بۇل تۋرالى كۇنى كەشە ايماق باسىشىسى قۋانىشبەك ىسقاقوۆتىڭ توراعالىعىمەن وتكەن جيىندا ايتىلدى. جيىن بارىسىندا قۇقىق بۇزۋشىلىقتىڭ الدىن الۋ جونىندەگى ۆەدومستۆوارالىق كوميسسيانىڭ وتىرىسىندا جول قاۋىپسىزدىگىن قامتاماسىز ەتۋ ماسەلەلەرى تالقىلاندى جانە ولاردى شەشۋ بويىنشا بىرقاتار شارالار ۇسىنىلدى.

سونىمەن قاتار، قىزىلوردا وبلىسى پوليتسيا دەپارتامەنتى باستىعىنىڭ ورىنباسارى سەرىك شالحاروۆ وبلىس اۋماعىنداعى جول-كولىك وقيعالارىنىڭ الدىن الۋ جانە جويۋ بويىنشا جۇرگىزىلىپ جاتقان جۇمىستار تۋرالى ايتتى.

-ەسەپتى كەزەڭدە وبلىس اۋماعىندا جول-كولىك وقيعالارىنىڭ الدىن الۋ بويىنشا "اۆتوبۋس", "قاۋىپسىز جول", "جاياۋ جۇرگىنشى", "قۇقىق ءتارتىبى" جانە ت.ب. جەدەل-پروفيلاكتيكالىق ءىس-شارالار وتكىزىلدى. سونىمەن قاتار، ءار اپتانىڭ جۇما، سەنبى جانە جەكسەنبى كۇندەرى قوعامدىق ءتارتىپ پەن قاۋىپسىزدىكتى قامتاماسىز ەتۋ ماقساتىندا، قالا جانە اۋداندارداعى پوليتسيا قىزمەتى كۇشەيتىلگەن تۇرىنە كوشىرىلىپ، «تۇنگى قالا»، «قاۋىپسىز اۋلا» اتتى قىسقا مەرزىمدى جەدەل-پروفيلاكتيكالىق ءىس-شارالار ۇيىمداستىرىلىپ وتكىزىلۋدە،- دەدى سەرىك شالحاروۆ.

سونداي-اق، وبلىس كولەمىندە جول اپاتتارىلىڭ الدىن الۋ ماسەلەلەرىن ناسيحاتتاۋ ماقساتىندا، 2019 جىلدىڭ ءساۋىر ايىنان باستاپ قىركۇيەك ايىنا دەيىن ايىنا ءبىر رەت «جولدا قابىلداۋ» اكتسيالارى ۇيىمداستىرىلۋدا، رەسپۋبليكالىق جانە جەرگىلىكتى باق قۇرالدارى مەن الەۋمەتتىك جەلىلەردە ءتيىستى اقپاراتتىق ماتەريالدار جاريالانىپ، اقپاراتتىق-ءتۇسىندىرۋ شارالارى وتكىزىلدى.

سونىمەن قاتار، وبلىستىق پوليتسيا دەپارتامەنتى باستىعىنىڭ ورىنباسارى جول قوزعالىسى قاۋىپسىزدىگىن قامتاماسىز ەتۋ بويىنشا بىرقاتار ۇسىنىستار ەنگىزدى. اتاپ ايتقاندا، جولدا جىلدامدىقتى اسىرۋ فاكتىلەرىن دەر كەزىندە انىقتاۋ جانە بولدىرماۋ ءۇشىن وبلىس ورتالىعى مەن اۋدان ورتالىقتارىندا اۆتوماتتى رەجيمدە جۇمىس ىستەيتىن ارنايى جىلدامدىق ولشەگىشتەردى ورناتۋ ۇسىنىلادى.

ودان بولەك، رەسپۋبليكالىق ماڭىزى بار اۆتوجولداردا ءۇي جانۋارلارىنىڭ كولىك جولىنا كەنەتتەن شىعۋىنا بايلانىستى 47 جول-كولىك وقيعاسى تىركەلگەن، ونىڭ ىشىندە ادام قايتىس بولعان فاكتىلەرى تىركەلگەن. وسىعان بايلانىستى تۇنگى ۋاقىتتا جول-كولىك وقيعالارىنىڭ الدىن الۋ ماقساتىندا ەلدى مەكەندەردە ءتۇسىندىرۋ جۇمىستارىن جۇرگىزۋ، ءىرى قارا مال يەلەرىنە جارىق شاعىلىستىراتىن القالاردى تاعۋ بويىنشا جۇمىستاردى قايتا جالعاستىرۋ، سونداي-اق حالىقارالىق ماڭىزى بار اۆتوموبيل جولىنىڭ بويىندا "ابايلاڭىز، ءۇي جانۋارلارى!" پاننولارى مەن مەتالل قورشاۋ تورلارىن ورناتۋ تۋرالى ۇسىنىس ايتىلدى.

سونداي-اق، ۆەدومستۆوارالىق كوميسسيا وتىرىسىندا تۇرمەدەگى جازاسىن وتەۋشىلەردى جۇمىسقا ورنالاستىرۋ جانە اتالمىش كوميسسيانىڭ وتكەن وتىرىستارىنىڭ حاتتامالىق تاپسىرمالارىن ورىنداۋ ماسەلەلەرى قارالدى.

وتىرىستى قورىتىندىلاي كەلە، قىزىلوردا وبلىسىنىڭ اكىمى قۋانىشبەك ىسقاقوۆ جاۋاپتى تۇلعالارعا جول-كولىك وقيعاسىنىڭ الدىن الۋ بويىنشا ايماقتىق جول كارتاسىن دايىنداۋدى، جول قوزعالىسى قاۋىپسىزدىگىن قامتاماسىز ەتۋ بويىنشا ءتۇسىندىرۋ جۇمىستارىن كۇشەيتۋدى تاپسىردى.

Abai.kz