قازاقستان پرەزيدەنتى قاسىم-جومارت توقاەۆتىڭ نيۋ-يورككە ساپارى اقش-تاعى ىقپالدى تالداۋ ورتالىعى سانالاتىن «Atlantic Council» («اتلانتيكالىق كەڭەس») ۇيىمىنىڭ قولداۋىمەن ۇيىمداستىرىلعان بەلگىلى امەريكالىق ساياساتكەرلەرمەن جانە ساراپشىلار قاۋىمداستىعىنىڭ وكىلدەرىمەن كەزدەسۋمەن باستالدى.

كەزدەسۋ بارىسىندا مەملەكەت باسشىسى قازاقستان-امەريكا قارىم-قاتىناستارىنىڭ قازىرگى جاي-كۇيى مەن دامۋ پەرسپەكتيۆالارى، سىرتقى ساياساتتىڭ نەگىزگى باسىمدىقتارى، قازاقستاننىڭ ساۋدا-ەكونوميكالىق جانە ينۆەستيتسيالىق الەۋەتى تۋرالى ەگجەي-تەگجەيلى باياندادى.

قاسىم-جومارت توقاەۆ اقش-پەن ىنتىماقتاستىقتى ارتتىرۋ قازاقستان ءۇشىن اسا ماڭىزدى ەكەنىن اتاپ ءوتتى.

– ءبىز تۇڭعىش پرەزيدەنت نۇرسۇلتان نازارباەۆتىڭ 2018 جىلدىڭ قاڭتار ايىندا اقش-قا جاساعان رەسمي ساپارى بارىسىندا قول جەتكىزگەن كەلىسىمدەرىنىڭ جۇزەگە اسىرىلۋىنا ەرەكشە ءمان بەرەمىز. بۇل ساپار ەكى ەل اراسىنداعى كەڭ اۋقىمدى ستراتەگيالىق ارىپتەستىكتىڭ نەگىزىن قالادى، – دەپ اتاپ ءوتتى قازاقستان پرەزيدەنتى.

مەملەكەت باسشىسى اقش-تىڭ قازاقستان ەكونوميكاسىنىڭ ءىرى ينۆەستورلارىنىڭ ءبىرى ەكەنىن ەسكە سالدى. بۇگىندە امەريكالىق ينۆەستيتسيانىڭ جالپى كولەمى 45 ملرد دوللاردان اسقان.

سونداي-اق، قاسىم-جومارت توقاەۆ امەريكالىق ارىپتەستەرگە ەنەرگەتيكالىق سالاداعى بىرقاتار بىرلەسكەن جوبالاردىڭ تابىستى جۇزەگە اسقانى تۋرالى حاباردار ەتتى. سونىمەن قاتار، اۋىل شارۋاشىلىعى جانە جوعارى تەحنولوگيا سالالارى بويىنشا ءوزارا ءىس-قيمىلدى ارتتىرۋ ءۇشىن جاڭا مۇمكىندىكتەردىڭ بار ەكەنىنە نازار اۋداردى.

پرەزيدەنتتىڭ ايتۋىنشا، قازاقستان الداعى ۋاقىتتا دا امەريكالىق بيزنەس وكىلدەرىمەن ۇزاق مەرزىمدى ەكونوميكالىق بايلانىستاردى نىعايتۋعا نيەتتى.

ءوز كەزەگىندە امەريكالىق ارىپتەستەر ەكىجاقتى ىنتىماقتاستىق دەڭگەيىن جوعارى باعالاپ، قازاقستانمەن ءوزارا ءتيىمدى ستراتەگيالىق ىنتىماقتاستىقتى ودان ءارى نىعايتۋدىڭ الەۋەتى زور ەكەنىن اتاپ ءوتتى.

***

1961 جىلى قۇرىلعان «اتلانتيكالىق كەڭەس» اقش-تىڭ جەتەكشى ساراپتامالىق جانە عىلىمي ورتالىقتارىنىڭ ءبىرى سانالادى. كەڭەس ترانساتلانتيكالىق بايلانىستار، ينتەگراتسيالىق پروتسەستەر، قاۋىپسىزدىك جانە قورشاعان ورتا ماسەلەلەرىن زەرتتەۋمەن اينالىسادى.

Abai.kz