ولاردىڭ جەتەۋى - بالا. جان ساقتاۋ بولىمىندە ەكى ادام جاتىر. ءۇش ادام ءارى قاراي ەم الۋ ءۇشىن نۇر-سۇلتانداعى تراۆماتولوگيا جانە ورتوپەديا عىلىمي-زەرتتەۋ ينستيتۋتىنا جەتكىزىلگەن.

"بارلىق زارداپ شەككەندەردىڭ، سونىڭ ىشىندە الماتىدا جان ساقتاۋ بولىمىندە جاتقان ادامداردىڭ جاي-كۇيى تۇراقتى، ءبىر قالىپتى جاقسارۋى بايقالادى" دەلىنگەن الماتى قالالىق قوعامدىق دەنساۋلىق ساقتاۋ باسقارماسى تاراتقان حابارلامادا.

بارلىعى 22 وپەراتسيا جۇرگىزىلگەن، ولاردىڭ ءبارى ءساتتى اياقتالعان.

27 جەلتوقساندا تاڭەرتەڭ Bek Air اۋە كومپانياسىنىڭ Fokker-100 ۇشاعى الماتى اۋەجايىنا جاقىن جەرگە قۇلاپ، سول ماڭداعى ۇيگە سوعىلعان. ۇشاقتا 93 جولاۋشى جانە ەكيپاجدىڭ بەس مۇشەسى بولعان. 12 ادام قازا تاۋىپ، ونداعان جولاۋشى اۋرۋحاناعا تۇسكەن. ۇشاق سوعىلعان ءۇيدىڭ جاڭادان سالىنىپ جاتقانى، اپات كەزىندە ۇيدە ىشىندە ادام بولماعانى حابارلانعان.

جەلتوقساننىڭ 30-ى كۇنى الماتىدا ارنايى ءباسپاسوز جيىنىن وتكىزگەن Bek Air اۋە كومپانياسىنىڭ وكىلدەرى Fokker-100 ۇشاعىنىڭ "تەحنيكالىق جاعدايى جاقسى بولعان" دەدى. كومپانيا باسشىلىعى "Fokker-100 ۇشاعى اۋەگە كوتەرىلەردەن ءبىر مينۋت بۇرىن ۇشقان اۋىر سالماقتى Airbus-321 ۇشاعىنىڭ ىلەسپە تولقىنى اسەر ەتىپ، ۇشاقتى باسقارۋدى كۇرت قيىنداتقان بولۋى مۇمكىن" دەگەن بولجام ايتقان.

پرەمەر-مينيستر اسقار مامين اپاتتان قازا بولعانداردىڭ وتباسىنا ءتورت ميلليون تەڭگەدەن (شامامەن 10,5 مىڭ دوللار) تولەنەتىنىن ايتتى. ۇشاق اپاتىنىڭ سەبەبى انىقتالعانعا دەيىن Bek Air اۋە كومپانياسىنا بەرىلگەن ليتسەنزيا ۋاقىتشا توقتاتىلدى.

Abai.kz