6 قاراشا كۇنى رەسەي فەدەراتسياسىنىڭ ومبى قالاسىندا رەسەي مەن قازاقستان جاستار كوشباسشىلارىنىڭ ءبىرىنشى فورۋمى ءوز جۇمىسىن باستادى. 

بۇل شارا ەكى ەلدىڭ XVI ايماقارالىق ىنتىماقتاستىق فورۋمى اياسىندا ءوتىپ جاتىر. جاستار جيىنى ەكى كۇنگە سوزىلادى. 

فورۋمنىڭ اشىلۋ سالتاناتىندا قازاقستاندىق تاراپتى اقپارات جانە قوعامدىق دامۋ مينيسترلىگىنىڭ جاستار ءىسى جانە وتباسى كوميتەتىنىڭ توراعاسى ماديار قوجاحمەت تانىستىردى. ء"بىزدىڭ جاستارىمىز مەنتالدىق، مادەني جانە تىلدىك قارىم-قاتىناستا ءبىر-بىرىنە ەتەنە جاقىن. بولاشاق ۇرپاق رەسەي مەن قازاقستان حالقىن قۇرمەتتەيتىن دوستىق پەن وداقتاستىقتىڭ يگى داستۇرلەرىن ساقتاپ، نىعايتۋى ماڭىزدى", - دەپ اتاپ ءوتتى كوميتەت توراعاسى. سونداي-اق ماديار قوجاحمەت جاستار ساياساتى سالاسىنداعى نەگىزگى مىندەت جاستارعا ءار سالادا جول اشىپ، بولاشاقتا مىقتى مامان بولىپ قالىپتاسۋ ءۇشىن جاعداي جاساۋ قاجەت دەگەن پىكىرىن ءبىلدىردى. 

بۇل رەتتە مەملەكەتتىڭ ماقساتى - جاستاردىڭ قوعامعا قاجەتتى توپتارىن قامتىپ، ولارعا ءوز مۇمكىندىكتەرىن تولىق كورسەتە الاتىن "الەۋمەتتىك ليفت"قۇرۋ باستى مىندەت. بۇل ءۇشىن قازاقستاندا "مەملەكەتتىك جاستار ساياساتى تۋرالى" زاڭ جانە 2020 جىلعا دەيىنگى مەملەكەتتىك جاستار ساياساتىنىڭ تۇجىرىمداماسى ازىرلەنىپ، جۇمىس ىستەۋدە. جۇيەلىك نەگىزدە باعدارلامالىق قۇجاتتار مەن جوبالار ىسكە اسىرىلىپ جاتىر.

فورۋم جۇمىسىنا جۇزدەن اسا جاس قاتىسىپ جاتىر. ولار مەملەكەتتىك ورگاندار مەن ۇكىمەتتىك ەمەس ۇيىمداردىڭ وكىلدەرى، ۆولونتەرلەر، ەكى ەلدىڭ جوو وقىتۋشىلارى مەن ستۋدەنتتەرى، سونداي-اق جۋرناليستەر مەن بلوگەرلەر. 

فورۋم باعدارلاماسىندا ەكى ەلدىڭ جاس ديپلوماتتارىنىڭ كەزدەسۋى جانە جاستار ساياساتىن جۇزەگە اسىرۋعا جاۋاپتى رەسەي مەن قازاقستاننىڭ اتقارۋشى بيلىك ورگاندارى باسشىلارىنىڭ جۇمىس كەڭەسى وتەدى دەپ جوسپارلانعان.

فورۋم قورىتىندىسى بويىنشا رەسەي مەن قازاقستاننىڭ جاستار قوعامدىق ۇيىمدارى اراسىنداعى ىنتىماقتاستىق تۋرالى ەكى جاقتى كەلىسىمگە قول قويۋ جوسپارلانعان.

بۇل شارانىڭ ماقساتى - رەسەي مەن قازاقستان جاستارى اراسىنداعى  ديالوگ فورماتتارىن كەڭەيتۋ، ىنتىماقتاستىق باعىتتارىنىڭ كەڭ قانات جايۋىنا مۇمكىندىك جاساۋ.

Abai.kz