مەملەكەت باسشىسى قاسىم-جومارت توقاەۆ قازاقستاندا اككرەديتتەلگەن شەت ەلدەردىڭ ديپلوماتيالىق ميسسيالارىنىڭ باسشىلارىمەن كەزدەستى.

قازاقستان پرەزيدەنتى ديپلوماتيالىق كورپۋس وكىلدەرىمەن كەزدەسۋدىڭ جاقسى داستۇرگە، ەكىجاقتى جانە كوپجاقتى ىنتىماقتاستىقتى نىعايتاتىن ماڭىزدى شاراعا اينالعانىن اتاپ ءوتتى. قاسىم-جومارت توقاەۆ مۇنداي ديالوگ ەلىمىزدىڭ ىشكى جانە سىرتقى ساياساتىنداعى باسىمدىقتارىن تالقىلاۋعا مۇمكىندىك بەرەتىنىن ايتتى.

– ءبىز ەلىمىزدە تەڭگەرىمدى ساياسي جاڭعىرۋدى بىرتىندەپ جۇزەگە اسىرامىز. ەكونوميكالىق ىنتىماقتاستىق جانە دامۋ ۇيىمىنا مۇشە جەتەكشى ەلدەردىڭ ستاندارتتارىنا باسىمدىق بەرەمىز. ۇكىمەت وسى ماقساتقا جەتۋ جولىندا باتىل ءارى نىق قادام جاسايدى. «كۇشتى پرەزيدەنت – ىقپالدى پارلامەنت – ەسەپ بەرەتىن ۇكىمەت» – قازاقستاننىڭ مەملەكەتتىك جۇيەسىنىڭ نەگىزگى نىشاندارى، – دەدى مەملەكەت باسشىسى.

پرەزيدەنت ديپلوماتيالىق ميسسيا باسشىلارىنا «حالىق ۇنىنە قۇلاق اساتىن مەملەكەت» تۇجىرىمداماسىنىڭ جۇزەگە اسىرىلۋى، ۇلتتىق قوعامدىق سەنىم كەڭەسى تۋرالى ايتتى.

– ۇكىمەت ازاماتتاردىڭ تۇرمىستىق قاجەتتىلىكتەرىنە ۋاقىتىلى كوڭىل ءبولۋ ءۇشىن جۇمىس ىستەپ جاتىر. مەملەكەت باسشىسى رەتىندە قوعامداعى ءپليۋراليزمدى قولداپ، ونى ىلگەرىلەتۋ ماقساتىندا ساياسي پارتيالاردىڭ دامۋىنا مۇددەلىمىن. سوندىقتان قازىرگى ۋاقىتتا بەيبىت شەرۋلەردىڭ وتكىزىلۋىن رەتتەيتىن زاڭنامالىق نورمالار قايتا قارالۋدا. ءبىز بارلىق مەملەكەتتىك ورگانداردىڭ ەسەپ بەرۋىن ارتتىرۋ ءۇشىن ازاماتتىق ينستيتۋتتاردىڭ ءرولىن كۇشەيتە تۇسەمىز، – دەدى قاسىم-جومارت توقاەۆ.

پرەزيدەنت قۇقىق قورعاۋ جانە سوت جۇيەسىن رەفورمالاۋ تۋرالى ايتا كەلىپ، مەملەكەتتىڭ ءال-اۋقاتىن ارتتىرۋ ءىسى اتالعان ينستيتۋتتارعا دەگەن حالىقتىڭ سەنىمىنە بايلانىستى ەكەنىنە توقتالدى.

– مەملەكەتتىك اپپاراتتىڭ ساياسي تۇراقتىلىعى مەن تيىمدىلىگىن ەكونوميكالىق وسىمنەن ءبولىپ قاراۋعا بولمايدى. بۇل باعىتتا بىرقاتار جەتىستىكتەر بار. 2019 جىلدىڭ 10 ايىندا ەلىمىزدىڭ جالپى ىشكى ءونىمى 4,4 پايىزعا ءوستى. Doing Business-2020 رەيتينگىندە قازاقستان 25-ورىندا. باسەكەگە قابىلەتتىلىكتىڭ جاھاندىق يندەكسىندە ەلىمىز 55-ورىندا تۇر. الداعى بەس جىل ىشىندە حالىقارالىق رەيتينگتەگى پوزيتسيامىزدى ايتارلىقتاي جاقسارتۋدى جوسپارلاپ وتىرمىز، – دەدى قازاقستان پرەزيدەنتى.

قاسىم-جومارت توقاەۆ قازاقستاننىڭ حالىقارالىق ىنتىماقتاستىق ءۇشىن بۇرىنعىداي اشىق ەكەنىن، ستراتەگيالىق سەرىكتەستەرمەن جانە بارلىق مۇددەلى ەلدەرمەن كونسترۋكتيۆتى ءارى تەڭگەرىمدى ىقپالداستىق ورناتۋ ساياساتىن جالعاستىرا بەرەتىنىن اتاپ ءوتتى. سىرتقى ساياساتىمىزدا جاھاندىق كونفەسسياارالىق كەلىسىمگە، توزبەۋشىلىك جانە راديكاليزم يدەولوگياسىن تاراتۋعا قارسى كۇرەسكە باسا ءمان بەرەمىز.

– ءبىز وڭىرلىك جانە جاھاندىق تۇراقتىلىقتى قامتاماسىز ەتۋگە باعىتتالعان كونسترۋكتيۆتى باستامالاردى ىلگەرىلەتەمىز جانە قولدايمىز. بۇل، ەڭ الدىمەن، ازيالىق جانە ەۋروازيالىق قاۋىپسىزدىكتى نىعايتۋ، يادرولىق جانە تەرروريستىك قاۋىپ-قاتەرلەردىڭ الدىن الۋ، – دەدى مەملەكەت باسشىسى.

پرەزيدەنتتىڭ ايتۋىنشا، رەسەي فەدەراتسياسىمەن، قىتايمەن، اقش-پەن، ەۋروپالىق وداق جانە ورتالىق ازيا ەلدەرىمەن ءوزارا قارىم-قاتىناس ورناتۋ قازاقستاننىڭ سىرتقى ساياساتىنداعى باسىم باعىتى بولىپ قالا بەرەدى. سونىمەن قاتار قاسىم-جومارت توقاەۆ قازاقستاننىڭ حالىقارالىق ۇيىمدار مەن قارجى ينستيتۋتتارى اياسىندا كوپجاقتى ىنتىماقتاستىق پەن ىقپالداستىقتى دامىتۋ جونىندەگى جۇمىستاردى جالعاستىرا بەرەتىنىن ايتتى.

كەزدەسۋ سوڭىندا قالىپتاسقان ءداستۇر بويىنشا ديپلوماتيالىق كورپۋستىڭ دۋايەنى – بەلارۋس رەسپۋبليكاسىنىڭ قازاقستانداعى ەلشىسى اناتولي نيچكاسوۆ ءسوز سويلەدى.

پرەزيدەنت قاسىم-جومارت توقاەۆتىڭ سويلەگەن ءسوزىنىڭ تولىق نۇسقاسىمەن مىنا سىلتەمە ارقىلى تانىسا الاسىز.

Abai.kz