قازاقستاننان وزگە ەشبىر ەلدىڭ كىتاپ دۇكەندەرىنىڭ سورەسىن وزگە تىلدەگى كىتاپتار قايىستىرا سىرەستىرىپ قاپتاپ تۇرمايدى. تۇركيادا تۇرىكشە، رەسەيدە ورىسشا، موڭعوليادا موڭعولشا، جاپونيادا جاپونشا كىتاپ قانا تاباسىڭ.

ال، ءبىزدىڭ ەلدە كەز-كەلگەن قالاداعى كىتاپ دۇكەنىنە باس سۇعىپ كورىڭىز. الەم ادەبيەتىنىڭ ينجۋ-مارجاندارى تەك ورىس تىلىندە عانا كوزدىڭ جاۋىن الىپ تۇر. قازاقشا كىتاپتار ءبىر سورەنىڭ جارتىسىن دا تولتىرا الماي جەتىمسىرەپ جۇتاپ، جۇدەپ-جاداپ تۇرعانى. ونىڭ وزىندە سوۆەت جازۋشىلارىنىڭ عانا تۋىندىلارىن كەزدەستىرەسىز. باياعىدا وقىلا-وقىلا جاۋىر بولعان كىتاپتار. جاڭا اۆتورلاردىڭ بىرەڭ-ساراڭ كىتاپتارى كەزدەسۋى مۇمكىن. بىراق، الگى اۆتورلاردىڭ ەسىم-سويلارىن كورگەندە ەزۋگە ەرىكسىز كۇلكى ۇيىرىلەدى.

ينتەرنەتتە ورىسشا جازىلىپ، وقىلىپ جاۋىر بولعان پسيحولوگيالىق كەڭەستەردىڭ قازاقشا كوشىرمەلەرى (پلاگيات), قالاي تەز بايۋعا بولاتىن جولداردى ۇيرەتەمىن دەپ داۋرىققان ءبىر جەلوكپەلەردىڭ جاساندىلاۋ جازبالارى جانە الدە اكتريسا، الدە، پروديۋسەر مە، ءبىر ايەلدىڭ شيماي-شاتپاق جيناقتارى...

نەگىزى، كۇلگەننەن گورى جىلاعان دۇرىس سەكىلدى. كىتاپ دۇكەندەرىنە وسىلايشا وزگە ەلدىڭ تىلدىك-اقپاراتتىق، ادەبي ەكسپانسياسىنا جول اشىپ قويىپ، كىتاپ سورەسىنىڭ بولماشى بولىگىن كۇلدىبادام بىردەمەلەرمەن جاماپ-جاسقاپ الىپ، "قازىرگى جاستار كىتاپ وقىمايدى" دەپ جاتىپ كەپ كوسەمسيمىز. ارينە، وقىمايدى. نەسىن وقيدى؟ كىتاپ دۇكەنىڭدە ءوزىنىڭ انا تىلىندە تۇششىنىپ وقيتىنداي تۇگىڭ بولماسا.

قۋاندىق شاماحايۇلىنىڭ الەۋمەتتىك جەلىدەگى جازباسىنان

Abai.kz