«اقوردا» رەزيدەنتسياسىندا قازاقستان پرەزيدەنتى قاسىم-جومارت توقاەۆتىڭ «س5+1» فورماتىنداعى جوعارى دەڭگەيدەگى كەزدەسۋگە قاتىسۋ ءۇشىن نۇر-سۇلتانعا كەلگەن قىرعىز رەسپۋبليكاسى سىرتقى ىستەر ءمينيسترى – چينگيز ايداربەكوۆپەن، تاجىكستان رەسپۋبليكاسى سىرتقى ىستەر ءمينيسترى – سيرودجيددين مۋحريددينمەن، تۇرىكمەنستان سىرتقى ىستەر ءمينيسترى – راشيد مەرەدوۆپەن، وزبەكستان رەسپۋبليكاسى سىرتقى ىستەر ءمينيسترى – ابدۋلازيز كاميلوۆپەن كەزدەسۋى ءوتتى. 

مەملەكەت باسشىسى ديپلوماتتاردى اقش-پەن وڭىرلىك ىنتىماقتاستىقتى جانە قاتىناستاردى نىعايتۋدىڭ ءتيىمدى تەتىگى سانالاتىن «س5+1» فورماتىنداعى كەزەكتى كەزدەسۋدىڭ تابىستى اياقتالۋىمەن قۇتتىقتادى.

قاسىم-جومارت توقاەۆ ورتالىق ازيا ەلدەرى اراسىنداعى ينتەگراتسيالىق ۇدەرىستەردى ودان ءارى دامىتۋدىڭ ماڭىزدىلىعىن اتاپ ءوتتى.

– كوپعاسىرلىق ورتاق تاريحىمىز، تاتۋ كورشىلەستىگىمىز، مادەني جانە ءدىني باۋىرلاستىعىمىز مەملەكەتتەرىمىزدى جاقىنداستىراتىن نەگىزگى دىڭگەك بولعان جانە ارقاشان سولاي بولا بەرەدى. قازاقستاننىڭ تۇڭعىش پرەزيدەنتى – ەلباسى نۇرسۇلتان نازارباەۆتىڭ كۇش-جىگەرىنىڭ ارقاسىندا ورتالىق ازياداعى ىنتىماقتاستىق سىرتقى ساياساتىمىزدا ءاردايىم باسىمدىققا يە بولدى، – دەدى مەملەكەت باسشىسى.

قاسىم-جومارت توقاەۆ ءوڭىر ىشىندەگى ساۋدا-ساتتىق، ينۆەستيتسيالىق، كولىك جانە مادەني-گۋمانيتارلىق بايلانىستاردى دامىتۋ ماسەلەلەرىنە ارنايى توقتالدى.

مەملەكەت باسشىسى 2018 جىلى ناۋرىز ايىندا قازاقستاننىڭ ەلورداسىندا وتكەن ورتالىق ازيا مەملەكەتتەرى باسشىلارىنىڭ العاشقى كونسۋلتاتيۆتىك كەزدەسۋىندە قول جەتكىزگەن ۋاعدالاستىقتاردى جۇزەگە اسىرۋدىڭ ماڭىزدى ەكەنىن اتاپ كورسەتتى.

– بۇل وقيعالار ەلدەرىمىزدىڭ اراسىنداعى قارىم-قاتىناستاردىڭ جاڭا كەزەڭىنە جول اشتى دەسەك، اسىرا ايتقاندىق ەمەس. ءوڭىر ىشىندەگى ساۋدا-ساتتىق دەڭگەيىنىڭ ايتارلىقتاي ارتۋى سونىڭ ايقىن دالەلى بولىپ تابىلادى، – دەدى قازاقستان پرەزيدەنتى.

Abai.kz