تۇرعىن ءۇي قۇرىلىس جيناق بانكىنىڭ سالىمشىسى اتانعان 240 تۇرعىن «نۇرلى جەر» باعدارلاماسى ارقىلى باسپانالى بولدى.

بۇل تۋرالى وڭىرلىك كوممۋنيكاتسيالار قىزمەتىندە وتكەن بريفينگتە تۇرعىن ءۇي قۇرىلىس جيناق بانكىنىڭ قىزىلوردا قالاسىنداعى فيليالى ديرەكتورىنىڭ مىندەتىن اتقارۋشى ءىلياس ءجۇرىنوۆ ءمالىم ەتتى.

شارشى مەترى 140 000 تەڭگەنى قۇرايتىن جاڭا ۇيلەر سىرداريا وزەنىنىڭ سول جاعالاۋىندا سالىنعان. تۇرعىن ءۇي باعاسىنىڭ 20%-ىن دەپوزيتتە جيناعان سالىمشىلار «نۇرلى جەر» باعدارلاماسى ارقىلى باسپانالى بولۋ مۇمكىندىگىنە يە بولدى. ماماندار ءۇي الۋدىڭ قاراپايىم شارتتارىن ءتۇسىندىرىپ بەردى.

«اۋماعى 57 شارشى مەتردى قۇرايتىن 2 بولمەلى پاتەردىڭ قۇنى 7 980 000 تەڭگە. باستاپقى 20% جارناسىن جيناعان، ياعني 1 596 000 تەڭگە جيناعان تۇرعىن اي سايىن 44422 تەڭگە تولەم تولەپ، ءۇيلى بولا الادى. ال، قۇنى 9 380 000 تەڭگەنىڭ 3 بولمەلى پاتەرىنىڭ باستاپقى جارناسىن تولەگەن، 8 جىلعا اي سايىنعى تولەم 52 000 تەڭگە كولەمدە تولەۋگە قابىلەتتى ازامات ءۇي الا الادى»،-دەيدى ءىلياس ءجۇرىنوۆ.

ەسكەرۋ كەرەك، كەز كەلگەن بانك سالىمشىلارى وسى كەزەڭدە «نۇرلى جەر» باعدارلاماسىنا قاتىسىپ، تۇرعىن ءۇي ساتىپ الا الادى. ول ءۇشىن baspana.kz پورتالىنا كىرىپ، ۇناعان نىساندى نەمەسە پاتەردى تاڭداپ، ءوتىنىش بەرۋ قاجەت. بىراق، ءۇي الۋعا دەگەن قابىلەتتى انىقتاۋ ءۇشىن جەكە ەسەپ-شوتىڭىزدا 500 مىڭ تەڭگە بولۋى شارت. كونكۋرسقا قاتىسىپ، ءتيىستى ءراسىمدى وتكىزگەننەن كەيىن اتالعان قارجىنى تۇرعىن ءۇي باعاسىنىڭ 20 پايىزىن وتەپ، ءۇيلى بولا الادى.

ايتا كەتەيىك، ءۇي ساتىپ الۋشىلار پۋلىنا ەڭ كوپ بالل جيناعان ادامدار كىرەدى. بالل سانى دەپوزيتتى تولتىرۋ جيىلىگىنە جانە ونىڭ مەرزىمىنە بايلانىستى. ياعني، سالىمشىنىڭ شوتى نەعۇرلىم ەرتەرەك اشىلىپ، تۇراقتى تۇردە تولىقتىرىلىپ وتىرسا، وندا ونىڭ بالل سانى دا سوعۇرلىم جوعارى بولادى. باللدى ەسەپتەۋ جۇيەسى اۆتوماتتاندىرىلعان ءارى ايقىن تۇردە جۇرگىزىلەدى.

Abai.kz