قىزىلوردا وبلىسىنىڭ اكىمى ق.ىسقاقوۆ قر قورعانىس مينيسترلىگىنىڭ اسكەري بولىمدەرىنە مەرزىمدى اسكەري قىزمەتكە شاقىرتىلعان ازاماتتاردى سالتاناتتى شىعارىپ سالۋ راسىمىنە قاتىستى.

بيىل كوكتەمدە قر قارۋلى كۇشتەر قاتارىنا 801 ادامدى جونەلتۋ جوسپارلانسا، اتقارىلعان جۇمىستاردىڭ ناتيجەسىندە 811 ادام جىبەرىلگەن. قىزىلوردا وبلىسى بويىنشا كۇزگى مەرزىمدە ازاماتتاردى اسكەري قىزمەتكە تاپسىرىس سانى 788-ءدى قۇراپ وتىر. ونىڭ ىشىندە: قر ۇقك شەكارا قىزمەتىنە - 180 ادام، قر مەملەكەتتىك كۇزەت قىزمەتىنە - 3 ادام، قر قارۋلى كۇشتەرىنە - 305 ادام، قر ۇلتتىق ۇلانعا - 300 ادام.

وبلىس اكىمى اسكەرگە شاقىرتىلعان جاستارعا ساتتىلىك تىلەپ، وتان الدىنداعى اسكەري بورىشتارىن ادال اتقارۋلارىنا تىلەكتەس ەكەنىن جەتكىزدى.

«اسكەري مىندەتىن وتەۋ - ازاماتتاردىڭ قاسيەتتى بورىشى. سول سەبەپتى، جاستارىمىزدى ەلىمىزدىڭ قارۋلى كۇشتەرىنىڭ قاتارىنا سالتاناتتى تۇردە شىعارىپ سالۋدى ءبىز ىزگى داستۇرگە اينالدىردىق. تاۋەلسىز مەملەكەتىمىزدىڭ ايبىندى اسكەرىنىڭ قاتارىنا ايماقتان جىلىنا ەكى مىڭعا جۋىق ازامات جونەلتىلىپ وتىرادى. قازىرگى تاڭدا جۇرگىزىلگەن رەفورمالارعا ساي اسكەرگە شاقىرىلۋشىلارعا قويىلار تالاپ تا كۇشتى. قارۋلى كۇشتەردە قىزمەت ەتۋ قۇرىشتاي بەرىك دەنساۋلىقتى، ءبىلىمدى بولۋدى تالاپ ەتەدى. وتان الدىنداعى اسكەري بورىشتارىڭىزدى اتقارىپ، ەلگە امان-ەسەن ورالۋلارىڭىزدى تىلەيمىز»، - دەدى ايماق باسشىسى.

بۇگىنگى تاڭدا بارلىق مەديتسينالىق كوميسسيالار ءتيىستى بىلىكتىلىگى بار مامان دارىگەرلەردەن قۇرالعان جانە قاجەتتى مەديتسينالىق قۇرالدارمەن قامتاماسىز ەتىلگەن. اۋداندار مەن قالالارداعى اسكەرگە شاقىرۋ پۋنكتتەرى، سونداي-اق، وبلىستىق جيىن پۋنكتى بولەك عيماراتتارىمەن قامتىلعان.

پاتريوتتىق سەزىمدى وياتۋ جانە اسكەرگە شاقىرىلۋشىلاردىڭ بەلسەندىلىگىن ارتتىرۋ ماقساتىندا ارداگەرلەردىڭ، ۇكىمەتىك ەمەس ۇيىمداردىڭ جەتەكشىلەرى مەن بەلسەندى جاستاردىڭ قاتىسۋىمەن ءتۇسىندىرۋ شارالارى تۇراقتى تۇردە ۇيىمداستىرىلىپ تۇرادى.

Abai.kz