سەنبى, 7 جەلتوقسان 2019
722 3 پىكىر 14 قاراشا, 2019 ساعات 11:17

"قازاقستاننان كيىك ءمۇيىزىن الىپ وتپەك بولعان" رەسەي ازاماتى ۇستالدى

شەكارا قىزمەتىنىڭ دەرەگىنشە، رەسەيلىكتىڭ كولىگىندەگى سپورت سومكەسىنەن كيىكتىڭ 64 جۇپ ءمۇيىزى تابىلعان. ءمۇيىزدىڭ سالماعى 29 كەلى. رەسەي ازاماتى باتىس قازاقستان وبلىسىنداعى اقساي پوستىندا ۇستالىپ، ايماقتاعى پوليتسياعا تاپسىرىلعان.

باتىس قازاقستان پوليتسياسىنان رەسەي ازاماتى قاماۋعا الىنعانىن يا وعان قاتىستى قىلمىستىق ءىس قوزعالعانىن انىقتاۋ مۇمكىن بولمادى.

شەكارا قىزمەتىنىڭ دەرەگىنشە، مۇيىزدەر 242 ميلليون تەڭگەگە (شامامەن 620 مىڭ دوللار) باعالانعان. شەكاراشىلاردىڭ حابارلاۋىنشا، بۇل فاكتى قىلمىستىق كودەكستىڭ 339-بابىمەن ("وسiمدiكتەردىڭ نەمەسە جانۋارلاردىڭ سيرەك كەزدەسەتiن جانە قۇرىپ كەتۋ قاۋپi تونگەن تۇرلەرىمەن زاڭسىز اينالىسۋ") تەرگەلۋى ءتيىس.

كيىكتەر قازاقستاندا مەملەكەت قورعاۋىنا الىنعان. براكونەرلەر كيىكتەردىڭ ءمۇيىزىن كەسىپ، شىعىس مەديتسيناسى ءۇشىن ساۋدالايدى.

اقبوكەننىڭ سانى ءبىر عاسىرعا جۋىق ۋاقىت ىشىندە بىرنەشە رەت كۇرت ازايىپ، كەيىن قايتا كوبەيگەن. 1920 جىلدارى سوۆەت بيلىگى قۇرىپ بىتۋگە شاق قالعان كيىكتى اتۋعا تىيىم سالعان. 2015 جىلى قازاقستاندا ىندەت سالدارىنان بىرنەشە اپتا ىشىندە 150 مىڭنان اسا كيىك (الەمدەگى سانىنىڭ 62 پروتسەنتى) قىرىلعان.

قازاقستان بيلىگى 2020 جىلعا دەيىن كيىكتەردى اۋلاۋعا شەكتەۋ قويدى. بىراق سوعان قاراماستان كيىكتەردى زاڭسىز اتۋ فاكتىلەرى تىركەلگەن. بيىل كيىكتەردى زاڭسىز اۋلاعانداردى ۇستاماق بولعان "وحوتزووپروم" مەكەمەسىنىڭ ەكى ينسپەكتورى براكونەرلەر قولىنان مەرت بولدى.

Abai.kz

3 پىكىر