مۇشە بار.

«بۇرىن ايتقانىمداي، حالىققا بارىنشا جاقىن بولۋ كەرەك. شەنەۋنىككە ءتان سيپاتتان ارىلعان ءجون. سول سەبەپتى، جاستارعا قولداۋ ءبىلدىرىپ، اسىرەسە، اۋىل جاستارىن قولپاشتاپ، ينتەلليگەنتسيامەن تۇراقتى ديالوگتى جولعا قويعان ابزال. سول سەبەپتى، ساياسي كەڭەس بيۋروسىنىڭ قۇرامىنا وزگەرىس ەنگىزۋ ۇسىنىلىپ وتىر. ماۋلەن ساعاتحانۇلى اشىمباەۆ مەملەكەتتىك قىزمەتكە ءوتتى. وعان ساتتىلىك تىلەپ قويالىق. باقىت تۇرلىحانۇلى سۇلتانوۆ مەملەكەتتىك قىزمەتكە بارىپ، مينيستر اتاندى. وعان دا راحمەت!»، - دەدى نۇرسۇلتان نازارباەۆ.

ەلباسى ءسوزىن جالعاستىرا كەلە، بيۋرو قۇرامىنان شىعىپ قالعان مۇشەلەردىڭ ورنىنا «Egemen Qazaqstan» رەسپۋبليكالىق گازەتى» اق باسقارما توراعاسى دارحان قۋاندىقۇلى قىدىرالىنى ەنگىزۋدى ۇسىندى.

«ول كوپكە بەلگىلى. گازەتتى كوتەردى. ءبىزدىڭ ينتەلليگەنتسيامەن بايلانىسى مىقتى. سونىمەن بىرگە، «Jas Otan» جاستار قاناتىنىڭ ليدەرى داۋلەت كارىبەكتى ۇسىنامىن. جاستاردىڭ اتىنان سول سويلەسىن»، - دەدى ەلباسى.

نۇرسۇلتان نازارباەۆتىڭ بۇل ۇسىنىسىن پارتيالاستارى ءبىر اۋىزدان قولداپ، داۋىس بەردى.

Abai.kz