مەملەكەت باسشىسى بەلارۋس رەسپۋبليكاسىنىڭ پرەزيدەنتى الەكساندر لۋكاشەنكومەن كەزدەستى.

جوعارى ەۋرازيالىق ەكونوميكالىق كەڭەس اياسىندا وتكەن كەزدەسۋ بارىسىندا پرەزيدەنتتەر قازاقستان مەن بەلارۋس اراسىنداعى كوپجاقتى ىنتىماقتاستىقتىڭ وزەكتى ماسەلەلەرىن تالقىلادى. ساۋدا-ەكونوميكالىق قاتىناستار مەن حالىقارالىق ۇيىمدار اياسىنداعى ءوزارا ءىس-قيمىلعا باسا ءمان بەرىلدى.

قاسىم-جومارت توقاەۆ الەكساندر لۋكاشەنكونىڭ الداعى قازاقستانعا جوسپارلانعان ساپارىنىڭ ماڭىزدىلىعىن اتاپ ءوتتى.

– ءبىز ءسىزدىڭ قازاقستانعا رەسمي ساپارىڭىزدى كۇتەمىز. وعان جان-جاقتى دايىندالىپ جاتىرمىز. ءبىزدىڭ مەملەكەتتەر اراسىنداعى قاتىناس ستراتەگيالىق سيپاتتا قۇرالعان. قازاقستان بەلارۋس حالقىنىڭ تاريحىن، مادەنيەتى مەن مەنتاليتەتىن قۇرمەتتەي وتىرىپ، سىزدەرگە ەرەكشە ىقىلاس تانىتادى،– دەدى مەملەكەت باسشىسى.

ءوز كەزەگىندە بەلارۋس پرەزيدەنتى الداعى قازاقستانعا ساپارى ەكىجاقتى ىنتىماقتاستىقتىڭ جاڭا كەزەڭىنىڭ باستاۋى بولاتىنىن اتاپ ءوتتى.

– مەن سىزگە ەاەو اياسىندا بىرلەسە جۇمىس ىستەگەنىمىز ءۇشىن ريزاشىلىعىمدى بىلدىرەمىن. ءبىزدىڭ كوزقاراسىمىز ءبىر. قازاقستاندا سىندارلى ۇستانىم بار. سوندىقتان ءوزارا ىنتىماقتاستىعىمىزدى دامىتۋعا دايىنبىز. ءبىز ەكى ەل اراسىنداعى قارىم-قاتىناستىڭ تامىرىن تەرەڭدەتە تۇسۋگە نيەتتىمىز، – دەدى الەكساندر لۋكاشەنكو.

Abai.kz