- "بەلنەفتەفتەحيم" مينيسترلىككە ءوتىنىش ءتۇسىردى. بۇل ۆەدومستۆو وكىلدەرى تاسىمالداۋ ماسەلەسىن تالقىلاۋ ءۇشىن قازاقستانعا كەلمەكشى. قازىرگى كەزدە ءتۇرلى باعىت بويىنشا مۇناي تاسىمالداپ جاتىرمىز جانە بەلارۋس جاعىنىڭ ۇسىنىسىن قاراستىرامىز، - دەدى قازاقستاننىڭ ەنەرگەتيكا ءمينيسترى نۇرلان نوعاەۆ 15 قاڭتاردا.

ونىڭ ايتۋىنشا، ەگەر مۇناي كومپانيالارى بەلارۋس تارابىنىڭ شارتتارىمەن كەلىسسە، تاراپتار كەلىسىمگە قول قويۋى مۇمكىن. نوعاەۆتىڭ ايتۋىنشا، بەلارۋس دەلەگاتى قازاقستانعا 20 قاڭتاردا كەلۋدى جوسپارلاپ وتىر.

بيىل رەسەيمەن مۇناي تاسىمالداۋ بويىنشا كەلىسىمگە كەلە الماعان بەلارۋس قازاقستاننان بولەك ۋكراينا، پولشا، ازەربايجان جانە بالتىق ەلدەرىنە مۇناي ساتىپ الۋ تۋرالى ۇسىنىس جاساعان.

بىلتىر قازان ايىندا قازاقستانعا كەلگەن بەلارۋس پرەزيدەنتى الەكساندر لۋكاشەنكو بەلارۋستىڭ قازاقستاننان مۇناي يمپورتتاۋعا مۇددەلى بولىپ وتىرعانىن جەتكىزگەن. قازاقستاننىڭ سول كەزدەگى ەنەرگەتيكا ءمينيسترى قانات بوزىمباەۆ "مۇناي جانە مۇناي ونىمدەرىن تاسىمالداۋ جونىندە كەلىسىمنىڭ نەگىزگى شارتتارىن جاسادىق" دەپ مالىمدەگەن.

قازاقستاننان مۇناي تاسىمالداۋ تۋرالى ۇسىنىستى لۋكاشەنكو العاش رەت 2019 جىلى مامىر ايىندا مينسكىدە قازاقستان ەلشىسىمەن كەزدەسۋ كەزىندە ايتقان. ءساۋىر ايىندا "درۋجبا" قۇبىرى ارقىلى رەسەيدەن تاسىمالداناتىن مۇنايدان لاس ونىمدەر انىقتالىپ، بەلارۋس مۇناي تاسىمالداۋدى توقتاتقان. قازاقستان ەلشىسىمەن كەزدەسۋدە لۋكاشەنكو مينسكىنىڭ مۇناي وڭدەيتىن زاۋىتتارىنا جان-جاقتان مۇناي ونىمدەرىن جەتكىزگىسى كەلەتىنىن ايتقان. ال ەلشى ەرمۇحامەد ەرتىسباەۆ قازاقستان بەلارۋستى مۇنايمەن قامتاماسىز ەتۋگە دايىن، تەك ول ءۇشىن رەسەيمەن كەلىسۋ كەرەك دەگەن.

ەكى اپتاعا جۋىق ۋاقىت بۇرىن ماسكەۋ كۇتپەگەن جەردەن بەلارۋسكە مۇناي تاسىمالداۋدى توقتاتقان. ساراپشىلاردىڭ ايتۋىنشا، بەلارۋس باعانى ارزانداتۋدى سۇراسا، رەسەي مۇنىمەن كەلىسپەيدى. بۇعان دەيىن مينسك شيكىزات تاسىمالداۋدىڭ بالاما جولدارىن ىزدەيتىنىن مالىمدەگەن.

Abai.kz